Ezequiel 19 - Bible in Tzotzil de Chenalhó with Deuterocanon

At-o'nton ta sventa jpasmantaletic ta Israel

¹ “Vo'ot Ezequiel, q'uejintao q'ueoj sventa at-o'nton ta sventa li banquilaletic ta Israele.

² Ja' jech li q'ueoj xaq'uejintae: ‘Li ame'e ja' jech chac c'u cha'al me' león, ti te chbat ta stojol li yantic leonetique; jun xch'enic ic'ot xchi'uc, te tsvoq'ues yalab.

³ Oy jcot yol lec la sts'ites; lec muc'ta león ibat yu'un. La xchan lec stsaquel sve'el; la xchan lec smilel cristianoetic noxtoc.

⁴ Ipuc batel sc'oplal ta yantic muc'tic lum, jech la syaquic ta ch'ojon; ta xotbil taq'uin la xjochic batel ta Egipto banamil.

⁵ C'alal laj yil me' león ti mu'yuc la sta li c'usi jal la smalae, laj yic' li yan jcot yole, la sts'ites lec; la sta lec scotlej yu'un.

⁶ C'alal muc'ta león xae, te xyal xmuy ta stojol li yantic leonetique. La xchan lec stsaquel sve'el; la xchan smilel cristianoetic noxtoc.

⁷ Ep c'usi isoc ta spasubmantal ajvalil yu'un; laj yac' ta yavnaijesel ep lumetic. Ixi'ic scotol jnaclumetic ta scoj ti c'u x'elan ch-avane.

⁸ Ital yich' contrainel yu'un li yajvaltac jujun banamil ti sts'aquinojan sbaic xchi'uque; la syaquic ta ch'ojon, jech i'och o ta syoquic.

⁹ La xjochic batel ta xotxot taq'uin; la stiq'uic ta xchajchajtaq'uinal; laj yiq'uic batel ta stojol ajvalil ta Babilonia. C'ot sbajic lec ta snail, yu'un jech mu me xvinaj batel ta vitsetic ta yosilal Israel ti c'alal ch-avane.

¹⁰ ‘Li ame'e ja' to'ox jech chac c'u cha'al jtec' ts'usub te ta ts'usubaltic ti ts'unbil ta nopol bevo'e, ti lec chac' sat, ti lec pim sc'obc'ob ta sventa ti oy lec ya'lele.

¹¹ Li sc'obc'obtaque lec tsotsic ibat; lec itun ta svastonic ajvaliletic. Nat ich'i ta jyalel; stuc no'ox lec xvinaj ta scoj ti toj nat ibate, xchi'uc ta scoj ti toj ep sc'obc'obe.

¹² Pero ibulat loq'uel ta sc'ac'al o'ntonal; laj yich' lomesel yalel c'alal ta banamil. Te imats' sat ta scoj li ic' chtal ta sloq'ueb c'ac'ale., Li sc'ob ti lec tsotse ic'as, itaquij, jech laj yich' chiq'uel ta c'oc'.

¹³ Li' ta orae te xa ts'unbil batel ta xocol banamil ti bu bats'i taquin, ti mu'yuc ya'lel oe.

¹⁴ Te chloc' c'oc' ta o'lol sc'obc'obtac; te chc'ac' o li sc'obc'ob xchi'uc sate, jech mu'yuc sc'ob chcom ti lec tsots sventa chtun ta svaston ajvaliletique’, xi li q'ueoj xaq'uejintae”, xiyutun. (Li'i ja' q'ueoj sventa at-o'nton; ja' ac'o tunuc o avu'unic sventa at-o'nton.)