Ezequiel 25 - Bible in Tzotzil de Chenalhó with Deuterocanon

Ch-ac'bat stoj smul li amonetique

¹ La sc'opanun yan velta li Muc'ul Diose, jech laj yalbun:

² “Xnich'on cristiano, q'uelo batel li yosilal Amone; albo ta jamal ti tstoj smulique.

³ Jech xavalbe batel li amonetique: ‘A'yo ava'yic c'usi chal li Muc'ul Diose, ja' li Cajvaltique: Li vo'oxuque toj xcuxet avo'ntonic c'alal laj avilic isoc o li ch'ulna cu'une, ti iyavnaij o li yosilal Israele, xchi'uc ti chucbil ibatic ta yan banamil li smomnich'nab Judae. Toj lec ti jech ic'ot ta pasele, xachiic.

⁴ Ja' yu'un a'yo ava'yic, chacac'oxuc ta sc'ob li cristianoetic chliquic tal ta sloq'ueb c'ac'ale, ch-och o ta sc'obic li avosilalique. Te tspas scarpanaic; ja' tsve'ic scotol li c'usitic chloc' avu'unique; ja' chuch'ic li ya'lel chu' vacax chloc' avu'unique.

⁵ Li yosilal Rabae ta xc'ot ta sve'ub camelloetic; li Amone ta xc'ot ta yavil chijetic. Jech chana'ic o ti vu'un Muc'ul Diosune.

⁶ ‘Jech chcal vu'un li Muc'ul Diosune vu'un li Avajvalicune: Ta sventa ti laj apac' ac'obic, ti xabitic xa, ti xcuxet xa avo'ntonic c'alal laj avilic ti solel mu'yuc stu icom li yosilal Israele,

⁷ ja' yu'un vu'un ta jye' jc'ob ta atojolic. Ta xcac'oxuc ta sc'ob yantic banamil yu'un ac'o spojic batel scotol li c'usitic oy avu'unique; ta jbuloxuc loq'uel ta stojol li lumetique; ta jch'ayboxuc o ats'unubalic ta jujun banamil. Ta xculesoxuc o, jech chana'ic ti vu'un Muc'ul Diosune’, uto”, xiyutun.

Ch-ac'bat stoj smul Moab

⁸ Jech chal li Muc'ul Diose, ja' li Cajvaltique: “Li Moab xchi'uc Seire jech chal: ‘A'yo ava'yic, li Judae ja' xa jech icom jech chac c'u cha'al yantic banamil’, xi.

⁹ Ja' yu'un ta jam jun be ta xocon Moab; ta jliques ta jot sti' c'alal to ta yan jot sti'. Ja' chlaj scotol li lumetic ti toj lequic te ta yosilalique, ja' li Bet-jesimot, Baal-meón, xchi'uc Quiriataime.

¹⁰ Ja' te ta xjelovic tal li cristianoetic chliquic tal ta sloq'ueb c'ac'ale; ja' ta xcac'be yu'uninic o, yu'un jech ac'o ch'ayuc o ta alel sc'oplal ta yantic lum li Amone.

¹¹ Jech noxtoc ta xcac'be stoj smul li Moabe yu'un jech ac'o sna'ic ti vu'un Muc'ul Diosune”, xi.

Ch-ac'bat stoj smul Edom

¹² Jech chal noxtoc li Muc'ul Diose: “Li Edome laj xa spacbe sutel li Judae. Jech toj tsots smul la sta ta sventa ti la spac sutele.

¹³ Ja' yu'un jech chcal vu'un li Muc'ul Diosune: Ta jye' jc'ob ta stojol ec li Edome. Ta xculesbe scotol li yajvale xchi'uc li sts'unub yovolique; xch'ijan chcom o cu'un. Ta xcac' ta milel ta espada scotol li Temán c'alal to ta Dedane.

¹⁴ Ta jpacbe sutel ec li Edome; ja' ta spasic li jteclumale, ja' li israeletique. Ja' jech ta spasbeic jech chac c'u cha'al tsc'an li sc'ac'al co'ntone. Jech chilic ti vu'un ta xcac'be sutel spacole”, xi li Muc'ul Diose.

Ch-ac'bat stoj smul filistaetic

¹⁵ Jech chal noxtoc li Muc'ul Diose: “Li filistaetique laj xa spacbeic sutel li israeletique. Ta scotol yo'ntonic, ta sc'ac'al yo'ntonic la spaquic; scotol ora la spas sbaic o ta yajcontra, tsc'an chulesic o.

¹⁶ Ja' yu'un jech chcal vu'un li Muc'ul Diosune: Ta jye' batel jc'ob ta stojol ec li filistaetique. Ta jch'aybe o sc'oplal li ceretetique; ta xcules o li boch'otic chcomic to te ta ti'ti' nabe.

¹⁷ Lec tsots chcac'be sutel spacol, xchi'uc ta sc'ac'al co'nton ta jpacbeic sutel. C'alal ta jpacbeic sutel li c'usi la spasique, jech tsna'ic o ti vu'un Muc'ul Diosune”, xi li Diose.