Ezequiel 10 - Bible in Tzotzil de Chenalhó with Deuterocanon

Li xojobal Diose itots batel ta ch'ulna

¹ Ts'acal laj quil xco'laj xchi'uc jun chotlebal pasbil ta zafiro ton te ta yac'ol sjol li querubinetique.

² Li vinic ti pasbil ta lino no sc'u'e ic'opanat, jech i'albat: “Tic'o aba ochel te ta xotxotil li yacan caretaetique. Jopo tal jopuc li tsanajtic ac'al te oye; vijo batel ta sba li lume”, x'utat. Jech te jq'ueloj i'och batel.

³ Li querubinetic laj quile te oy ta xocon ch'ulna ta stuq'uil sur. Li xcha'c'olal yamaq'uil ch'ulnae nojem ta toc.

⁴ Li xojobal Muc'ul Diose itoy muyel ta sba yac'ol li sloc'obal querubinetique; te bat yac' sba ta ti'ch'ulna. Li ch'ulnae inoj ta toc. Li yamaq'uile inoj ta saquil stsatsal xojobal li Muc'ul Diose.

⁵ Li xic' querubinetique xvinaj to chbac' te ta sba c'olal yamaq'uil ch'ulna. C'alal chbaq'ue, ja' jech chac c'u cha'al chc'opoj li Dios ti ech'em svu'ele.

⁶ C'alal i'albat mantal li boch'o pasbil ta lino no sc'u' ti ac'o bat sjop tal li ac'ale, jech i'och batel; te la sva'an sba ta yut li xotxotil yacan caretae.

⁷ Oy jun querubín laj yac' tal sc'ob te ta o'lol li yantic querubinetique. La sjop li ac'ale; laj yac'be ta sc'ob li vinic ti pasbil ta lino no sc'u'e. C'alal la stsac ac'al li vinique, iloc' batel.

⁸ Ta ora ivinaj jun c'obil yilel te ta yolon xiq'uic li querubinetique.

⁹ C'alal la jq'uel batele, te laj quil chanib yacan careta, jun ta jujun li querubinetique. Li yacan caretae xco'laj xchi'uc crisólito ton yilel.

¹⁰ Li chanib yacan caretae co'ol x'elan pasbilic. Li jujune tic'ajtic ta yut xchi'ilic yilel.

¹¹ C'alal chanovic batel li querubinetique, ta xchanjotal yelov xu' chanovic. Mu persauc chjoyijic ti c'alal chanovic batele; te no'ox tuc' chlic xanovicuc batel ti c'u x'elan oyique.

¹² Li sbec'talic, li spatic, li sc'obic, xchi'uc li xiq'uique, nojem ta puru satil. Ja' jech ec li chanib yacan caretaetique.

¹³ Li yacan caretaetique jech ch-albatic laj ca'ay: “xotajtic”, xi sc'oplalic.

¹⁴ Li chanib querubinetique oy chanib sat jujunic: li sbae sat querubín yilel; li xchibale sat cristiano yilel; li yoxibale sat león yilel; li xchanibale sat xic yilel.

¹⁵ Li querubinetique itotsic; ja' ono'ox li querubinetic ti laj quil te ta uc'um Quebare.

¹⁶ C'alal chanovic batel li querubinetique, co'ol chanovic batel xchi'uc li yacan caretaetique. C'alal chvilic totsel ta banamile, te nabal chtoyic ec li yacan caretaetique; mu'yuc tsvoc' sbaic o.

¹⁷ C'alal chpajic ta xanubale, te nabal chpajic ec. C'alal tstotsique, te nabal tstots xchi'uquic noxtoc. Yu'un jmoj stsacoj sba ti c'u x'elan cuxulique.

¹⁸ Li xojobal Muc'ul Diose itots batel ta sti' li ch'ulnae; te bat yac' sba ta sba yac'ol li querubinetique.

¹⁹ Li querubinetique la stoy xiq'uic; te jq'ueloj ivilic totsel ta banamil. C'alal ivilic muyele, te nabal imuy ec li yacan caretaetique. Te c'ot pajicuc ta sti' xch'ulna Muc'ul Dios ta stuq'uil sloq'ueb c'ac'al. Li xojobal Dios yu'un Israele te oy ta sba yac'ol li querubinetique.

²⁰ Ja' li querubinetic ti laj quil ono'ox te ta uc'um Quebar ti ta olon oyic yu'un li Dios yu'un Israele. Laj ono'ox cotquin ti ja' li querubinetique.

²¹ Li jujunique oy chanib satic xchi'uc chanib xiq'uic. Te ta yolon xiq'uique xco'laj xchi'uc sloc'obal sc'ob cristiano.

²² Li satique ja' co'ol jech chac c'u cha'al laj quil te ta uc'um Quebare; co'ol x'elanic ta q'uelel, xchi'uc co'ol stalelic. Li jujunique xu' te no'ox tuc' chanovic loq'uel ta stuq'uilic ti c'u x'elan oyique.