Ezequiel 20 - Bible in Tzotzil de Chenalhó with Deuterocanon

Jun yo'nton o ta stojol israeletic li Diose, pero li stuquique ja' chich'ic o ta muc' yan diosetic

¹ Ta slajunebal c'ac'al stsacoj yo'bal u ta svucubal jabil, italic ta jtojol jayibuc banquilaletic ta Israel, yu'un oy c'usi tal sjac'beic li Muc'ul Diose; te ivul chotiicuc ta jtojol.

² Te la sc'opanun li Muc'ul Diose, jech laj yalbun:

³ “Vo'ot xnich'on cristiano, jech xavalbe ya'yic li banquilaletique: ‘Jech chal li Muc'ul Diose: ¿Me oy c'usi tal ajac'bicun li vo'oxuque? Chacalboxuc ta jamal ta jbi ti mu'yuc chajtac'boxuque’, xi li Muc'ul Diose, ja' li Cajvaltique, uto.

⁴ Li vo'ote Ezequiel, me chac'ane albo ta jamal li c'usi smulique; ac'bo yotquinic ti toj chopolic c'usi la spas li stot sme'ique,

⁵ jech xavalbe: ‘Jech chal li Muc'ul Diose, ja' li Cajvaltique: C'alal la jt'uj li Israele, ja' li Jacobe, jtoyoj jc'ob c'alal oy c'usi laj calbe ta jamal li smomnich'nabtaque. Laj cac' jba ta otquinel ta stojolic te ta Egipto; jtoyoj jc'ob jech laj calbeic: Vu'un Muc'ul Diosun avu'unic, xcut.

⁶ Ja'o yorail te laj calbeic ta jamal ti ta jloq'uesic tal ta Egipto banamile, ti ta xquiq'uic batel ta banamil ti bu jt'ujojbeique, ja' li jun banamil ti bu chloc' ep ya'lel chu' vacax xchi'uc pome, ti stuc no'ox toj c'upil sba ta scotole.

⁷ Jech laj calbeic: Jujunoxuc jipic comel scotol li c'usitic toj chopolic batem ta avo'ntonique; mu me xabolibtas abaic ta sloc'obal li diosetic yu'un egiptoetique, yu'un vu'un Muc'ul Diosun avu'unic, xcutic.

⁸ ‘Pero li stuquique la stoy sbaic ta jtojol. Muc sc'an xch'unic li c'usi laj calbeique; muc sjipic loq'uel li c'usitic toj chopol batem ta yo'ntonique; muc scomtsanic yich'el ta muc' li sloc'obaltac diosetic yu'un egiptoetique. Jech la jnop ti ta jloq'ues sc'ac'al co'nton ta stojolique, ti ta xcac'be stojic te ta yosilal Egiptoe, ja' to ti c'alal mu'yuc xa chcom o li sc'ac'al co'ntone.

⁹ Pero ja' la jpas li c'usi sventa chi'ich'at ta muq'ue, yu'un jech mu me soc batel jc'oplal ta yantic banamil ti bu nacalique, yu'un ya'yojic scotolic ti caloj ta jloq'uesic tal ta Egiptoe.

¹⁰ Vu'un la jloq'uesic tal ta Egipto; laj quiq'uic tal ta xocol banamil.

¹¹ Te laj cac'beic li mantaletic xchi'uc li chanubtaseletic cu'une, yu'un jech xu' chcuxiic li boch'o ta xch'unique.

¹² Laj cac'beic noxtoc li sc'ac'alil cuxub o'ntonal cu'une, yu'un ja' sna'ubil chcom ta stojolic xchi'uc ta jtojol, jech tsna'ic ti vu'un jts'u'iltasoj, vu'un li Muc'ul Diosune.

¹³ Pero li smomnich'nab Israele la stoy sbaic ta jtojol te ta xocol banamil. Muc ja'uc la xch'unic li jmantaltaque; la sbajic li chanubtaseletic cu'un ti sc'oplal xu' tsta o xcuxlejalic li boch'o ta xch'unique. Li sc'ac'alil cuxub o'ntonal cu'une la sbolibtasic ta jyalel. Ja' yu'un laj calbeic ti ta jmal ta stojolic li sc'ac'al co'ntone, ti ta xculesic o te ta xocol banamile.

¹⁴ Pero ja' la jpas li c'usi sventa chi'ich'at ta muq'ue, yu'un jech mu me soc jc'oplal ta stojol li yantic banamil ti laj yilic c'u x'elan la jloq'uesic tale.

¹⁵ ‘Te ta xocol banamil la jtoy jc'ob ta stojolic noxtoc. Laj calbeic ta jamal ti mu'yuc ta xcac' ochicuc o ta banamil ti bu sc'oplal chcac'beique, ja' li banamil ti bu chloc' ep ya'lel chu' vacax xchi'uc pome, ti ja' no'ox stuc toj c'upil sba ta scotole.

¹⁶ Yu'un la sbajic li mantaletic cu'une; muc xch'unic li chanubtaseletic cu'une. La soquesic li sc'ac'alil cuxub o'ntonal cu'une, yu'un ja' laj yac' yo'ntonic ta stojol li sloc'obaltac yan diosetique.

¹⁷ Pero ic'uxubajic ta co'nton; muc jmilic, muc xculesic o te ta xocol banamil.

¹⁸ Jech laj calbeic te ta xocol banamil li xnich'nabique: Mu me xach'unic c'usi yalojboxuc li atotique; mu me xapasic li c'usi xchanubtasojoxuc comele. Mu me xabolibtas abaic ta scoj li sloc'obal yantic diosetique.

¹⁹ Vu'un Muc'ul Diosun avu'unic, ja' me xapasic c'usi chal li mantaletic cu'une; ja' me ch'unic li tojobtaseletic cu'une; ja' me pasilanic o batel.

²⁰ Ts'u'iltasbiluc me chc'ot avu'unic li sc'ac'alil cuxub o'ntonal cu'une, yu'un ja' sna'ubil chcom ta atojolic xchi'uc ta jtojol ec, yu'un jech chana'ic o ti vu'un Muc'ul Diosun avu'unique, xcutic.

²¹ ‘Pero li nich'naletique la stoy sbaic ta jtojol ec. Muc xch'unic li jmantaltaque; muc xich'ic ta muc' li tojobtaseletic cu'un ti caloj tsta xcuxlejalic o li boch'o ta xch'unique. La sbolibtasic li sc'ac'alil cuxub o'ntonal cu'une, jech la jnop ti ta xculesic te ta xocol banamile, yu'un jech chpaj li sc'ac'al co'nton ta stojolique.

²² Pero la jpajes jba ta sventa ac'o ich'atcun ta muc', yu'un jech mu me soc batel jc'oplal ta stojol li yantic banamil ti laj yilic ti vu'un la jloq'uesic tale.

²³ Jech te la jtoy jc'ob ta xocol banamil; laj calbeic ta jamal ti ta jpuquic batel ta yantic lume, ti ta jtaniic batel ta yantic banamile.

²⁴ Yu'un muc xch'unic li jmantaltaque; la sbajic li chanubtaseletic cu'une, xchi'uc la sbolibtasic li sc'ac'alil cuxub o'ntonale, ja' te laj yac' batel satic ta stojol li sloc'obal diosetic yu'un stot sme'ique.

²⁵ Ja' yu'un vu'un laj cac'be xch'unic mantaletic ti mu'yuc lequique; laj cac'be xch'unic chanubtaseletic ti mu sta o xcuxlejalic yu'une.

²⁶ Laj cac' bolibicuc o ta scoj li matanaletic chaq'uique xchi'uc ta scoj li sba xnich'nabic chchiq'uic ta c'oc' ta sventa smoton sdiosique, yu'un jech ac'o niquicuc ta xi'el, jech chlic sna'ic ti vu'un Muc'ul Diosune’, uto.

²⁷ “Ja' yu'un li vo'ote xnich'on cristiano, jech xavalbe li smomnich'nab Israele: ‘Jech chal li Muc'ul Diose, ja' li Cajvaltique: Li atot ame'ique laj ono'ox socbicun co'nton; muc ono'ox junuc yo'ntonic ta jtojol ec.

²⁸ C'alal la jtiq'uic ochel ta banamil ti bu calojbeic ono'ox ta jamal chcac'beique, laj yilic ti oy lec bic'tal vitsetic, ti oy lec te'etic lec pimic sc'obc'obe; ja' te lic yaq'uic chic'bil matanaletic xchi'uc yantic matanaletic ti ep chisa'bun sc'ac'al co'ntone. Te la xchiq'uic pom noxtoc ti lec muic yiq'ue, xchi'uc te laj yaq'uic ya'lel ts'usubetic noxtoc.

²⁹ Jech laj calbeic: ¿C'usi xa svu'el chavilic ti toyol vits bu chabatique? xcutic. Ja' yu'un Bama la sbiin o c'alal to tana li vitse, xi li Diose’, uto.

³⁰ “Jech xavalbe noxtoc li smomnich'nab Israele: ‘Jech chayalboxuc li Muc'ul Diose: ¿C'u yu'un ti chabolibtas abaic ec jech chac c'u cha'al la spas li atot ame'ique, xchi'uc ti mu junuc avo'ntonic ta jtojol ec ta scoj ti ja' batem avo'ntonic yich'el ta muc' li sloc'obaltac adiosique?

³¹ Yu'un chavac'beic matanaletic, xchi'uc chachic' anich'nabic sventa smoton; solel chabolibtas abaic ta sventa li sloc'obaltac adiosique, ja' jech chapasic o c'alal to tana. Ja' yu'un ¿me vu'un xa chac'anic ta jtac'boxuc ec li c'usi tal ajac'bicune? Vu'un li Muc'ul Diosun ti cuxulun oe, vu'un li Avajvalicune, chacalboxuc ta jamal ti mu'yuc chajtac'boxuc oe.

³² Li vo'oxuque jech chavalic: Jpastic jech chac c'u cha'al tspasic li yantic banamile, li yantic cristianoetique; ja' quich'tic ta muc' ec li te' xchi'uc li tonetique, xachiic. Pero mu jechuc chc'ot ta pasel.

³³ Jamal chacalboxuc, vu'un li Muc'ul Diosun ti cuxulun oe, ta xlic jventainoxuc lec ta jvu'el, ta jtsatsal, xchi'uc ta sc'ac'al co'nton.

³⁴ Ta jvu'el, ta jtsatsal, xchi'uc ta sc'ac'al co'nton ta xlic jloq'uesoxuc tal ta stojol li yantic lumetique; ta xlic jtsoboxuc loq'uel ta yantic banamil ti bu puquemoxuc batele.

³⁵ Ta xquic'oxuc jelovel ta xocol banamil ta yantic lum; te ta xcalboxuc ta asatic li amulique,

³⁶ jech chac c'u cha'al la jpasbeic te ta xocol banamil ta Egipto li amoltot ayame'ique. Vu'un chcal jtuc, vu'un li Muc'ul Diosune.

³⁷ Ta xcac' jelovanic ta yolon jvaston; ta xcac' ac'o ach'unic li c'usi chapanbil cu'une.

³⁸ Ta jloq'ues batel ta atojolic li jtoybaetique xchi'uc li boch'otic la scontrainicune. Ta jloq'uesic batel te ta yantic banamil ti bu oyic batele, pero mu'yuc ta x'ochic ta yosilal Israel, yu'un jech ac'o sna'ic ti vu'un Muc'ul Diosune.

³⁹ ‘Li vo'oxuque smomnich'nab Israel, jech chayalboxuc li Muc'ul Diose, ja' li Cajvaltique: Me mu xac'an xach'unbicun jmantale, ja' bat ich'ic o ta muc' li sloc'obaltac adiosic ti mu'yuc stu jech chac c'u cha'al c'a'epe; ja' bat tunanic o yu'un. Pero ta ts'acal chlic ach'unicun, jech mu'yuc xa chabolibtasic ta matanaletic avu'unic xchi'uc ta adiosic li jch'ulbie.

⁴⁰ Yu'un ja' te ta ch'ul vits cu'un, ta toyol vits ta yosilal Israel chlic yich'icun ta muc', chlic tunicuc cu'un scotol li smomnich'nab Israele. Ja' te chlic quiq'uic ta jtojol ta yutsil co'nton; te chlic jc'anbeic matanaletic yu'unic xchi'uc li sba c'usitic chloc' yu'unique xchi'uc li yantic c'usitic voc'bilic cu'un sventa chiyac'bicune.

⁴¹ C'alal chlic jloq'uesoxuc tal ta yantic banamile, c'alal chlic jtsoboxuc sutel tal ta yantic banamil ti bu puquemoxuc batele, xchi'uc c'alal chlic cac' ta ilel ta aventaic ta stojol yantic banamil ti vu'un Ch'ul Diosune, jun co'nton chaquic'oxuc ta yutsil co'nton jech chac c'u cha'al matanal ti lec mu yiq'ue.

⁴² ‘C'alal me la jtsoboxuc tal yan velta ta yosilal Israele, ja' li banamil ti jtoyoj jc'ob laj calbeic ta jamal amoltot ayame'ic ti chcac'beique, chlic ana'ic ti vu'un Muc'ul Diosune.

⁴³ Te chlic avotquinic li avabtelique xchi'uc scotol li c'usitic laj apasique, xchi'uc ti solel abolibtasoj abaique, jech te chlic ana'le aba atuquic ta scoj li yepal amulic laj asa'ique.

⁴⁴ C'alal chavilic ti ja' chlic jpas ta atojolic li c'usi sventa chi'ich'at o ta muq'ue, ti mu ja'uc jech ta jpasboxuc jech chac c'u cha'al li avabtelique xchi'uc ti c'u x'elan achopolilique, jech chlic ana'ic o ti vu'un Muc'ul Diosune’, uto”, xi li Muc'ul Diose.

Sc'oplal c'usi chc'ot ta pasel ta stojol Néguev

⁴⁵ La sc'opanun li Muc'ul Diose, jech laj yalbun:

⁴⁶ “Vo'ot xnich'on cristiano, ac'o batel asat ta stuq'uil sur; c'opojan batel ta scontra li toyolal te'tic ta Negueve.

⁴⁷ Jech xavalbe batel: ‘Jech chayalboxuc li Muc'ul Diose, ja' li Cajvaltique: A'yo ava'yic, ta jtsanboxuc ac'ac'alic; ta jchic' scotol li te'etic avu'unic ti lec yoxique, xchi'uc li te'etic ti taquinique. Me jutuc mu xtu'p o li sc'ac'ale; ta xc'ac' scotol li cristianoetic xlic tal ta sur c'alal to ta nortee.

⁴⁸ Jech chilic scotol cristianoetic ti vu'un la jtsanbe sc'ac'al, vu'un li Muc'ul Diosune; j'ech'el mu xtu'p o, xayutoxuc’, uto”, xiyutun.

⁴⁹ Jech la jtac'be li Muc'ul Diose: “¡Ay, Cajval Muc'ul Dios, me jech chcale, li cristianoetique xu' chiyalbicun ti ja' no'ox puru senyail chcalilane!”, xcut.