Ezequiel 21 - Bible in Tzotzil de Chenalhó with Deuterocanon

Sc'oplal yespada Muc'ul Dios

¹ La sc'opanun yan velta li Muc'ul Diose, jech laj yalbun:

² “Vo'ot xnich'on cristiano, q'uelo batel li Jerusalene. C'opojan batel ta stojol li ch'ulnae; alo batel c'usi chc'ot ta pasel ta stojol li yosilal Israele.

³ Jech xavalbe batel: ‘Jech chayalbot li Muc'ul Diose: A'yo ava'yic, ta xlic jcontrainoxuc. Ta jloq'ues ta sna li quespadae; ta xcac'be espada li boch'otic lequic, xchi'uc li boch'otic chopolic te ta atojole.

⁴ Ta sventa ti ta jmil ta espada li boch'otic lequic, xchi'uc li boch'otic chopolique, jech ta jloq'ues quespada noxtoc ta stojol scotol li cristianoetic xlic ta sur c'alal to ta nortee.

⁵ Jech tsna'ic o scotol cristianoetic ti vu'un jtuc Muc'ul Diosun la jloq'ues quespadae; mu'yuc bu ta jtic' o ochel ta sna, xi li Diose’, uto.

⁶ “Li vo'ote xnich'on cristiano, oc'an, avanan; xlaj xtu'p xa avo'nton ta oq'uel xapas ta stojol scotolic.

⁷ C'alal me jech chasjac'boxuque: ‘¿C'u yu'un ti ep cha'oq'ue?’, me xayutoxuque, jech xatac'beic: ‘Yu'un laj ca'ay ti oy c'usi tsots chc'ot ta pasele. C'alal me la sta yoraile, scotol cristiano ta xc'unib yo'ntonic, ta xat yo'ntonic, ta x'alub yoc sc'obic. Jutuc xa sc'an xc'ot ta pasel, yu'un jech laj yal stuc li Muc'ul Diose’, uto”, xiyutun.

⁸ La sc'opanun yan velta li Muc'ul Diose, jech laj yalbun:

⁹ “Xnich'on cristiano, alo c'usi chc'ot ta pasel, jech xaval: ‘Jech chal li Muc'ul Diose: ‘Li espadae, li espadae juxbil xa lec ye; loq'uesbil xa lec xcux.

¹⁰ Juxbil xa lec ye sventa tstsac sve'el; juxbil xa lec xcux sventa sts'ayts'un. ¿Me xcuxet xa co'ntontic ti jech chc'ot ta pasele? Li svaston jnich'one mu'yuc stu chcom jech chac c'u cha'al yantic te'etic.

¹¹ Li espadae laj xa xjuxbeic lec xcux, yu'un ta xa xich' tunesel, juxbil xa lec ye, juxbil xa loq'uel xcux, yu'un ta xa x'och ta sc'ob li jmilvaneje.

¹² Xnich'on cristiano, oc'an, avanan, yu'un chapal xa chich' milel scotol li jteclumale; chich' milel scotol c'alal ta banquilaletic te ta Israel. Scotolic co'ol chlajic ta milel ta espada xchi'uc li jteclumale. Ja' yu'un, majilano sna avo'nton ta scoj li vocole,

¹³ yu'un chapal xa sc'oplal o. Mu'yuc tsots sc'oplal chca'ay me chlajic ta milel li smomnich'nab David ti sc'oplal ja' ch-ochilanic ta ajvalilale, yu'un ja' jtoybaetic’, uto, xiyutun.

¹⁴ Ja' yu'un li vo'ote, xnich'on cristiano, alo li c'usi chc'ot ta pasele. T'axo ta majel li ac'obe; ac'o sloq'ues cha'moj, oxmojuc sc'ac'al yo'nton li espadae, ja' li espada sventa chmilvan, sventa chmacvan ta jujujote.

¹⁵ Yu'un jech ac'o xi'icuc scotolic, yu'un li espadae ta xa stsac ep sve'el; laj xa cac' ta scotol naetic sventa chmilvan. ¡Ay!, li espadae chapal xa sventa chlic ta ts'aylajetel; chapal xa sventa chlic sc'oc joliletic.

¹⁶ Espada, ve'an ta xcha'jotal ave, me ta bats'ic'ob, o me ta ts'etc'ob, buyuc no'ox jotucal chata.

¹⁷ Jech ec li vu'une ta jt'ax ta majel li jc'obe, yu'un ac'o loc'uc scotol li sc'ac'al co'ntone; vu'un chcal jtuc, vu'un li Muc'ul Diosune”, uto, xiyutun.

¹⁸ La sc'opanun yan velta li Muc'ul Diose, jech laj yalbun:

¹⁹ “Vo'ot xnich'on cristiano, ac'bo senyail cha'xoluc be, yu'un jech sna' bu chjelov tal xchi'uc yespada li ajvalil ta Babiloniae. Li chib bee ta jun no'ox banamil ac'o licuc batel. Ti bu chaliques batel jujuxole ac'bo senyail sventa chvinaj bu lumal chc'ot.

²⁰ Ac'bo senyail bu junucal chc'ot ta Rabá ta slumal smomnich'nab Amón, xchi'uc bu junucal chc'ot ta lum Jerusalén ta yosilal Judá, ja' li lum ti lec setbil ta coraltone, yu'un ja' te ac'o batuc xchi'uc yespada li ajvalil ta Babiloniae.

²¹ Yu'un li ajvalil ta Babiloniae te xa va'al yo' bu chcha'xolaj li bee, tst'un xa ta st'unubil bu jxolucal chbat; chilbe xa sq'uelubil ta flechaetic, tsjac' xa ta stojol diosetic yu'un, tst'un xa ta sventa secub chonbolom.

²² Li st'unubil yu'une ja' te chac' batel ta ilel ta bats'ic'ob. Sna' xa ti ja' lum Jerusalén chtal stsac ta pleitoe, ti xu' xa tsliquesic muc'ta milbaile, ti xu' xa ch-avanic sventa pleitoe, xchi'uc ti xu' xa tspas stec'ubic, ti xu' xa chtal setuic ta joyob li lum Jerusalene.

²³ Pero li jnaclumetic ta Jerusalene tscuyic ti lo'lael no'ox li c'usi chich' alele, yu'un oy c'usi lec xchapanoj xchi'uquic li ajvalile. Pero li ajvalile t'abal ta yo'nton li c'usi chopol la spasique yu'un jech xu' ta stsacan batel.

²⁴ Ja' yu'un jech chcal vu'un li Muc'ul Diosune: Ta sventa ti t'abal ta yo'nton li amulique, xchi'uc ti vinajem atalelique, ti sna'ic scotol li c'usitic chopol apasojique, ja' yu'un cha'ochic o ta sc'ob.

²⁵ Li vo'ote, banquilal ta Israel, bats'i toj ech'em chopol li avabtele. Laj xa sta sc'ac'alil, ja' xa yorail chavich' li slajeb stojol amule.

²⁶ Ja' yu'un jech chcal vu'un li Muc'ul Diosune, vu'un li Avajvalicune: Ta xavich' loq'uesbel li xpix ajole; ta xavich' velc'unbel loq'uel li acoronae. Ta xjel scotol. Ja' ta xmuy ta toyol li boch'o oy ta peq'uele; ja' ta xyal ta banamil li boch'o oy ta toyole.

²⁷ J'ech'el ta jsoques o; j'ech'el ta jines o scotol, ja' to me ivul ta loq'uel li boch'o tuc' chchapanvan ti vu'un cac'ojbe yabtele”, xi li Muc'ul Diose.

Vocol sventa amonetic

²⁸ “Li vo'ote xnich'on cristiano, alo c'usi chc'ot ta pasel ta stojol li smomnich'nab Amone, jech xaval: ‘Jech chal li Muc'ul Diose: Li espadae loq'uem xa ta sna sventa chmilvan; juxbil xa lec xcux sventa lec sts'ayts'un xchi'uc sventa ch-ulesvan.

²⁹ Li c'usi chil ta xch'ulel scuyojique mu meleluc; li c'usi chalique puru epalc'op, yu'un jech ac'o c'otuc ta stojolic c'ocbel snuq'uic ta espada li boch'otic chopol c'usi tspasic ti sc'oplal ac'o chamicuque. Ista xa yorail ch-ac'bat stoj li c'usi chopol tspasique.

³⁰ ‘¿Me yu'un ta jtic' ochel ta sna li quespadae? Te ta avosilal ti bu lach'ie, te ta alumal ti bu lavoq'ue ja' te chajchapanot,

³¹ ja' te ta jloq'ues scotol li sc'ac'al co'ntone; ja' te chacac'bot acuch scotol, chacac'ot ta sc'ob li viniquetic ti toj xi'balic sba, ti ja' yabtel chmilvanique.

³² Vo'ot si'ilot c'oc' chac'ot; li ach'ich'ale ta x'uch' yalel ta banamil; mu'yuc xa boch'o chast'abot o ta alel, yu'un vu'un chcal jtuc, vu'un li Muc'ul Diosune’, uto”, xi li Diose.