Ezequiel 13 - Bible in Tzotzil de Chenalhó with Deuterocanon

Stojol smul jlo'lavanej j'alc'opetic

¹ La sc'opanun yan velta li Muc'ul Diose, jech laj yalbun:

² “Xnich'on cristiano, albo c'usi smulic li j'alc'opetic te ta Israele, ja' li j'alc'opetic ti tsnop ta yo'nton stuquic li c'usi chalique, jech xavalbe: ‘A'yic c'usi chal li Muc'ul Diose.

³ Jech chal li Cajvaltic Diose: ¡Toj abul abaic, bol j'alc'opetic, vo'oxuc ti chanop ta ajol atuquic li c'usi cha'ac'bat avil acuyojique, ac'o me mu'yuc c'usi chavilic!

⁴ Israel, li j'alc'opetic avu'une ja' jech chac c'u cha'al vetetic te ta poco' yavnaetic.

⁵ Me jutuc mu'yuc c'usi spasojic sventa chascoltaoxuc, sventa chcuch avu'unic li muc'ta pleito c'alal tsta yorail tstac tal li Muc'ul Diose.

⁶ Li c'usi laj yil scuyojique altic, li c'usi laj yalic chc'ot ta pasele puru epalc'op. Jech laj yalic: Ja' la sc'opanuncutic li Muc'ul Diose, xiic, pero muc tacbilicuc cu'un. Jun xa yo'nton tsmalaic chc'ot ta pasel yilel li c'usi chalique.

⁷ Li c'usi laj avilic acuyojique puru nopbil. Li c'usi laj avalic chc'ot ta pasele puru epalc'op. Chavalic ti vu'un ta jventa chac'opojique, pero li vu'une mu'yuc c'usi calojboxuc.

⁸ Ja' yu'un jech chcal vu'un li Muc'ul Diosune: Ta sventa ti altic nopbil c'usi chavalique xchi'uc ti mu meleluc li c'usi chavil acuyojique, a'yo ava'yic, vu'un jtuc ta jcontrainoxuc.

⁹ Ta xcac' jc'ob ta atojolic vo'oxuc ti oy c'usi laj avil acuyoj abaique, xchi'uc ti chavalic puru epalc'ope. Muc teuc chcom achi'inic bu tstsob sbaic li jteclumale; muc teuc tsacal chcom abiic ta svunal sbi li smomnich'nabtac Israele. Jech noxtoc, mu'yuc xa bu chasutic tal yan velta ta yosilal li Israele, yu'un jech ac'o ana'ic ti vu'un Muc'ul Diosune, xi li Diose’, uto”, xiyutun.

¹⁰ “Ta melel ja' la slo'laic li jteclum cu'une, jech laj yalbeic: ‘Junuc co'ntontic, mu'yuc c'usi chc'ot ta pasel’, xiic, pero mu meleluc. Ja' jechic jech chac c'u cha'al boch'o tsva'an pac'benal na ti mu'yuc tsotse, ti tsmac lec ta bonel ta tane.

¹¹ Li boch'o tsbon ta tan li spac'benal nae, albo ti ta ono'ox xvuc' yalele, yu'un ta xtal tsots ic'al vo'; ta jtac tal bot jech chac c'u cha'al ton; ta x'ech' vuq'uesatuc ta muc'ta tsatsal ic'.

¹² C'alal vuq'uem xa'oxe, jech chlic yalic: ‘¿C'usi spas ti lec laj yich' bonel ta tane?’, xiic.

¹³ Yu'un jech caloj vu'un li Muc'ul Diosune: Ta jvuq'ues ta sc'ac'al co'nton, ta jvuq'ues ta tsatsal chauquil vo'. Ta jtac tal tsots ic'al vo', xchi'uc muc'tic bot jech chac c'u cha'al ton; ta slomes o scotol.

¹⁴ Ja' jech ta jvuq'ues scotol li pac'benal na ti vo'oxuc laj abonic lec ta tane. Ta jvuq'ues yalel c'alal ta banamil; jeche' jamal chcom scotol. C'alal ta xlom yalele, li vo'oxuque te chanet'ujic, jech chana'ic o ti vu'un Muc'ul Diosune.

¹⁵ C'alal me laj xa jloq'ues sc'ac'al co'nton ta stojol li spac'benal nae xchi'uc ta stojol li boch'otic la sbonic ta tane, jech chcal: Mu'yuc xa te oy li spac'benal nae xchi'uc li j'alc'opetic ta Israel ti la sbonic ta tan li spac'benal nae,

¹⁶ ja' li boch'o laj yalic ti i'ac'bat yilic ti mu'yuc chtal vocol li' ta Jerusalene, pero mu meleluc, xichi”, xi li Muc'ul Diose.

Stojol smul jlo'lavanej j'alc'op antsetic

¹⁷ “Xnich'on cristiano, li' ta orae ja' xa xaq'uel batel li antsetic te ta alumal ti chalic c'usi chc'ot ta pasel ta jventa scuyojique. Albo ti staoj tsots smulique.

¹⁸ Jech xavalbe: ‘Jech chal li Muc'ul Diose ja' li Cajvaltique: ¡Toj abul abaic vo'oxuc ti chalo'laic achi'iltaquique! Yu'un chajalic xchuc nuc' c'abaletic, xchi'uc poc' sventa smac jolil ta sventa biq'uit muc'; chavalbeic ti xu' chapasic o c'usi toj labalic sbae. ¿Me mu ja'uc no'ox chalo'laic jteclumal, yu'un jech mu'yuc avocolic li vo'oxuque?

¹⁹ Ta jop no'ox cebada, ta juteb no'ox pan chasoquesbicun jc'oplal ta stojol li jteclumale, xchi'uc chavaq'uic ta milel li boch'o mu'yuc sc'oplal chchame. Ja' cuxul chacomtsanic li boch'o sc'oplal chchame. Puru epalc'op chavalbeic li achi'iltaquic ti lec cha'yic ya'yel li avepalc'opique.

²⁰ Ja' yu'un jech chcal vu'un li Muc'ul Diosune: A'yo ava'yic, vu'un ta jcontrain li c'usitic chajalic ti chavalic ti oy svu'ele, ti ja' chayaquic o jech chac c'u cha'al mut li achi'iltaquique. Vu'un ta jcolta loq'uel ta ac'obic li achi'iltaquique; ta xcac' ti jun yo'nton ac'o vilicuc batele.

²¹ Ta jli' li poq'uetic chajalic ti oy svu'el acuyojique, jech chcol loq'uel ta ac'obic li jteclumale, jech muc teuc chucul chcomic o ta atojolic. Jech chana'ic o ti vu'un Muc'ul Diosune.

²² Ta sventa ti chavac'beic yat yo'nton ta scoj avepalc'opic li boch'otic tuc' yo'ntonique, ac'o me mu'yuc jech ta jpas li vu'une, xchi'uc ta sventa ti laj atsatsubtasbeic yo'nton li boch'otic chopolique yu'un jech mu me scomtsanic li chopol be stamojique,

²³ jech j'ech'el ta xlaj sc'oplal o ti oy c'usi chavil ta ach'ulelic ti mu'yuc stue, xchi'uc chlaj sc'oplal o ti xana'ic c'usi chc'ot ta pasel acuyojique. Jech ta jcolta o loq'uel ta ac'obic li jteclumale. Jech chana'ic ti vu'un Muc'ul Diosune.