Ezequiel 17 - Bible in Tzotzil de Chenalhó with Deuterocanon

Lo'il c'op sventa xic xchi'uc jpets ts'usub

¹ La sc'opanun li Muc'ul Diose, jech laj yalbun:

² “Xnich'on cristiano, alo junuc lo'il; loc'tabo ta lo'il c'u x'elanic li smomnich'nab Israele,

³ jech xavalbe: ‘Jech chal li Muc'ul Diose: Oy jun muc'ta xic ic'ot ta Líbano, lec muc'tic xic', xchi'uc lec natic, lec pim, xchi'uc ep ta cap sc'uc'umal; la sc'ocbe batel sni' li ch'ut te'e.

⁴ Li sni' la sc'oc batele la slic batel ta yosilal jmanulajel jchonolajeletic; te c'ot sts'un ta slumal li jchonolajeletique.

⁵ La stsac batel jbej sbec' ts'unubil te ta banamil noxtoc; laj yich' batel ta yan banamil. Te la smuc comel ta ti' uc'um; la sts'un comel jech chac c'u cha'al sauce-te'.

⁶ Jech ich'i, ic'ot ta jpets ts'usub, lec pim sc'obc'ob. Comcom no'ox ibat, pero li sc'obc'obe te laj yac' sbaic batel ta stuq'uil li xique; li yibele tuc' ich'iic yalel. Lec jpets ts'usub ic'ot, laj yac' lec sq'uelum; laj yac' lec sc'obc'ob.

⁷ Pero oy yan muc'ta xic noxtoc, lec muc'tic xic', xchi'uc lec pim sc'uc'umal. Li ts'usube ja' te laj yac' batel yibel, xchi'uc ja' te laj yac' batel sc'obc'ob ta stuq'uil li xique yu'un tsc'an ac'o at'esatuc batel ta nom ti bu to teq'uele.

⁸ Pero li ts'usube ts'unbil ono'ox ta lequil banamil, ts'unbil lec ta ti' uc'um yo' bu xu' chac' lec sc'obc'ob xchi'uc sate xchi'uc ti xu' chc'ot lec ta jpets ts'usub ti lec c'upil sbae, xi li Diose’, uto.

⁹ “Jech xavalbe ya'yic noxtoc: ‘Jech chal li Muc'ul Diose: Li ts'usub le'e mu'yuc lec chbat o; ta xich' bulel loq'uel yu'un li yan xic ta ba'yuque, ta xlilinbat li sate. Mu persauc ep yajval tsc'an; mu persauc tsots slomoal tsc'an ti c'alal chich' bulel loq'uel c'alal ta yibele, jech ta xtaquij o li sc'obc'obe.

¹⁰ Ac'o me chich' to cha'ts'unel, pero mu xa xq'uelumaj o. Ta xtaquijesat o yu'un li ic' chtal ta sloq'ueb c'ac'ale, jech ta xtaquij o te ta banamil ti bu sc'oplal xu' chq'uelumaje’, uto”, xiyutun.

¹¹ Li Muc'ul Diose la sc'opanun yan velta, jech laj yalbun:

¹² “Jech xavalbe ya'yic li jbajmantal cristianoetic le'e: ‘¿Me xana'ic c'usi smelol li lo'il le'e? A'yo ava'yic, li ajvalil ta Babiloniae i'ay li' ta Jerusalén, la xchuc batel li ajvalil xchi'uc li banquilaletic avu'unique; laj yic' batel ta Babilonia.

¹³ Jech noxtoc laj yic'be batel jun smomnich'on li ajvalil ti sc'oplal ja' ch-och ta xq'uexole; oy c'usi la xchapan xchi'uc. Laj yac'be yal ta jtojol ti tspas li c'usi la xchapan xchi'uque. Co'ol laj yic' batel xchi'uc li boch'otic ich'bilic ta muc' te ta lume,

¹⁴ yu'un jech ac'o bic'tajuc o sc'oplal li Judae, jech mu xa xlic spas mantal yan velta. Me ta xch'un li c'usi laj yich' chapanele, lec to va'al chcom.

¹⁵ Pero li ajvalil avu'unique la stoy sba ta stojol li ajvalil ta Babiloniae. La stac batel svinictac ta Egipto, yu'un ac'o ac'batuc tal epal ca'etic xchi'uc epal viniquetic. ¿Me lec chbat o ti jech la spase? ¿Me chcol o jech? ¿Me xu' chcol li boch'o la soques c'usi chapanbile?

¹⁶ Vu'un ti cuxulun oe, jamal chcal ti te chcham o ta Babilonia banamile, yu'un muc spas li c'usi laj yal ta jamal ta jtojole, xchi'uc muc xc'ot ta pasel yu'un c'usi la xchapan xchi'uc li ajvalil ti ja' itic'at ta ajvalilal yu'une.

¹⁷ C'alal chbat stsac ta pleito lum Jerusalén li ajvalil ta Babiloniae, c'alal tspas stec'ubic xchi'uc sq'uelub osilic ta sjoyobal lum Jerusalén sventa tsmilic ep cristianoetique, li ajvalil ta Egiptoe mu'yuc bu tstac tal epal soldadoetic yu'un, mu'yuc c'usi tspas o sventa tscolta.

¹⁸ Yu'un mu'yuc tsots sc'oplal laj ya'ay li c'usi laj yal ta jamal ta jtojole. Muc xch'un li c'usi chapanbile; altic laj yal ye ti tspase. Ta sventa ti jech la spase, mu'yuc xa xpoxil o.

¹⁹ ‘Ja' yu'un jech chcal ta jbi jtuc, vu'un li Cuxul Diosune, vu'un li Avajvalicune: Ta sventa ti la sbaj li c'usi laj yal ta jtojole, xchi'uc ti muc spas li c'usi la xchapanique, ta xcac'be xcuch o stuc.

²⁰ Ta jyac ta jch'ojon, jech chucul chcom o. Ta xquic' batel ta Babilonia; te ta xlic cac'be stoj ta sventa ti muc tuc'uc yo'nton ta jtojole.

²¹ Li yajsoldadotac ti lec xu' yu'unique chmilatic ta espada scotol. Li boch'otic cuxul to chcomique ta spuc sbaic batel ta xchanjotal xchiquin banamil, jech chlic ana'ic o ti vu'un Muc'ul Diosune.

²² ‘Vu'un li Muc'ul Diosune, ta xlic jc'ocbe tal sni' ec li ch'ut te' ti lec toyol oye, ta jecbe tal jecuc li sc'ob ta toyole; vu'un jtuc ta xvul jts'un ta jun lequil toyol vits.

²³ Te ta xvul jts'un ta jun toyol vits ta yosilal Israel. Lec toyolic chbat sc'obc'ob; lec chac' sat, ven lequil muc'ta ch'ut te' ta xc'ot. Te chtal xcux yo'ntonic ta yolon scotol c'usiuc no'ox mutal; te chnaquiic ta xyaxinal.

²⁴ Jech chlic sna'ic scotol te'etic ti vu'un ta jbic'tajes scotol li yantic muc'tic te'etique, ti vu'un ta jnatubtas li te' ti peq'uelique. Vu'un ta xcac' taquijuc li te'etic ti lec yoxique, xchi'uc vu'un la jyaxubtas lec li te' ti taquijemique. Vu'un chcal jtuc, vu'un li Muc'ul Diosune; ta persa jech ta jpas’, uto”, xi li Diose.