Ezequiel 24 - Bible in Tzotzil de Chenalhó with Deuterocanon

Lo'il sventa jun bin chich' lacanel ta c'oc'

¹ Ta slajunebal c'ac'al yochel slajunebal u ta sbalunebal jabile la sc'opanun yan velta li Muc'ul Diose, jech laj yalbun:

² “Vo'ot xnich'on cristiano, ts'ibao ta vun li c'usi c'ac'alil li'i, yu'un li ajvalil ta Babiloniae tal xa setuic li lum Jerusalene.

³ Alo ta stojol scotol jtacchiquin cristianoetic li senyail c'op li'i, jech xaval: jech chal li Muc'ul Diose ja' li Cajvaltique: ‘Lacano ta c'oc' junuc bin, ac'bo ya'lel.

⁴ Ac'bo sti'bolal, lec biq'uitic bojilanbil xapas; ja' xavac' li sbec'tal yo', xchi'uc li slomo ti lec t'ujbile, xchi'uc ac'bo noxtoc li sbaquil ti bu lequique.

⁵ Tsaco ta ora jcotuc chij ti bu leque. Ac'bo ep si'il ta yolon li bine, yu'un ac'o vocanuc lec; ac'o ta'ajuc lec noxtoc li sbaquil te oye.

⁶ ‘Jech chal li Muc'ul Diose: ¡Ay, toj abul sba li jmilvanej lume! Ja' jech chac c'u cha'al bin ti pimuben yic'ubal ti pasem xa ta xoque. Ja' yu'un vo'ot xaloq'ues ta jujubej li ti'bol te oye; xquechet xaloq'ues ta jujubej, mu persauc chaq'uel bu jbejucal chaloq'ues.

⁷ Yu'un noj ta ch'ich'. Solel ta baba ton la smal, muc ta bats'i banamiluc la smal; ta bats'i banamiluc la smale, xu' to chmac ta lum ti jechuque.

⁸ Ja' yu'un te ta jcomtsan o li ch'ich' ta baba tone yu'un mu xu' chich' maquel ta banamil, yu'un jech xu' tstsan li sc'ac'al co'ntone, jech xu' chich'beic spacol li c'usi la spasique.

⁹ ‘Jech chcal vu'un li Muc'ul Diosune: ¡Toj abul sba li jmilvanej lume! yu'un vu'un jtuc ta xcac' jun muc'ta c'oc'.

¹⁰ Ac'bo ep si'il li bine, chuchbo lec sc'ac'al; ac'o ta'ajuc lec li ti'bole; ac'o uluc o ta voc, ja' to me ic'ac' li sbaquile.

¹¹ Te ac'o comuc o ta ac'altic li xocol bine; te ac'o tsajubuc ta c'oc', ja' to jech xu' chloc' scotol li yic'ubale, jech xu' chc'ac' scotol.

¹² Pero muc ono'ox xu' o, yu'un toj pim li yic'ubale; muc ono'ox xloc' o ta c'oc'.

¹³ ‘Jerusalén, ta jc'an ox ta jpocbot loq'uel li achopolil ta scoj amule, pero muc ono'ox xacom o ta lec. Ja' to xu' chpoc loq'uel scotol c'alal me la jloq'ues scotol li sc'ac'al co'nton ta atojole.

¹⁴ Vu'un jtuc ta xcal jech, jech persa chc'ot ta pasel. Mu'yuc ta jsutes jc'op; mu'yuc chac'uxubaj ta co'nton; mu'yuc chisut ta jva'lupat. Ta persa ta xcac'bot atoj ti c'u x'elan avabtele xchi'uc ti c'u x'elan laj apase’, xi li Muc'ul Diose”, xiyutun.

Icham yajnil li Ezequiele

¹⁵ Li Muc'ul Diose la sc'opanun, jech laj yalbun:

¹⁶ “A'yo ava'ay, ta jpojbot batel ta anil li boch'o toj lec ac'anoje, pero mu me xa'oc'; mu me xavat avo'nton, mu me xamal ya'lel asat ta scoj.

¹⁷ Oc'an ta mucul no'ox, pero mu me xalap c'u'il sventa at-o'nton jech chac c'u cha'al c'alal oy boch'o chcham yu'unique. Ac'o lec xpix ajol, lapo lec axonob; mu xapix asat sventa senyail at-o'nton, mu xave' pan jech chac c'u cha'al tsve'ic li boch'o chat yo'ntonique”, xiyutun.

¹⁸ Jech ta sob yoc'omal bat jc'opan scotol li jteclume; ta smalel c'ac'al icham li cajnile. Ta yoc'omal lic jpas batel jech chac c'u cha'al laj yalbun li Diose.

¹⁹ Jech laj yalbun li jteclume: “Albun ca'icutic c'usi smelol ta jventacutic li c'usi chapase”, xiyuticun.

²⁰ Jech laj calbeic: “Yu'un la sc'opanun li Muc'ul Diose, jech laj yalbun:

²¹ ‘Jech xavalbe ya'yic scotol li achi'iltaque: Jech chal li Muc'ul Diose: A'yo ava'yic, ta jsoquesbe o sc'oplal li ch'ulna cu'un ti tsots sc'oplal avu'unique, ti toj lec ac'anojique, ti lec to'ox avich'ojic ta muq'ue. Li aqueremic atsebic chcom avu'unique ta xcac' ta milel ta espada scotol.

²² Ja' jech chlic apasic jech chac c'u cha'al la spas li Ezequiele. Mu'yuc bu chapix asatic sventa at-o'nton; mu'yuc bu chave'ic pan sventa oq'uel.

²³ Li xpix ajolique te alapojic o; li axonobique te alapojic o. Mu'yuc bu chavat avo'ntonic, mu'yuc bu cha'oq'uic; te no'ox chalajic o ta scoj li achopolilique. Ta jujuntal te cha'oc' atuquic.

²⁴ Li Ezequiele ja' senyail chc'ot ta atojolic; ti c'u x'elan ta spas chavilique ja' jech chlic apasic ec. C'alal me ic'ot ta pasele, jech chlic ana'ic ti vu'un Muc'ul Diosun, ti vu'un Avajvalicune.

²⁵ ‘C'alal me la sta yorail ta jinesbeic o ta j'ech'el li c'usi toj tsots sc'oplal yu'unique, ti toj xcuxet no'ox yo'ntonic yu'une, xchi'uc ti toj ep sc'anojique, ta jpojbeic noxtoc li squerem stsebique.

²⁶ C'alal me ic'ot sc'ac'alile, ta to xtal yalbot chopol a'yej ta anil li boch'o chcol to ta milele.

²⁷ Ja' to te chlic jamuc lec li avee, chlic c'opojan ta stojol li boch'o chcolic toe; chlaj sc'oplal ti uma'tic no'ox abae. Vo'ot sq'uelubilot chac'ot, jech tsna'ic o ti vu'un Muc'ul Diosun’, xi li Diose”, xi li Ezequiele.