Ezequiel 15 - Bible in Tzotzil de Chenalhó with Deuterocanon

Li israeletique ja' jechic jech chac c'u cha'al jtec' ts'usub ti mu'yuc stue

¹ La sc'opanun li Muc'ul Diose, jech laj yalbun:

² “Xnich'on cristiano, ¿me tsots stu li yaq'uil ts'usub jech chac c'u cha'al yantic te'etique? ¿Me oy c'usi stu li sc'obc'ob jech chac c'u cha'al sc'obc'ob yantic te'etique?

³ ¿Me oy chich' tunesbel yaq'uil sventa oy c'usi chich' pasel o? ¿Me oy chich' tunesbel sc'ob sventa oy c'usi chich' joc'anel o?

⁴ Ja' no'ox stu sventa chich' chiq'uel ta c'oc', jech te chc'ac' o. Me laj xa'ox stsac c'oc' xcha'jotal sni'e, ta xc'ac' o batel c'alal ta o'lol. ¿C'usi to stu c'alal me c'aq'uem xa'oxe?

⁵ Yu'un c'alal lec to'ox oye, mu'yuc ono'ox c'usi chtun o, buuc xa, me c'aq'uem xa ta c'oq'ue, ¿c'usi to chtun o?

⁶ Ja' yu'un jech chcal vu'un li Muc'ul Diosune, vu'un li Avajvalicune: Jech chac c'u cha'al li te'el ts'usub ti ja' no'ox stu sventa chich' chiq'uel ta c'oq'ue, ja' no'ox jech ta jpasbeic ec li jnaclumetic ta Jerusalene.

⁷ Vu'un ta jcontrainic. Ac'o me chcolic to loq'uel ta c'oc', pero ta ono'ox xc'aq'uic ta yan c'oc' noxtoc. C'alal ta xlic jcontrainique, ja' to te chlic sna'ic o ti vu'un Muc'ul Diosune.

⁸ Ta jyavnaijesbeic o li yosilalique, yu'un mu junuc yo'ntonic ta jtojol”, xi li Muc'ul Diose, ja' li Cajvaltique.