Ezequiel 23 - Bible in Tzotzil de Chenalhó with Deuterocanon

Li Samaria xchi'uc Jerusalene xco'laj xchi'uc jmulavil antsetic

¹ La sc'opanun yan velta li Muc'ul Diose, jech laj yalbun:

² “Vo'ot xnich'on cristiano, oy chib antsetic, jun sme'ic.

³ Li chib antsetic le'e imulivajic te ta Egipto, ta stsebalic ono'ox jech la spasic tal. Te laj yich'ic volilanbel xchu'ic; te ich'ay o stsebalic.

⁴ Li vixile Ahola sbi; li muquile Aholiba sbi. Vu'un to'ox laj quiq'uic, i'ayin ep jquerem jtseb yu'unic. Li Aholae ja' li Samariae; li Aholibae ja' li Jerusalene.

⁵ Pero li Aholae la sa' smul ti c'alal quic'oj to'oxe; solel la sc'upin sbaic xchi'uc li asiriaetic, ja' li soldadoetic

⁶ ti ic'ic'tic sba stsajal sc'u'ique. Scotolic le'e ja' jpasmantaletic, ja' banquilal soldadoetic; puru queremetic lec c'upilic sba, xchi'uc puru cajajtic ta ca' chanovic.

⁷ Ja' imulivaj xchi'uc scotol li asiriaetic ti lec c'upil sbaique. Laj yac' sba o ta c'upinel ta stojolic; la soques sba o xchi'uc li sloc'obaltac sdiose.

⁸ Muc scomtsan li mulivajel ti laj ono'ox spas te ta Egiptoe, yu'un ta stsebal ono'ox laj yac' sba. Lec laj yac' ta c'upinel li xchu'e; solel laj yac' sbec'tal o ta mulivajel.

⁹ Ja' yu'un laj cac' ta sc'ob li sc'upil vinique, ja' li asiriaetique, yu'un ja' sc'upil.

¹⁰ Jech li asiriaetique laj yaq'uic ta q'uexlal. La spojbeic li yalabtaque; li me'ile la smilic ta espada. Jech ipuc batel sc'oplal ta stojol yantic antsetic ti c'u x'elan i'ac'bat stoj smule.

¹¹ “Li Aholibae, ja' li muquile, laj yil li c'usi ic'ot ta pasele, pero ja' toj ech'em chopol la spas li stuque; ja' xu' to jutuc li vixile. Solel la spas scotol c'usi tsc'an yo'nton, xchi'uc li mulivajele.

¹² Lic sc'upin ec li asiriaetique, ja' li jpasmantaletique, li banquilal soldadoetique, li boch'otic lec sc'u' spoq'uique, li soldadoetic ti cajajtic ta ca' chanovique, yu'un scotolic puru queremetic lec c'upil sbaic.

¹³ Laj quil ti solel la sbolibtas sbae, ti jun be la stam batel xchibalique.

¹⁴ Ech'em to lic spas mulil ti c'alal laj yilbe sloc'obal li babilonia viniquetic ta c'alc'alnae, ja' li sloc'obal caldeaetic bonbilic ta tsoj

¹⁵ ti xchuquinoj lec yabtejebique, ti oy lec xpix sjolique, ti xco'laj xa xchi'uc banquilal soldadoetic ta q'uelele, ja' li babilonia viniquetic voq'uemic ta Caldeae.

¹⁶ Jech lic xpich'-o'nta ti c'alal sba velta laj yile; la stac batel j'almantaletic yu'un ta yosilal li caldeetique.

¹⁷ Ja' yu'un li babilonia viniquetique italic ta stojol, tal staic ta svayab sventa tsc'upinic. Solel laj yac' sbaic o ta stojol; jech ec li stuque laj yac' sba o ec. Toj ech'em no'ox laj yac' li sbec'tale; solel x'ibet xa yo'nton icom.

¹⁸ Ta satilal la spas li mulile; laj yac' sba o ta q'uelel ta jyalel. Ja' yu'un x'ibet co'nton yu'un ec, jech chac c'u cha'al i'ibaj co'nton yu'un li xvixe.

¹⁹ Solel toj ech'em ibat spasel yu'un li mulile; ja' la svules ta sjol ti c'u ono'ox x'elan la spas ta stsebal te ta Egiptoe,

²⁰ ti solel toj c'upil laj ya'ay li sc'upiltac tee, ja' li viniquetic ti lec q'uixin sbec'talic jech chac c'u cha'al buroe, ti ep chloc' yipic jech chac c'u cha'al ca'etique.

²¹ “Ja' yu'un li vo'ote Aholiba, ja' oy ta avo'nton chapas yan velta ti c'u ono'ox x'elan laj apas ta atsebal te ta Egiptoe, ti laj avich' volilanbel achu' yu'un li egiptoetic c'alal atsebal to'oxe.

²² Ja' yu'un, jech chcal vu'un li Muc'ul Diosune: A'yo ava'ay, li ac'upiltac ti xtaet xa avo'nton yu'un li' ta orae, ta xcac' joybijuc ta avajcontra. Ta xtal scontrainicot ta joyob li cristianoetic

²³ ta Babiloniae, ta Caldeae, ta Pecode, ta Soae, ta Coae, xchi'uc scotol li asiriaetique; ja' li queremetic ti lec c'upilic sbae, li jpasmantaletique, li banquilal soldadoetique, li boch'otic tsots yabtelique, xchi'uc li soldadoetic ti cajajtic ta ca' chanovique.

²⁴ Ta xtal scontrainicot xchi'uc epal caretaetic xchi'uc epal soldadoetic; ta setuoxuc ta jujujot, chich' tal lec yabtejebic, smac sjolic, xchi'uc smacubbailic. Vu'un ta jmantal chayac'bot atoj li amule; ja' jech chaxchapanot jech chac c'u cha'al chal li mantaletic yu'unique.

²⁵ Ta jloq'ues sc'ac'al co'nton ta atojol; chlic yac'bicot tsots avocol. Ta sloq'uesic ani' xchi'uc achiquin; li boch'otic chcomic to avu'une ta xich'ic milel ta espada. Ta xiq'uic batel li aqueremetic atsebetique; li scomelale ta xich'ic chiq'uel ta c'oc'.

²⁶ Ta spojic batel li ac'u' apoq'ue; ta snitboxuc loq'uel scotol li at'ujumal avac'oje.

²⁷ Ta jpajes li c'usi tsc'an abec'tale xchi'uc li muliletic laj apas te ta Egiptoe, jech mu'yuc xa bu chlic t'abuc batel ta avo'nton; mu'yuc xa bu chana' batel yan velta li Egiptoe.

²⁸ “A'yo ava'ay c'usi chcal vu'un li Muc'ul Diosune: Ta xacac'ot ta sc'ob li yantic lum ti abajoj xae, ti x'ibet xa avo'nton yu'une.

²⁹ Jech chlic yuts'intaot ta sc'ac'al yo'ntonic; ja' chich'ic scotol li c'usitic oy avu'une. Solel t'anal chascomtsanicot; ta xvinaj li abec'tal ti laj avac' ta sventa mulile, ti laj avac' ta sventa c'usi tsc'an abec'tale.

³⁰ Ti jech chc'ot ta pasele ja' ta scoj li mulil laj apas xchi'uc yantic lumetique, ti laj abolibtas aba ta sventa li sloc'obaltac diosetic yu'unique.

³¹ Yu'un ja' laj atambe batel sbe ec li avixe, ja' yu'un ja' chacac'bot avuch' ec li sbel muc'ta bis jech chac c'u cha'al laj cac'be yuch' li avix Samariae.

³² “Ja' yu'un jech chcal vu'un li Muc'ul Diosun, vu'un li Avajvalune: Ja' chavuch'be ec li sbel muc'ta bis ti laj cac'be yuch' li avixe, ja' li bis ti lec jamale, ti lec nat yute, ti ep sbele, ti nojem ta labanel xchi'uc ta na'leele.

³³ Jech chlic yacuban yu'un, chava'ay lec avocol yu'un. Yu'un li sbele ja' xa sventa lajel chamel yich'oj tal; Ja' li bis ti laj yuch'be sbel li avix Samariae.

³⁴ Chlic avuch'be sbel ec, ja' to me ilaj avuch'e, chlic avoc'be li yavile, chlic ali'an ta jot'el li achu'e. Vu'un chcal jtuc, vu'un li Muc'ul Diosune.

³⁵ “Ta sventa ti vu'un laj ajipun ta avo'ntone, ti laj ava'lupatinun comele, ja' yu'un paso ava'ay c'u x'elan stojol li c'usi tsc'an abec'tale xchi'uc li muliletic laj apase”, xi li Diose.

³⁶ Jech laj yalbun li Muc'ul Diose: “Xnich'on cristiano, ¿Me muc chavalbe ya'ay c'usi smul li Ahola xchi'uc li Aholibae, me muc chavalbe ya'yic ta jamal li c'usitic toj chopol tspasique?

³⁷ Yu'un mu junuc yo'ntonic ta jtojol; ep xa imulivajic, solel yatinoj ch'ich' noxtoc li sc'obique, ja' bat yich'ic ta muc' noxtoc li sloc'obal yan diosetique. Li jnich'nab la svoq'uesique la xchiq'uic ta c'oc' sventa smoton li sdiosique.

³⁸ Solel toj ech'em chopol c'usi la spasic ta jtojol; te no'ox ta jun sc'ac'alil la sbolibtasic li ch'ulna cu'une, xchi'uc la soquesbeic sc'oplal li sc'ac'alil cuxub o'ntonal cu'une.

³⁹ C'alal la xchic' xnich'onic sventa smoton sdiosique, ja'o ital ochicuc ta ch'ulna cu'un noxtoc; la sbolibtasic ta jyalel. Ja' jech la spasic te ta ch'ulna cu'un.

⁴⁰ “Jech noxtoc la staquic batel boch'o bat yiq'uic tal yantic viniquetic ta nom. C'alal laj yilic ivul li viniquetique, lic atinicuc lec, lic sbon lec satic; laj yaq'uic lec st'ujumalic sventa chic' ta stojolic.

⁴¹ Ichotiic ta lequil chotlebal yo' bu oy jun mexa lec chapanbile; ja' te laj yac' ta ba mexa li pom xchi'uc aceite ti ts'u'iltasbilic cu'une.

⁴² Ivinaj xvochlajetic epal cristianoetic, ja' j'uch'poxetic ic'bilic tal ta xocol banamil. Vul st'ujumtasic li antsetique; laj yac'beic xoj ste'el sc'obic xchi'uc scoronail sjolic.

⁴³ Li vu'une jech laj cal: ‘¿Me chtun to yu'unic li antsetic ti melubenic xa ta mulivajele? ¿Me ta to xmulivaj xchi'uquic?

⁴⁴ Yu'un italic yo' bu oyic li Ahola xchi'uc Aholiba jech chac c'u cha'al li boch'o chbat ta stojol jmulavil antsetique’, xichi.

⁴⁵ Pero oy viniquetic ti tuc' yo'ntonique; ja' chalbeic c'u x'elan stojol smul chich'ic jech chac c'u cha'al chal li mantal ta sventa mulivajele, xchi'uc li mantal sventa milvaneje. Yu'un ja' jmulavil antsetic xchi'uc jmilvanejetic.

⁴⁶ “Ja' yu'un jech chcal vu'un li Muc'ul Diosune: Vu'un ta xcac' stsob sbaic tal ta stojolic epal cristianoetic; ep ta xi'ic, xchi'uc ta xpojbatic batel c'usitic oy yu'unic.

⁴⁷ Ta xmilatic ta ton xchi'uc ta espada; ta xmilbatic li yalabique, c'alal ta queremetic, ta tsebetic. Li snaique ta xchic'batic ta c'oc' scotol.

⁴⁸ Ja' to jech ta xpaj o li c'usi tsc'an sbec'talic li' ta banamile. Scotol antsetic ta xilic, yu'un mu me spasic jech ec.

⁴⁹ Ta x'ac'bat stojic li c'usi chopol la spasique; ta x'ac'bat svocolic ta sventa ti laj yich'ic ta muc' sloc'obal yantic diosetique, jech chlic sna'ic ti vu'un Muc'ul Diosune, ti vu'un Yajvalun scotole”, xi li Diose.