Ezequiel 22 - Bible in Tzotzil de Chenalhó with Deuterocanon

Muliletic ta Jerusalén

¹ La sc'opanun noxtoc li Muc'ul Diose, jech laj yalbun:

² “Vo'ot xnich'on cristiano, ¿me mu'yuc chavalbe ya'yic, me te no'ox aq'ueloj c'usi tspasic li jun ta lum jmalch'ich'etique, me mu'yuc chavac'be yil li c'usitic toj chopol tspasique?

³ Jech xavalbe: ‘Jech chal li Muc'ul Diose, ja' li Cajvaltique: Lum, vo'ot li jmalch'ich'ote, ti chapasbe sloc'obal diosetic sventa chabolibtas aba oe, ic'ot xa li avoraile.

⁴ Ta sventa ti ep laj amal ch'ich'e, ataoj xa amul o; ta sventa ti laj apas sloc'obal diosetique, laj xa asoques aba o. Jech laj acomajes avorail atuc; laj amuts ajabilal atuc. Ja' yu'un, laj xa cac' ti mu'yuc atu chacom yu'un yantic lumetique, ti na'lebil chacom oe.

⁵ Li boch'otic nopol te oyic ta ats'ele xchi'uc li boch'otic nom to oyic batele ta stse'intaicot, yu'un chpuc ac'oplal ti vo'ot toj chopol c'usi chapase, xchi'uc ti asoquesoj scotole.

⁶ Yu'un ja' te oy ta atojol li banquilaletic yu'un Israele, ja' ti la sloq'ues yo'ntonic ta milvaneje, ti la spas c'u yepal xu' yu'unique.

⁷ Li jnaclumetic avu'une mu xich'ic ta muc' li stot sme'ique. Abul sbaic ta uts'intael yu'unic li yanlumetic te nacalique, xchi'uc la spojbeic c'usitic oy yu'unic li me'on antsetique xchi'uc li me'on ololetique.

⁸ Jech noxtoc muc xavich' ta muc' li c'usi ts'u'iltasbil cu'une; laj asoquesbe sc'oplal li sc'ac'alil cuxub o'ntonal cu'une.

⁹ Puru jtic'muliletic te oyic ta atojol sventa chmilvanic. Te ive'ic noxtoc ta vitsetic avu'un; te la spasic scotol li c'usitic toj q'uexlal sbae.

¹⁰ Oy boch'o la sc'opanbe yajnil stotic te ta atojol noxtoc; oy boch'o la stsatsal stsaquic antsetic noxtoc ti c'alal ja'o chil xchamelique.

¹¹ Oy boch'o la sc'opanbe yajnil xchi'ilic noxtoc; oy boch'o la sc'opan yalib noxtoc ti solel toj q'uexlal sbae; oy boch'o laj yuts'intabe stseb stot noxtoc.

¹² Oy boch'o la xchon sbaic ta taq'uin sventa chmilvanic, xchi'uc la sc'anbeic sjol staq'uinic, xchi'uc la xch'ambeic svocaroil. Oy boch'o la stsatsal elc'anbeic c'usi oy yu'un xchi'ilic noxtoc. Solel vu'un laj ach'ayicun o ta avo'ntonic.

¹³ ‘Ja' yu'un li vu'une la jt'ax ta majel jc'ob ta scoj li c'usi chapojbe achi'ilique, xchi'uc ta scoj ti ep chamalic ch'ich'e.

¹⁴ ¿Me chanop ti lec tsots xavaq'uique? ¿Me chanop ti xu' avu'un chapoj abaic c'alal me la sta sc'ac'alil chcac'bot atojique? Vu'un ta xcal jtuc, vu'un li Muc'ul Diosune, ta persa jech ta jpas.

¹⁵ Ta jpucoxuc batel ta yantic lum; ta jtanioxuc batel ta yantic banamil; ta xcac' ch'ayuc scotol li achopolile.

¹⁶ Ta acoj atuc ti chopol chayiloxuc li yantic banamile, jech chana' o ti vu'un Muc'ul Diosune’ uto”, xi li Diose.

¹⁷ La sc'opanun yan velta li Muc'ul Diose, jech laj yalbun:

¹⁸ “Vo'ot xnich'on cristiano, li smomnich'nab Israele ja' xa jechic ta jtojol jech chac c'u cha'al c'usi chcomelaj ta c'oc' ti c'alal chich' tiq'uel ta horno li bronce, cobre, estanyo, plomo, xchi'uc li saquil taq'uine. Ja' jech mu'yuc xa stuic ta jtojol.

¹⁹ Ja' yu'un jech chcal vu'un li Muc'ul Diosune, vu'un li Avajvalicune: Ta sventa ti ja' xa jech c'otemic jech chac c'u cha'al c'usi mu'yuc stue, ja' yu'un ta xlic jtsobic tal ta Jerusalén.

²⁰ Jech chac c'u cha'al chich' tsobel saquil taq'uin, tsatsal taq'uin, bronce, plomo, estanyo sventa chich' tiq'uel ta horno sventa chich' unijesele, ja' jech ta jtsobic tal ta sc'ac'al co'nton ec; te ta xcunijesic.

²¹ Vu'un jtuc ta jtsobic, ta stsan sc'ac'al co'nton ta stojolic, jech te ta xcunijesic ta yut lum.

²² Jech chac c'u cha'al ta c'oc' chich' unijesel li saquil taq'uine, ja' jech ta sc'ac'al co'nton ta xcunijesic ec; jech tsna'ic o ti vu'un jtuc Muc'ul Diosun ta jloq'ues sc'ac'al co'nton ta stojolique”, xi li Diose.

²³ La sc'opanun yan velta li Muc'ul Diose, jech laj yalbun:

²⁴ “Vo'ot xnich'on cristiano, jech xavalbe li jun banamil ta Israele: ‘Li vo'ote muc lequil banamilucot; mu'yuc chata ava'lel ti c'alal me ilic sc'ac'al co'ntone.

²⁵ Li j'alc'opetic avu'une ja' jechic jech chac c'u cha'al león ti tstsac ep sve'ele. Laj xa stsaquic ep cristianoetic; laj xa spojic ep c'ulejalil, xchi'uc c'usitic toj lequic. I'epaj xa me'on antsetic yu'unic te ta banamil.

²⁶ Li paleetic avu'une laj xa soquesic li jmantale; laj xa sbolibtasic li ch'ulna cu'une. Li c'usi ts'u'iltasbil, xchi'uc li c'usi muc ts'u'iltasbiluque co'ol no'ox sc'oplal laj ya'yic; mu'yuc laj yaq'uic ta ilel ti bu lecubtasbil xchi'uc ti bu mu'yuc lecubtasbile. Mu'yuc tsots sc'oplal laj ya'yic li sc'ac'alil cuxub o'ntonale, jech isoc batel jc'oplal yu'unic.

²⁷ Li banquilaletic avu'une ja' jechic jech chac c'u cha'al oq'uil ti biq'uitic tslilin sve'ele, yu'un la smalic ep ch'ich'; ep xa imilvanic sventa tspasic o ta jc'ulej.

²⁸ Li j'alc'opetic avu'une la smuquic ec li mulile jech chac c'u cha'al li boch'o tsbon ta tan spac'benal nae, yu'un ja' laj yalic li c'usi mu meleluque. Chalic ti oy c'usi chil ta xch'ulelique, pero jeche' tsnopic. Chalic ti jech laj calbeic vu'un li Diosune, pero mu'yuc bu jc'opanojic.

²⁹ Li jnaclumetic avu'une ja' laj yac' ta yo'ntonic puru elec'; laj yuts'intaic li boch'o abul sbaique xchi'uc li me'onetique. Li yanlumetique laj yac'beic svocol ta jech no'ox.

³⁰ La jsa' me oy junuc vinic te ta stojolic ti oy c'usi xu' tspas ta sventa slequilal li lume, ti me oy chc'opoj ta jtojol yu'un jech mu me xculese, pero mu'yuc la jta.

³¹ Ja' yu'un ta jloq'ues sc'ac'al co'nton ta stojolic, ta x'ulic ta sc'ac'al co'nton, ta xcac'be xcuch stuquic li c'usi la spasique’, uto”, xiyutun li Muc'ul Diose.