Ezequiel 26 - Bible in Tzotzil de Chenalhó with Deuterocanon

Ch-ac'bat stoj smul Tiro

¹ C'alal sba c'ac'al yochel u ta xbuluchibal (11) jabile, ja'o ital sc'opanun li Muc'ul Diose, jech laj yalbun:

² “Xnich'on cristiano, li Tiroe jech laj yal ta stojol li Jerusalene: ‘Toj lec ti jech ic'ot ta pasele; Chvoc' xa li ti'na yu'un yantic banamile. Vu'un xa li' chtal ta jtojol li yantic banamile, vu'un chinoj ta c'ulejalil; li stuque iyavnaij o’, xi.

³ “Ja' yu'un vu'un li Muc'ul Diosune jech chcal: Tiro, chacalbot ava'ay ti vu'un chajcontrainot ta ora li'i; ta xcac' ti chtal scontrainot li yantic banamile. Ja' jech chtal jech chac c'u cha'al muc'ta nab c'alal tsots tsyuq'uilan sbae.

⁴ Ta xvul slilinic scotol li acoraltonale; ta slomesic yalel ta banamil li toyol q'uelub osiletic avu'une. Ta jmes batel scotol c'alal ta pucuquetic; jeche' xa bajbaj ta xcom cu'un jech chac c'u cha'al ton.

⁵ Li o'lol nabe ja' jech ta xcom jech chac c'u cha'al sq'uiubil nuti' sventa stsacubil choy ti c'alal chaq'uic taquijuque. Vu'un chcal jtuc, vu'un li Muc'ul Diosune. Ta xich' pojbel batel scotol li c'usitic oy yu'une.

⁶ Li yalabtac ti buyuc no'ox nacajtique ta xich'ic milel ta espada scotol, jech tsna'ic o ti vu'un Muc'ul Diosune.

⁷ Jech chcal vu'un li Muc'ul Diosune: A'yo ava'yic, ta xcac' taluc li ajvalil ta Babilonia ta nortee, ja' li ajvalil Nabucodonosor ti ech'em svu'el ta scotol yantic ajvaliletique, yu'un ac'o tal scontrain li Tiroe. Chtal xchi'uc ca'etic, xchi'uc caretaetic, xchi'uc yajsoldadotac cajajtic ta ca', xchi'uc scotol yantic yajsoldadotac.

⁸ Ta smilic ta espada scotol li avalabtac ti buyuc no'ox nacajtique. Ta smac sbaic ta smacubbailic c'alal tsetuic li lume, ti c'alal ta spas stec'ubique. Ta xtal ta atojol xchi'uc yabtejebic xchi'uc smacubbailic li soldadoetique.

⁹ Ta xvul slilinic ta svuq'uesubil yu'unic li acoraltonale; ta slomesic ta yabtejebic li q'uelub osiletic avu'une.

¹⁰ Ta xapixic ta pucuc yu'un epal ca'etic; ta xnic acoraltonal ta yacan caretaetic xchi'uc ta yacan ca'etic. C'alal ta x'ochic batel ta ti'coraltonetic avu'une, ja' jech ta x'ochic jech chac c'u cha'al jun lum ti jamal xae, ti jinesbil xae.

¹¹ Ta svoy ca'etic ta xlaj ta teq'uel yu'unic li xoraltic avu'une; ta smilic ta espada scotol li jnaclumetic avu'une. Li oyetic ti pasbilic lec ta tsatsal tonetique ta slomesic yalel ta banamil scotol.

¹² Ta xelc'anic scotol li ac'ulejale; ta spojic scotol li abolomale. Ta sjinesic o li coralton avu'une; ta slomesic scotol li naetic avu'un ti lec c'upilic sbae. Ta sjipic batel ta nab scotol li stanaltaque xchi'uc scotol li ste'eltaque. Ta stsobic batel scotol li slilijemaltaque.

¹³ Ta jlajesbe sc'oplal ti xavochetic no'ox ta q'ueoje; mu'yuc xa bu chvinaj o chbac' li avarpaique.

¹⁴ Jeche' bajbaj chacom o cu'un jech chac c'u cha'al ton. Ja' jech chacom jech chac c'u cha'al bu tsq'ui snuti'ic sventa stsacubil choy. Mu'yuc xa bu chavich' cha'va'anel o. Vu'un chcal jtuc, vu'un li Muc'ul Diosune.

¹⁵ “Vu'un li Muc'ul Diosune jech chcal ta sventa li Tiroe: Li banamil cacajtic ta nabe ta xniquic ta xi'el avu'un ti c'alal cha'yic xac'ulet no'ox ta jinesele, ti c'alal cha'yic ch-avanic li boch'otic yayijemique, xchi'uc ti c'alal chvu' milbail te ta atojole.

¹⁶ Scotol li banquilaletic ta lumetic ta ti'ti' nabe, ta xyalic ta xchotlebic; ta sloq'uesic li snatil c'u'ique, xchi'uc li sc'u'ic ti lec luchtabilique. Ta xchotiic ta lumtic ta scoj xi'el, solel xniclajetic ta axi'elal; chbat xch'ulelic ti c'alal chayilicote.

¹⁷ Jech ta xlic sq'uejintaic q'ueoj sventa at-o'nton ta aventa, jech ta xlic yalic: ‘C'uxi lavich' jinesel, vo'ot ti solel puquem ac'oplale, ti toj tsots xu' avu'unic ta muc'tiquil nab xchi'uc avinictaque, ti laj avac' tsots xi'el ta stojol li avinictac ti te setelic ta apat axocone.

¹⁸ Pero c'alal lavuq'ue, ixi'ic avu'un li yantic banamile; xchi'uc li banamil cacajtic ta nabe solel ixi'ic ta scoj ti lalaj oe’, xiic ta atojol.

¹⁹ “Yu'un jech chcal, vu'un li Muc'ul Diosune: Ta jyavnaijesot o ta j'ech'el; ja' jech chacom cu'un jech chac c'u cha'al lum ti bu mu'yuc xa boch'o te nacale. Ta xcac' pulan ta vo'; ta xcac' mucan ta natil nab.

²⁰ Ta xcac' ochan yalel yo' bu oyic li boch'otic chamenique; ja' chbat achi'in li boch'otic ep xa jabil sjelovel li' ta banamile. Ta xcac'ot yalel ta mero yutil banamil te ti bu xch'ijan o sbatel osile, jech te chachi'in o ta naclej li boch'otic batemic ta muquinaltique. Mu'yuc xa bu chavich' va'anel o; mu'yuc xa bu chanaqui o li' ta banamil yo' bu nacajtic li boch'otic cuxajtique.

²¹ J'ac'ub xi'el chac'ot o; j'ech'el chach'ay o. Ta to xavich' sa'el, pero mu'yuc xa boch'o chastaot o. Vu'un chcal jtuc, vu'un li Muc'ul Diosune”, xi.