Éxodo 6 - Bible in Tzotzil de Chenalhó with Deuterocanon

¹ Itac'ov li Muc'ul Diose: —Tana chavil c'usi ta jpas ta stojol li faraone. Yu'un me tsots c'usi ta jpasbee, ja' to jech xu' ch-ac'van loq'uel li' ta slumale. Stuc xa chlic yal ti ac'o loc'anic batele —xi.

Li Moisese ic'opanat yan velta yu'un li Diose

² Li Diose la sc'opan yan velta li Moisese, jech laj yalbe: —Vu'un li MUC'UL DIOSUNE,

³ laj cac' jba ta otquinel ta stojol Abraham, Isaac, xchi'uc Jacob vu'un ti “Ech'em Stsatsal”, xi jbie. Pero mu'yuc laj cac'be yotquinic ti ta melel ja' Muc'ul Dios jbie.

⁴ Jech noxtoc la jchapan ta stojolic ti chcac'beic li osil te ta Canaán banamile, ja' li osil bu i'ech' naquiicuc jayibuc c'ac'al jech chac c'u cha'al jch'om banamiletic no'oxe.

⁵ Li' ta orae laj xa jna' c'u x'elan svocolic li achi'iltac ta israelale; laj xa jna' ti ep ta sujvanic ta abtel li egiptoetique, jech it'ab ta co'nton li c'usi jchapanoj ono'oxe.

⁶ Ja' yu'un bat albeic achi'iltaquic ti vu'un Muc'ul Diosun ta jpoj loq'uel ta mozoil xchi'uc ta sventa li tsatsal abtel ac'bilic yu'un egiptoetique. Ta xcac' ta ilel c'u x'elan li jvu'ele; ta jcoltaic o loq'uel ta sventa li jtsatsal jvu'el ta jpas ta stojolique.

⁷ Chaquic'oxuc, jech jteclumal chac'otic o, xchi'uc vu'un Diosun avu'unic chic'ot. Ja' jech chlic sna'ic o ti vu'un Muc'ul Diosun avu'unique, ti vu'un la jcoltaoxuc loq'uel ta spasel li tsatsal abtel ac'bil apasic yu'un li egiptoetique.

⁸ Ja' te chaquic'oxuc batel ta banamil ti bu calojbe ono'ox chcac'be li Abrahame, li Isaaque, xchi'uc li Jacobe; ja' chacac'boxuc avu'uninic o, vu'un li Muc'ul Diosune —x'utat li Moisese.

⁹ Ja' yu'un li Moisese bat yalbe ya'yic yan velta li xchi'iltaque, pero muc xa xich'ic ta muc', yu'un chibajem yo'ntonic ta scoj ti toj tsots mozoinbilique.

¹⁰ Ja' yu'un li Muc'ul Diose jech laj yalbe li Moisese:

¹¹ —Bat xa albo faraón ti ac'o sloq'ues batel li achi'iltaque —xut.

¹² Li Moisese jech la stac'be li Muc'ul Diose: —Mu xiyich'bicun ta muc' c'usi laj calbeic li jchi'iltaque. ¿C'u x'elan xu' chiyich'bun ta muc' jc'op faraón ti vocol chloc' ta que c'usi chcale? —xut.

¹³ Ja' yu'un li Muc'ul Diose laj yalbe Moisés xchi'uc Aarón ti ac'o bat yalbeic israeletic, xchi'uc ac'o bat yalbeic faraón ti yich'ojic xa tsots mantal ti ac'o yac' loq'uel ta Egipto scotol israeletique.

Sc'oplal sbi smoltotic ta vo'one Aarón xchi'uc Moisés

¹⁴ Li'i ja' li banquilaletic ta jujuchop na ta sventa stotique. Li banquilal xnich'on Israele ja' li Rubene. Li xnich'nabtaque ja' li'i: Hanoc, Falú, Hezrón, xchi'uc Carmi. Le'e ja' jchop xnich'nabtac li Rubene.

¹⁵ Li xnich'nabtac Simeone ja' li'i: Jemuel, Jamín, Ohad, Jaquín, Zohar, xchi'uc Saúl, ja' yol jun canaán ants. Le'e ja' jchop xnich'nabtac li Simeone.

¹⁶ Li xnich'nabtac Leví xlic ta banquilal c'alal ta its'inale ja' li'i: Gersón, Coat, xchi'uc Merari. Li Levie icuxi vuclajuneb svucvinic (137) jabil.

¹⁷ Li xnich'nabtac Gersón ti ta jujuchop sbiic ibatique ja' li'i: Libni xchi'uc Simei.

¹⁸ Li xnich'nabtac Coate ja' jech sbiic: Amram, Izhar, Hebrón, xchi'uc Uziel. Li Coate icuxi oxlajuneb svucvinic (133) jabil.

¹⁹ Li xnich'nabtac Merarie ja' jech sbiic: Mahli xchi'uc Musi. Le'e ja' li smomnich'nab Leví ti xlic ta banquilal c'alal ta its'inaletique.

²⁰ Li Amrame laj yic' sbaic xchi'uc sjunme', ja' Jocabed sbi. Ivoc' yalab, ja' li Aarón xchi'uc Moisese. Li Amrame icuxi vuclajuneb svucvinic (137) jabil.

²¹ Li xnich'nabtac Izhare ja' jech sbiic: Coré, Nefeg, xchi'uc Zicri.

²² Li xnich'nabtac Uziele ja' jech sbiic: Misael, Elzafán, xchi'uc Sitri.

²³ Li Aarone laj yic' sbaic xchi'uc Elisabet, ja' li stseb Aminadabe xchi'uc ja' xchi'il ta voq'uel li Naasone. Li Elisabete ivoc' yalabtac, ja' Nadab, Abiú, Eleazar, xchi'uc Itamar.

²⁴ Li xnich'nabtac Coree ja' Asir, Elcana, xchi'uc Abiasaf. Le'e ja' jchop sbi coreetic.

²⁵ Li Eleazare, ja' li jun xnich'nab Aarone, laj yic' sbaic xchi'uc jun stseb Futiel. I'alaj li tsebe, Finees sbi. Le'e ja' banquilaletic ta jujuchop sbiic li levietique; lec jmoj xcholet xyal ta jujuchop sbiic.

²⁶ Li Aarón xchi'uc Moisese ja' ti jech i'albatique: “Bat loq'uesic tal ta Egipto li achi'iltac ta israelale. Lec jmoj cholol xabatic jech chac c'u cha'al jtsob soldadoetic”, ti x'utatique.

²⁷ Ja'ic ono'ox Moisés xchi'uc Aarón ti ay sc'opanic li faraón ajvalil ta Egipto sventa bat sloq'uesic tal ta Egipto banamil li israeletique.

Li Muc'ul Diose la sc'opan yan velta Moisés xchi'uc Aarón

²⁸ C'alal ic'opanat yu'un Muc'ul Dios li Moisés te ta Egiptoe,

²⁹ jech i'albat: —Vu'un Muc'ul Diosun. Scotol li c'usi chacalbote, bat albo ya'ay faraón, ja' li ajvalil te ta Egiptoe —x'utat.

³⁰ Li Moisese jech la stac'be: —Muc'ul Dios, toj vocol chloc' xic'opoj, ja' yu'un ¿C'uxi xu' chiyich'un ta muc' li faraone? —xut.