Ezequiel 11 - Bible in Tzotzil de Chenalhó with Deuterocanon

Laj yich'ic utel li banquilaletic ti toj chopolique

¹ Li svu'el stsatsal Diose la slicun muyel, laj yic'un batel ta sti' xch'ulna Muc'ul Dios te ta stuq'uil sloq'ueb c'ac'al. Te laj quil vo'ob xcha'vinic (25) viniquetic, te xchi'uquic li Jaazanías xnich'on Azure, xchi'uc li Pelatías xnich'on Benaiae, ja' li banquilaletic yu'unic te ta lume.

² Li Muc'ul Diose jech laj yalbun: “Vo'ot xnich'on cristiano, le'e ja' li viniquetic ti yochelic xchapanel c'usitic toj chopole, xchi'uc ti chalic chopol mantal li' ta lume.

³ Jech chalic: ‘Mu'yuc c'usi chc'ot ta pasel ta ora. Jva'antic naetic. Li lume ja' jech chc'ot cu'untic jech chac c'u cha'al bin. Li vu'utique ja' jech chijc'ot jech chac c'u cha'al ti'bol ti lec tiq'uil ta yute’, xiic.

⁴ Ja' yu'un, bat albo c'usi chc'ot ta pasel ta stojolic”, xi li Muc'ul Diose.

⁵ Ta ora ivul ta jtojol stsatsal svu'el li Muc'ul Diose, jech laj yalbun: “Jech xaval: ‘Jech chal li Muc'ul Diose: Vo'oxuc israeletic, ca'yoj li c'usi chavalique, jna'oj c'u x'elan li atoyobbailique.

⁶ Li vo'oxuque ep xa lamilvanic li' ta lum, laj xa anojesic ta animaetic li xoraltic avu'unique.

⁷ Ja' yu'un, vu'un li Muc'ul Diosune, jech chacalboxuc ta jamal: Li lume ja' bin ta xc'ot; li ti'bol chavalique ja' li animaetic laj amilique, ma'uc li vo'oxuque. Li vo'oxuque ta jloq'uesoxuc ta yut li bine.

⁸ Ta sventa ti xi'emoxuc yu'un li milel ta espadae, ja' yu'un milel ta espada ta jtacboxuc tal, vu'un chcal jtuc, vu'un li Muc'ul Diosune, vu'un li Avajvalicune.

⁹ Ta jloq'uesoxuc batel li' ta yut li bine; ta xcac'oxuc ta sc'ob yanlum cristianoetic, yu'un ta xcac' atojic li c'usi laj apasique.

¹⁰ Milbil ta espada chachamic. Ta sts'aquil avosilalic ta xcac'boxuc atoj li amulique, yu'un jech chana'ic ti vu'un Muc'ul Diosune.

¹¹ Li yut lume ma'uc yut bin ta xc'ot avu'unic; li vo'oxuque ma'uc jech chac c'u cha'al ti'bol chac'otic. Ta sts'aquil to yosilal Israel chbat cac'boxuc atoj amulic,

¹² yu'un jech ac'o avotquinicun ti vu'un Muc'ul Diosune. Yu'un li vo'oxuque muc ja'uc xach'unic li c'usitic laj calboxuque, muc ja'uc xapasic li mantaletic cu'une. Ja' laj apasic c'u x'elan stalelic li yanlum cristianoetic te setelic ta naclej ta apat ta axoconique, xi li Diose’, uto”, xiyutun.

¹³ C'alal ja' to no'ox laj cal c'usi chc'ot ta pasele, iyal ta lum li Pelatías xnich'on Benaiae, jech icham o. Li vu'une ta ora la jpatan, la jtuts'an jba ta banamil; tsots li'avan, jech laj cal: “¡Ay, Cajval, Muc'ul Dios! ¿Me yu'un chavules o ta j'ech'el li scomelal smomnich'nabtac Israele?”, xcut.

La xchapan c'usi xchapanoj ta stojol israeletic li Diose

¹⁴ La sc'opanun yan velta li Muc'ul Diose jech laj yalbun:

¹⁵ “Vo'ot xnich'on cristiano, li jnaclumetic ta Jerusalene jech chalbeic sc'oplal li achi'iltaque, li avuts' avalaltaque xchi'uc scotol li smomnich'nabtac Israele: ‘Le'e inamajic xa loq'uel ta stojol li Muc'ul Diose; vu'utic xa la jventaintic o li banamile’, xiic.

¹⁶ Ja' yu'un jech xavalbe ya'yic: ‘Jech chal li Muc'ul Diose: Ac'o me vu'un la jipic batel ta nom ta yantic lum, ac'o me la jpuquic batel ta yantic banamil, pero vu'un xch'ulnaic c'otemun te ta yantic banamil ti bu ic'otique’, xi li Diose, utic.

¹⁷ Jech xavalbe noxtoc: ‘Jech chal li Muc'ul Diose: Vu'un ta xlic quiq'uic sutel tal ta yantic lum ti bu la jpuquic batele; ta jtsobic sutel tal scotol; ta xvul cac'beic yan velta li yosilal Israele.

¹⁸ Ta xlic suticuc tal yan velta ti bu yosilalic ono'oxe; ta xvul sloq'uesic scotol li sloc'obaltac sdiosique xchi'uc scotol li c'usitic toj chopolic la spasique.

¹⁹ Ta jelbe yo'ntonic; ta xcac'be ach' stalelic. Ta jloq'uesbe li yo'ntonic ti toj tsots jech chac c'u cha'al tone; ta xcac'be lec c'un yo'ntonic.

²⁰ Yu'un jech xu' chlic xch'unic li c'usitic caloje, jech xu' chlic spasic li mantaletic cu'une, jech xu' chc'ot ta pasel yu'unic scotol. Ja' jteclumal chc'otic o, vu'un Diosun yu'unic chic'ot.

²¹ Yan li achi'iltac ti ja' yac'oj yo'ntonic o yich'el ta muc' li sloc'obaltac sdiosic ti toj xi'balic sbae, xchi'uc ti ja' batem yo'ntonic o spasel li sbol talelique ta persa ta xcac'be stojic, xi li Diose’, uto”, xiyutun.

²² Li querubinetique ivilic batel xchi'uc li yacan caretaetique xchi'uc li xojobal Dios yu'un Israel te oy ta sba yac'olique.

²³ Li xojobal Diose itoy batel te ta lum, te bat yac' sba ta vits ta stuq'uil sloq'ueb c'ac'al.,

²⁴ Li svu'el stsatsal Diose laj yic'un batel yan velta ta jch'ulel te ta yosilal li caldeaetic yo' bu chucbilic batel li yantic israeletique. Jech te isacch'ay li c'usi laj quil ta jch'ulele.

²⁵ Scotol li jchi'iltactic chucbilic batele lic calbe ya'yic scotol c'usitic laj yac'bun quil li Muc'ul Diose.