Ezequiel 16 - Bible in Tzotzil de Chenalhó with Deuterocanon

Xco'laj xchi'uc jmulavil ants c'otem li lum Jerusalene

¹ La sc'opanun li Muc'ul Diose, jech laj yalbun:

² “Xnich'on cristiano, ac'bo yil Jerusalén ti toj ven chopol c'usitic tspase;

³ jech xavalbe: ‘Jech chal li Muc'ul Diose: Vo'ot Jerusalén, li aliquebe xchi'uc ti bu lavoq'ue ja' li Canaán banamile. Li atote ja' amorreo vinic; li ame'e ja' hitita ants.

⁴ C'alal lavoq'ue, mu'yuc bu la sc'ocboxuc abiquil; mu'yuc bu laj yatintasoxuc; mu'yuc la xjaxboxuc ats'am; mu'yuc la xpixoxuc ta poc'.

⁵ Mu'yuc boch'o i'abulaj la smeltsanot lec; mu'yuc boch'o la xc'uxubinot. Ja' no'ox ti c'alal lavoq'ue, lavich' jipel batel ta osilaltic, yu'un la sbajoxuc.

⁶ C'alal lijelov ta ats'ele, laj quil ti te bonolot ta ach'ich'ale. C'alal laj quil ti te bonolot ta ach'ich'ale, jech laj calbot: ¡Cuxian! xacutot. Ta melel laj calbot ac'o cuxian ti c'alal laj quil te bonolot o ta ach'ich'ale.

⁷ Laj cac' ch'ian jech chac c'u cha'al ts'i'laletic ta banamil. Jech lach'i, lec muc' labat. Lec c'ac'al ants labat. Lec ich'i li achu'e xchi'uc li stsotsil ajole. Pero solel jeche' t'analot.

⁸ ‘Ts'acal lijelov yan velta ta ats'el, la jq'uelot; laj quil ti ja' xa yorail chamalije. Te lic jlambot jnatil c'u', la jmacot lec. Te lic jam que ta atojol, lic jchaptic ti chacu'uninot o, vu'un li Muc'ul Diosune.

⁹ Jech te lic jpocot lec ta vo'; la jpoc loq'uel li ach'ich'ale, la jaxbot lec aceite.

¹⁰ Laj cac'bot lec luchtabil ac'u'; laj cac'bot lec axonob pasbil ta lequil nucul. Laj cac'bot lec achuc pasbil ta lino no; la jpixot lec ta lequil poc'.

¹¹ Laj cac'bot lec at'ujumal; laj cac'bot lec xoj ste'el ac'ob, laj cac'bot lec anats'.

¹² Laj cac'bot lec staq'uinal ani', xchi'uc lequic staq'uinal achiquin, xchi'uc lec c'upil sba snet' ajol.

¹³ La jt'ujumtasot lec ta c'anal taq'uin xchi'uc ta saquil taq'uinetic. Li ac'u' apoq'ue pasbilic ta lequil lino no xchi'uc ta lequil poc' lec luchtabil. Ja' laj ave' lequil pan pasbil ta lequil arina, xchi'uc pom xchi'uc aceite. Jech toj c'upil aba lac'ot ta jyalel; xco'laj xa xchi'uc me' ajvalil lac'ot o.

¹⁴ Jech ipuc batel ac'oplal ta yantic banamil ti toj c'upil abae, yu'un bats'i jun avutsil lac'ot ta sventa li jt'ujumal laj cac'bot, vu'un li Muc'ul Diosune.

¹⁵ ‘Pero laj atoy aba achi'uc li alequile; lamulivaj ta sventa ti ipuc batel ac'oplale. Laj avac'be abec'tal scotol li boch'otic te ijelovique, laj to'ox yu'uninicot.

¹⁶ Laj atunes ac'u' apoc' sventa laj apasbe snail c'opojebaletic ta toyol vitsetic, jech te lic apas mulil achi'uc. Li c'usi laj apase mu xu' jech chc'ot ta pasel o; mu'yuc xa jech chapas yan velta.

¹⁷ Jech noxtoc li at'ujumal laj cac'bote, ja' li c'anal taq'uin xchi'uc li saquil taq'uine, ja' lic atunes sventa laj apasbe sloc'obal viniquetic; te lic mulivajan achi'uc.

¹⁸ Ja' laj avac'be slap li ac'u' ti ep ta chop c'u x'elan luchtabile. Li aceite xchi'uc pom cu'une ja' laj avac'be smotonin scotol.

¹⁹ Jech noxtoc ja' laj avac'be li pan ti vu'un laj cac'bot sventa chamac'lin aba oe, ja' ti pasbilic ta lequil arina, ta aceite, xchi'uc li spom muc'ta pome. Ja' laj avac'be smotonin, yu'un jech lec mu yic' ic'ot ta stojol. Vu'un chcal jtuc ti jech laj apase.

²⁰ ‘Jech noxtoc laj achic'be smotonin li jquerem jtsebtic laj avoq'uese; ja' sve'elic ic'ot avu'un. ¿Me jutuc no'ox mulil laj apas

²¹ ti laj ac'ocbe snuc' jnich'nab sventa laj avac'be smotonin li yan diosetic avu'un jech chac c'u cha'al li matanal ti chc'ac' scotole?

²² Ta scoj ti toj ech'em laj apas mulile, mu xa xana' c'u to'ox xa'elan ti c'alal atsebal to'oxe, ti c'alal t'analot, xchi'uc ti c'alal bonolot to'ox ta ach'ich'ale.

²³ Jech chcal vu'un li Muc'ul Diosune: ¡Ay, toj abul aba ta jyalel! Ma'uc no'ox laj apas scotol li c'usi toj chopol le'e;

²⁴ lic apas toyol c'opojebaletic ta cuxub o'ntonal ta yut lumetic sventa te chamulivaj.

²⁵ Ta jujun be ta yochebal lumetic laj apas toyol c'opojebaletic; laj abolibtas ta jyalel li at'ujumale. Laj avac' aba ta stojol li boch'otic te ijelovique; bats'i epal mulil laj apas ta jyalel.

²⁶ Lamulivaj achi'uc li egiptoetic ti ats'aquinoj aba achi'uque, ja' ti lec muc'tic sbec'talique, ti mu sna' x'ech' yo'ntonique. Solel laj avepajes li amule, yu'un jech ac'o licuc sc'ac'al co'nton avu'un.

²⁷ Ja' yu'un laj cac' jc'ob ta atojol; la jtsulbot li ave'ele. Ja' laj cac'ot ta sc'ob li bic'tal lumetic yu'un filistaetic ti sbajojot ta scoj ti i'ech' yo'ntonic yu'un li atalel ti toj q'uexlal sbae.

²⁸ Pero muc ono'ox sta avo'nton o. Lamulivaj achi'uc noxtoc li asiriaetique, pero muc sta avo'nton noxtoc.

²⁹ Solel laj anojes ta mulil li yosilal caldeaetic ti lec sna' xmanulajic xchonolajique, pero muc ono'ox x'ech' avo'nton o.

³⁰ Solel talbat no'ox avo'nton ta jtojol, yu'un mu'yuc q'uexlal laj ava'ay spasel c'usi toj chopol jech chac c'u cha'al jun jmulavil ants ti solel mu xq'uexove.

³¹ Xchi'uc laj apas toyol c'opojebaletic ta jujun be; ta yochebal lumetic xchi'uc ta cuxub o'ntonal ta yut lumetic te lic mulivajan o. Pero muc xa no'ox ja'uc jech xapas noxtoc jech chac c'u cha'al tspas li jmulavil antse, yu'un li vo'ote solel muc xac'an atojol.

³² Ja' jech laj apas jech chac c'u cha'al jun ants oy smalal ti chac' sba ta yan vinique.

³³ Li jmulavil antsetique chtojatic ti c'alal chac' sbaic ta c'upinele, pero li vo'ote muc jechuc laj apas. Vo'ot laj atoj li boch'otic chac'an chac'upine; laj avac'be smoton yu'un jech ac'o talicuc ta atojol scotol ta buyuc no'ox.

³⁴ Li mulivajel chapas ta jtojole mu co'oluc jech chac c'u cha'al tspas li yantic antsetique. Muc yu'unuc vo'ot chtal avich' sa'el; vo'ot atuc chasa'van xchi'uc chatojvan. Ja' yu'un toj yan o atalel li vo'ote.

³⁵ ‘Ja' yu'un jmulavil ants, a'yo ava'ay c'usi chcal, vu'un li Muc'ul Diosune.

³⁶ Jech chacalbot, vu'un li Avajvalune: Ta sventa ti laj avac' aba ta ilel, ti laj avac' aba ta q'uexlal yu'un li ac'upil vinictaque xchi'uc li sloc'obal diosetic avu'un ti toj chopolique, xchi'uc ta sventa ti laj amalbe xch'ich'al li avalab ti laj avac'be smotonine,

³⁷ ja' yu'un chacalbot ava'ay: Ta jtsob tal scotol li boch'otic laj ac'upin aba achi'uque, ti lec laj ac'ane, xchi'uc ta jtsob tal noxtoc li boch'otic laj abaje. Li' setel chvulic ta atojol; ta xacac'ot ta ilel ta stojol, ta jt'ananot lec ta satilal yu'un ac'o yilic c'u xa'elan.

³⁸ Vu'un ta jchapanot ta mantaletic sventa jmulavil antsetic, xchi'uc ta sventa li boch'o chmilvanique. Chacac'bot atoj ta ach'ich'al, ta sc'ac'al co'nton, xchi'uc ta yit'ixal co'nton.

³⁹ Chacac'ot ta sc'obic li ac'upil vinictaque; ta svuq'uesic scotol li toyol c'opojebaletic xchi'uc ti bu chavac' aba ta stojol li yantic diosetique. Ta sloq'uic scotol li ac'u' apoq'ue xchi'uc scotol li c'usitic c'upilic sba laj cac'bot sventa at'ujumale; solel jeche' cuxul t'anal chascomtsanoxuc.

⁴⁰ Ta xcac' taluc ta atojol epal viniquetic, ta xtal yac'bicot ton; biq'uitic chaslilinoxuc ta espada.

⁴¹ Ta xchiq'uic ta c'oc' li anae; ta stojol scotol antsetic chaq'uic atoj li amule. Ja' to jech chcom avu'un o li mulivajele, jech mu'yuc xa chlic atoj ta taq'uin li ac'upil vinictaque.

⁴² Jech ta xlaj sc'ac'al co'nton ta atojol; jech ta xlaj sbic'tal co'nton ta atojol; jech ta jcux co'nton, mu'yuc xa chi'ilin.

⁴³ Ta sventa ti muc xanop jutuc c'u xa'elan ta atsebale, ti ja' no'ox laj asa'bun sc'ac'al co'nton ta sventa scotol li c'usitic toj chopolic laj apase; ja' yu'un chacac'bot atoj ec li c'usitic laj apase. Yu'un muc xanop to jutuc ti toj chopol li c'usitic laj apase. Vu'un chcal jtuc, vu'un li Muc'ul Diosune.

⁴⁴ ‘A'yo ava'ay, oy jun lo'il jech chich' alel ta aventa: Le'e ja' jloc'me', xiic.

⁴⁵ Vo'ot yolot li me'il ti laj yicta smalal xchi'uc yalabtaque. Jech noxtoc li avixubtaque laj yictaic smalalic xchi'uc yalabtaquic ec. Li ame'ic acotolique ja' hitita ants; li atotique ja' amorreo vinic.

⁴⁶ Li sba avixe ja' li Samaria te oy ta stuq'uil nortee xchi'uc scotol li yalabtaque; li muquil avixe ja' li Sodoma te oy ta stuq'uil sure xchi'uc scotol li yalabtaque.

⁴⁷ Ja' laj achanbe li stalelique; laj apasbe li xchopol abtelique. Pero muc ta'louc o xava'ay ti jech laj apase; vo'ot ech'em chopol laj apas ta jyalel.

⁴⁸ Vu'un li Muc'ul Diosune, jamal chacalbot ava'ay: Li avix Sodoma xchi'uc li yalabtaque mu'yuc bu la spasic jech chac c'u cha'al chapasic achi'uc avalabtac li vo'ote.

⁴⁹ Li avix Sodoma xchi'uc li yalabtac ta spat xocone ja' jech li smul la sa'e: Jtoyba, epal ve'lil oy yu'un, xcuxet no'ox yo'nton ta sventa ti ep c'usitic oy yu'une, pero mu'yuc la xc'uxubin li me'onetique xchi'uc li boch'otic oy svocolique.

⁵⁰ Solel inoj ta yo'ntonic li toybae; lic spasic scotol li c'usitic toj chopol chquile. Jech laj cules o, jech chac c'u cha'al chavil ta asatique.

⁵¹ Li Samariae me ja'uc o'lol muc sta jech yepal smul jech chac c'u cha'al li amul laj asa'e. Vo'ot toj ech'em ijelov avu'un li c'usi toj chopol laj apase; ja' mu'yuc xa tsots smul icom avu'un ta q'uelel li avixe.

⁵² Ja' yu'un vo'ot chacuchbe scotol li xq'uexlale, yu'un vo'ot toj ech'em chopol li c'usi laj apase; ja' mu'yuc xa tsots smul icom avu'un ta q'uelel li avixe. Ja' yu'un vo'ot chacuch scotol; q'uexovan ava'ay, mu'yuc atu chacom o, yu'un vo'ot laj amacbe smul li avixe.

⁵³ ‘Vu'un ta xcac' staic yan velta c'u ono'ox x'elan oyic li Sodoma xchi'uc yalabtaque xchi'uc li Samaria xchi'uc yalabtaque. Jech ec li vo'ote ta xcac'bot sutel scotol ti c'u ono'ox xa'elan yilojique.

⁵⁴ Pero ta persa ono'ox chavich' q'uexlal ba'yuc; mu'yuc atu chacom ta sventa li c'usi laj apase. Jech chmuq'uib yo'ntonic ta aventa ti c'alal chilic chavich' vocol eq'ue.

⁵⁵ Li avix Sodoma xchi'uc Samaria xchi'uc yalabtaquique ta staic ti c'u ono'ox x'elanic ta ba'yuque. Jech ec li vo'ot xchi'uc avalabtaque chlic ataic ti c'u ono'ox xa'elanic ta ba'yuque.

⁵⁶ Li vo'ote laj to'ox ana'le li avix Sodoma ti c'alal atuc to'ox xava'ay abae,

⁵⁷ ti c'alal mu'yuc to'ox chvinaj li amule. Pero li' ta orae vo'ot xa chavich' na'leel yu'un ec li Siria xchi'uc filistaetique xchi'uc li yalabtaquique. Mu'yuc xa atu chayilicot li apat axocone.

⁵⁸ Ja' yu'un paso ava'ay c'u x'elan stojol li abol abtele xchi'uc li c'usitic toj chopol laj apase. Vu'un chcal jtuc, vu'un li Muc'ul Diosune.

⁵⁹ ‘Vu'un li Muc'ul Diosune jech chcal: Ta xcac'bot atoj li c'usi laj apase, yu'un muc xapas li c'usi laj aval ta jtojole; muc xach'un li c'usi chapanbile.

⁶⁰ Li vu'une t'abal ta co'nton li c'usi jchapanoj ono'ox ta atsebale, xchi'uc ti oy c'usi ach' ta jchapan sventa sbatel osile.

⁶¹ Chcac' c'otuc ta avalab li vixil avix xchi'uc li muquil avixe, ac'o me mu jechuc chal li c'usi jchapanoje. C'alal jech chc'ot ta pasele, te chlic avotquin li atalele; chlic q'uexovan yu'un.

⁶² Ta sventa ti j'ech'el chcac' c'otuc o ta pasel ta atojol li c'usi jchapanoje, jech chlic ana' ti vu'un Muc'ul Diosune.

⁶³ Jech chlic vuluc ta avo'nton, chlic q'uexovan, chlic macuc ave ta scoj q'uexlal c'alal chavil ti ta jpasbot perdón scotol li c'usi chopol laj apase’, uto”, xi li Muc'ul Diose.