Ezequiel 18 - Bible in Tzotzil de Chenalhó with Deuterocanon

Ta jujuntal chijcham ta scoj jmul jtuctic

¹ La sc'opanun noxtoc li Muc'ul Diose, jech laj yalbun:

² “Li achi'iltac ta israelale te chalilanic o tal li lo'il jech chac li'i: ‘C'alal tslo'ic pajal ts'usub li totiletique, ja' sijlajet stanal yeic li nich'naletique’, xiic.

³ Vu'un li Muc'ul Diosun ti cuxulun oe, vu'un li Avajvalicune, chcal ta jamal ti chlaj sc'oplal ta alel te ta Israel li lo'il le'e.

⁴ Ja' cu'un scotol li cristianoetique. Ja' cu'un li totile; ja' cu'un noxtoc li xnich'nabique. Li boch'o ta sa' smule ja' ta xcham.

⁵ Li boch'o tuc' yo'ntone, ti ja' tspas c'usi lec, c'usi tuc' ta pasele,

⁶ ti mu'yuc chbat sve'be smoton li sdiosic ta jol vitsetique, ti muc xac' sat ta stojol li sloc'obaltac sdios Israele, ti mu'yuc chuts'intabe yajnil xchi'ile, ti mu'yuc chchi'in jun ants c'alal ja'o chil xchamele;

⁷ xchi'uc ti mu'yuc boch'o chuts'intae, xchi'uc ti tsutesbe prentail li j'iluvil yu'une, ti mu'yuc ch-elc'aje, ti chac'be sve'el li boch'o chvi'naje, xchi'uc ti chac'be sc'u' li boch'o mu'yuc sc'u'e,

⁸ ti mu'yuc tsc'an sjol staq'uine, ti mu'yuc chch'ambe svocaroile, ti mu'yuc chac' sc'ob ta sventa li c'usi chopole, xchi'uc ti tuc' chchapan c'alal oy chib viniquetic tscontrain sbaique;

⁹ ti ja' no'ox tspas o li c'usitic caloje, ti jun yo'nton chch'un li mantaletic cu'une, le'e ja' tuc' yo'nton, mu'yuc smul, ja' ta xcuxi.

¹⁰ “Pero me oy jun xnich'on ti ja' j'elec', jmilvanej, ti tspas jech chac c'u cha'al laj yich' alele,

¹¹ ti mu ja'uc tspas jech chac c'u cha'al tspas li stote, ti tsve'be smoton sdiosic ta jol vitsetique, ti chuts'intabe yajnil xchi'ile,

¹² ti abul sba yu'un li me'onetic xchi'uc li boch'otic abul sbaique, ti ch-elc'aje, ti mu sutes li prentail yich'oje, ti ja' te chac' sat ta stojol li sloc'obal yantic diosetique, ti ja' tspas li c'usitic toj chopole,

¹³ ti tsc'anbe sjol staq'uin xchi'uc ti chch'ambe svocaroile, ¿me xu' chcuxi le'e? Mu xu'. Ta sventa ti ja' tspas li c'usitic toj chopol chquile, ta persa ta xcham; te chcuch o batel smul stuc.

¹⁴ “Pero me oy xnich'on ti mu sa' smule, ti mu xchan jech chac c'u cha'al laj yil tspas li stote,

¹⁵ ti mu xve' ta jol vitsetique, ti mu xac' sat ta tojol li sloc'obal yantic diosetic te ta Israele, ti mu xuts'intabe yajnil xchi'ile,

¹⁶ ti mu'yuc boch'o abul sba yu'une, ti mu teuc chich' o comel li prentaile, ti mu x'elc'aje, ti chac'be sve'el li boch'o chvi'naje, ti chac'be sc'u' li boch'o mu'yuc sc'u'e,

¹⁷ ti mu'yuc bu tslo'la li me'one, ti mu'yuc tsc'anbe sjol staq'uine, ti mu'yuc chch'ambe svocaroile, ti ja' chch'un li jmantaltaque, ti ja' tspas li c'usitic caloje, le'e mu'yuc chcham ta scoj smul li stote; ta jbel sc'oplal ta xcuxi.

¹⁸ “Yan li stot ti ja' j'uts'intavaneje, ti ja' j'eleq'ue, ti chopol c'usi tspas ta stojol xchi'iltaque, le'e ta xcham ta scoj smul stuc.

¹⁹ Pero me jech chavalic li vo'oxuque: ‘¿C'u yu'un mu'yuc chcuchbe smul stot li nich'onile?’, me xachiique, yu'un li nich'onile ja' la spas li c'usi lec, li c'usi tuq'ue. Ja' la xch'un li jmantaltaque; ja' la spas li c'usitic caloje. Ja' yu'un ta jbel sc'oplal ta xcuxi.

²⁰ Li boch'o ta sa' smule ja' no'ox ta xcham. Li nich'onile mu xu' ta xcuchbe smul li stote, jech ec li totile mu xu' ta xcuchbe smul li xnich'one. Li boch'o tuc' c'usi tspase ja' yu'un stuc; li boch'o chopol c'usi tspase ja' yu'un stuc noxtoc.

Toj tuc' c'u x'elan ch-abtej stuc li Diose

²¹ “Pero me chlic scomtsan scotol smul li boch'o chopole, me ja' chlic xch'un li mantaletic cu'une, me ja' chlic spas li c'usitic lec, li c'usitic tuq'ue, ta jbel sc'oplal ta xcuxi; mu'yuc ta xcham.

²² Scotol li c'usitic chopol la spase mu'yuc xa ta xich' t'abbel o. Ta sventa ti ja' la spas li c'usi tuq'ue jech ta xcuxi.

²³ ¿Me yu'un ja' xcuxet co'nton me ch'ayel chbat li jpasmulile? ¿Me mu ja'uc xcuxet co'nton me tscomtsan li c'usitic chopol yu'un jech xu' chcuxie?

²⁴ “Pero, me ja' tscomtsan spasel c'usitic tuc' li boch'o tuc' yo'ntone, me ja' chlic spas c'usitic chopole, me ja' chlic spas c'usitic toj chopolic jech chac c'u cha'al tspas li jpasmulile ¿me xu' chcuxi ti jech tspase? Scotol li c'usitic tuc' la spase mu'yuc tsacbil ta venta chc'ot junuc. Ta sventa ti ja' la spas c'usi chopol ta scoj stoyobbaile, jech ta scoj smul stuc ta xcham.

²⁵ Pero me jech chavalic li vo'oxuque: ‘Muc tuq'uil beuc yich'oj li Cajvaltique’, me xachiique, a'yo lec ava'yic israeletic. ¿Me vu'un mu'yuc tuc' li be jtamoje? ¿Me muc vo'ocoxuc ti bats'i xotxot li be atamojique?

²⁶ Me ja' tscomtsan spasel c'usi tuc' li boch'o tuc' yo'ntone, me ja' chlic spas c'usi chopole, ta xcham ta scoj ti chopol c'usi tspase.

²⁷ Yan me ja' chlic scomtsan c'usi chopol tspas li boch'o chopole, me ja' chlic spas li c'usi lec, li c'usi tuq'ue, ja' ta xcuxi.

²⁸ Yu'un ijam sat, laj yotquin li c'usitic chopol tspase, jech la scomtsan, ja' yu'un ta jbel sc'oplal chcuxi; muc ch'ayeluc ta xbat.

²⁹ “Pero li smomnich'nab Israele jech chalic: ‘Mu'yuc tuc' be stamoj li Cajvaltique’, xiic. ¿Me ta melel vu'un ti mu'yuc tuc' be jtamoje israeletic? Ta jbel sc'oplal chacalboxuc ta jamal ti vo'oxuc mu'yuc tuc' li be atamojique.

³⁰ Ja' yu'un a'yo ava'yic smomnich'nab Israel, ta jchapanoxuc ta jujuntal ta sventa ti c'u x'elan avabtelique. Vu'un chcal jtuc, vu'un li Muc'ul Diosune. Ja' lec suteso avo'ntonic, comtsanic li c'usi chopol chapasique, yu'un jech mu me ta scojuc achopolil jujunoxuc ti chayavnaijic oe.

³¹ Jipic comel scotol li achopolilic, li amulic asa'ojic ta jtojole. Pasic ta ach' li ajol avo'ntonique. ¿C'u yu'un ti te no'ox avabinoj aba chachamique, israeletic?

³² Li vu'une mu jc'an ti oy boch'o chchame; ja' lec suteso avo'ntonic cha'e, jech chacuxiic”, xi li Muc'ul Diose.