Ezequiel 2 - Bible in Tzotzil de Chenalhó with Deuterocanon

I'ic'at yu'un Dios li Ezequiele

¹ Jech laj yalbun li boch'o laj ca'ay ic'opoje: “Vo'ot xnich'on cristiano, va'lan, yu'un chajc'opanot”, xiyutun.

² C'alal la sc'opanune, ivul ta jtojol stsatsal svu'el li Diose, jech la sva'anun; laj ca'ay la sc'opanun.

³ Jech laj yalbun: “Xnich'on cristiano, ta jtacot batel ta stojol li achi'iltac ta israelale, ja' li jbajmantal cristianoetic ti ep la stoy sbaic ta jtojole. C'alal ta stot ta sme'ic la stoy sbaic ta jtojol, ja' jech tspasic o c'alal to tana li olnich'onetique.

⁴ Ja' yu'un ta jtacot batel ta stojol li jtacchiquinetique, ti toj tsots yo'ntonique. Jech xc'ot avalbe: ‘Jech chal li Muc'ul Diose, ja' li Cajvaltique’, uto.

⁵ Me xich'ic ta muc', o me mu xich'ic ta muc', mu'yuc sc'oplal. Jna'oj ti ja' jbajmantaletic oe. Ja' no'ox venta me la sna'ic ti oy jun j'alc'op te ta stojolique.

⁶ Li vo'ote xnich'on cristiano, mu me xaxi' yu'unic ti c'u x'elanique, xchi'uc ti c'u x'elan chc'opojique. Ac'o me xco'laj xchi'uc suculot ta ch'ixtic, me xco'laj xchi'uc te achi'uc puru stsequetic chava'ay, pero mu me xaxi', yu'un le'e ja' mero jtacchiquin cristianoetic o.

⁷ Albo ono'ox ya'yic li c'usi laj cale, ac'o me sc'an, me mu sc'an xa'yic, yu'un jna'oj ti ja' mero jbajmantaletic oe.

⁸ Pero li vo'ote a'yo lec ava'ay li c'usi chacalbote. Mu me xapas aba ta jbajmantal ec jech chac c'u cha'al li stuquique. Jach'o me ave, ve'an li c'usi chacac'bote”, xiyutun.

⁹ Laj quil jun c'abal bechel tal ta jtojol; te stsacoj jun balbil vun.

¹⁰ La xlich'bun jq'uel li vune; laj quil ts'ibabil lec ta xcha'jotal. Ja' te ts'ibabil sc'oplal xc'uxul vocol, oq'uel, xchi'uc avanel.