Ezequiel 14 - Bible in Tzotzil de Chenalhó with Deuterocanon

Scontrainel boch'otic chich'ic ta muc' c'usitic cuybil ta diosetic

¹ Te italic ta jtojol jayibuc moletic ta Israel; te vul chotiicuc ta jtojol.

² Ta ora te ivul ta jtojol sc'op li Muc'ul Diose, jech laj yalbun:

³ “Xnich'on cristiano, li viniquetic li' oyique, ja' li boch'otic batem yo'ntonic o ta stojol li sloc'obal sdiosique, xchi'uc ti ja' laj yac' yo'ntonic o snopel li c'usi sventa chyalic o ta lum yu'une, ¿me yu'un chcac' ti chisjac'bicun li c'usi tsc'anique?

⁴ Jech xavalbe ya'yic: ‘Jech chal li Muc'ul Diose, ja' li Cajvaltique: Boch'ouc no'ox te ta Israel ti ja' batem yo'nton yich'el ta muc' li c'usitic cuybil ta diosetique, ti ja' yac'oj yo'nton ta snopel li c'usi chyalic o ta lum xchi'uquique, me chtal sjac' ta stojol j'alc'op cu'un li c'usi tsc'an tsna'ique, ja' no'ox chcalbe ta jamal ti ja' jech yepal chcac'be stojol jech chac c'u cha'al yepal sloc'obal sdiostaque.

⁵ Yu'un jech xu' ta jtijbe yo'ntonic li smomnich'nab Israel ti scomtsanojicun ta scoj li sloc'obal sdiosic yich'ojic ta muq'ue’, xi li Diose, uto.

⁶ “Jech xavalbe scotol li ateclumale: ‘Jech chal li Muc'ul Diose, ja' li Cajvaltique: Sutanic tal ta jtojol. Voc'o abaic ta stojol li c'usitic mu'yuc stu jech chac c'u cha'al c'a'epe. Jipic comel ta avo'ntonic li c'usitic toj chopol chapasique’, uto.

⁷ ‘Me oy junuc achi'ilic ta israelal, o me yanlum ti te nacal ta atojolique, me chlic svoc' sbaic ta jtojol, me ja' chbat yich'ic ta muc' li c'usitic mu'yuc stu jech chac c'u cha'al c'a'epe, me ja' chac' yo'ntonic o snopel li c'usi sventa chyalic o ta lum xchi'uquique, me ts'acal chtalic ta stojol j'alc'op yu'un oy c'usi chisjac'bicune, vu'un jtuc ta jtac'be, vu'un li Muc'ul Diosune.

⁸ Ta jva'lebin jba jchi'uc li vinique; ta xcac' comuc ta sventa senyail, xchi'uc ta ya'yej slo'il cristianoetic. Ta jts'et o loq'uel te ta stojol li jteclumale, yu'un jech tsna'ic o ti vu'un Muc'ul Diosune, xi li Diose’, uto.

⁹ “Me oy jun j'alc'op chlaj ta lo'lael ti chal c'usi mu meleluque, yu'un vu'un jtuc la jlo'la li j'alc'op le'e, ts'acal chcac'be stoj; ta xcules o ta stojol li jteclumal Israele.

¹⁰ Xchibalic ta stoj smulic ta scoj xchopolilic; tstoj smul li j'alc'ope xchi'uc li boch'o oy c'usi tsjaq'ue,

¹¹ yu'un jech mu teuc ta xch'ayilanic o ta be li smomnich'nab Israele, xchi'uc jech mu teuc tsbolibtas sbaic o ta scoj li smulique. Jech ja' jteclumal chc'otic o, vu'un Diosun yu'unic chic'ot”, xi li Muc'ul Diose, ja' li Cajvaltique.

Chich' stojol smul li lum Jerusalene

¹² La sc'opanun yan velta li Muc'ul Diose, jech laj yalbun:

¹³ “Vo'ot xnich'on cristiano, me oy jun banamil tsa' smul ta jtojol, me solel ja' tspas o li c'usi tsc'an yo'ntone, ta xcac' jc'ob ta stojol; ta xculesbe scotol li ve'lil oy yu'une; ta jtacbe tal tsots vi'nal; ta jmilbe scotol li yajvaltaque xchi'uc li chonbolometic yu'une.

¹⁴ Ti ja'uc te nacajtic li Noé, li Daniel, xchi'uc li Jobe, ja' no'ox ta jcolta li oxibic le'e, yu'un tuc' yo'ntonic ta jtojol. Vu'un chcal jtuc, vu'un li Muc'ul Diosune.

¹⁵ “Me ta jtac batel jti'val chonbolometic ta junuc banamil yu'un ac'o bat yulesic scotol li jnaclumetique, me solel xch'ijan chcom yu'unique, me mu'yuc xa boch'o te chjelov o ta scoj li chonbolometique,

¹⁶ ac'o me te nacalic li oxib viniquetic le'e, jamal chcal vu'un li Muc'ul Diosune, mu xu' yu'un tscolta li xnich'nabique; ja' no'ox stuc chcolic li oxibique. Li banamile xch'ijan chcom o.

¹⁷ “Jech noxtoc me ta jtac batel muc'ta pleito ta banamil le'e, me ta xcal mantal ti ac'o yich'ic milel scotol li jnaclumetique xchi'uc li chonbolometique,

¹⁸ ac'o me te nacajtic li oxib viniquetique, mu xu' yu'un tscolta li xnich'nabique; ja' no'ox stuc chcolic, vu'un chcal jtuc vu'un li Muc'ul Diosune.

¹⁹ Jech noxtoc me ta jtac batel tsots chamel ta banamil le'e, me chcal mantal ti ac'o chamicuc ta sc'ac'al co'nton li cristianoetic xchi'uc li chonbolometique,

²⁰ ac'o me te nacalic li Noé, li Daniel, xchi'uc li Jobe, chcal ta jamal ti mu xu' yu'un tscolta li xnich'nabique; ja' no'ox cuxul chcom stuquic ta scoj ti tuc' yo'ntonic ta jtojole.

²¹ “Ja' yu'un jech chcal vu'un li Muc'ul Diosun ti Yajvalun scotole: ¿C'u to x'elan c'alal me ta jtac tal ta Jerusalén li chanchop vocol ti toj xi'balic sbae; ja' li milel ta espadae, li vi'nale, li jti'val chonbolometique, xchi'uc li tsatsal chamel sventa ta xcules o scotol li jnaclumetique xchi'uc li chonbolometique?

²² Ac'o me jech ta jpas, ta to xcac' coluc jayibuc li squerem stsebique, jech ta xich'ic iq'uel loq'uel li' ta banamil. C'alal chc'otic te yo' bu oyoxuc ec li vo'oxuque, te chavilbeic scotol c'u x'elan li stalelique xchi'uc li yabtelique. Jech te chpat avo'ntonic ta sventa li c'usi chopol la jpas li' ta Jerusalene, ti ep c'usitic tsotsic la jpas ta stojole.

²³ Jech te tspas ta jun avo'ntonic ti c'alal chavilbeic li stalelique xchi'uc li c'usitic tspasique. Jech chlic ana'ic ti muc alticuc no'ox laj cac'be svocolique”, xi li Muc'ul Diose.