Éxodo 38 - Bible in Tzotzil de Chenalhó with Deuterocanon

Laj yich' pasel scajleb smoton Dios ta bronce taq'uin

¹ Li Bezaleele la spas noxtoc scajleb smoton Dios ta acacia te' sventa xchic'ubil matanal. Co'ol sjamalil ta set la spas, ja' chib metro xchi'uc oxc'ob ta set. Ja' jun metro xchi'uc oxc'ob stayalil.

² La spasbe xulub ta xchanjotal xchiquin. Jmoj snitoj sba la spas, xchi'uc la xpix ta bronce.

³ Jech noxtoc la spas scotol li c'usitic chtun te ta scajleb smoton Diose; ta bats'i bronce taq'uin la spas. Ja' li xch'amubil tane, li palaetique, li muc'tic tazae, li xluchubil ti'bole, xchi'uc li yavil ac'ale.

⁴ Xchi'uc la spas jun chajchajtaq'uin ta bronce; te laj yac' ta o'lol yut li scajleb smoton Diose.

⁵ La spasbe chanib xotajtic taq'uinal ta xchanjotal xchiquin li chajchajtaq'uine yu'un ja' te chich' xojel jelovel li xq'uechubiltaque.

⁶ Li xq'uechubiltac scajleb smoton Diose, ta acacia te' la spas. La xpix lec ta bronce noxtoc.

⁷ Te la xoj jelovel ta xotajtic taq'uin ta jujujot ta xocon li scajleb smoton Diose yu'un jech xu' chich' q'uechel batel. Li scajleb smoton Diose vomol yut, xchi'uc ta te' pasbil.

Muc'ta perol pasbil ta bronce

⁸ Li Bezaleele la spas noxtoc jun perol ta bronce, xchi'uc la spasbe snacleb ta bronce noxtoc. Ja' la stunesbe snenic li antsetic ti te chchabiic ti'ch'ulna pasbil ta nucule.

La spasbeic yamaq'uil ch'ulna

⁹ Li Bezaleele la spasbe yamaq'uil noxtoc li ch'ulnae. Ta stuq'uil sure ja' vo'ob yoxvinic metro sjamalil li spoc'ale; ja' pasbil ta ts'otbil lino no.

¹⁰ Xchi'uc jtob (20) yoyal xchi'uc jtob (20) snacleb pasbil ta bronce, xchi'uc slucajtic taq'uinal, xotajtic taq'uinal pasbil ta saquil taq'uin.

¹¹ Ta stuq'uil nortee ja' vo'ob yoxvinic (45) metro sjamalil li spoc'ale, jtob (20) yoyal xchi'uc jtob (20) snacleb pasbil ta bronce, xchi'uc slucajtic taq'uinal, xotajtic taq'uinal pasbil ta saquil taq'uin.

¹² Ta smaleb c'ac'ale ja' o'lol yoxibal xcha'vinic (22 1/2) metro sjamalil li spoc'ale, lajuneb yoyal xchi'uc lajuneb snacleb. Li slucajtic taq'uinal yoyale xchi'uc li xotajtic taq'uinale ja' pasbil ta saquil taq'uin.

¹³ Ta stuq'uil sloq'ueb c'ac'ale ja' o'lol yoxibal xcha'vinic (22 1/2) metro sjamalil li spoc'ale.

¹⁴ Li jot xocon ta ochebale ja' vucub metro sjamalil li spoc'ale, oxib yoyal xchi'uc oxib snacleb.

¹⁵ Li yan jot xocon ta ochebal noxtoque ja' vucub metro snatil li poq'ue, oxib yoyal xchi'uc oxib snacleb.

¹⁶ Scotol li spoc'al ta joyob yamaq'uil ch'ulnae ja' pasbil ta bats'i ts'otbil lino no.

¹⁷ Li snaclebtac yoyale ja' pasbil ta bronce. Li slucajtic taq'uinal yoyal xchi'uc li xotajtic taq'uinale pasbil ta saquil taq'uin. Li sjoljol yoyaltaque pixbil ta saquil taq'uin. Scotol li yoyaltaque ta saquil taq'uin pasbil li xotajtic taq'uinale.

¹⁸ Li spoc'al sti' yamaq'uil ch'ulnae lec c'upil sba pasbil. Ja' jalbil yax'elan poc', ic'ic'tic sba stsajal, bats'i tsoj, xchi'uc ta ts'otbil lino no. Ja' baluneb metro sjamalil. Ja' chib metro xchi'uc oxc'ob snatil. Co'ol snatil xchi'uc li yantique.

¹⁹ Oy chanib yoyal xchi'uc chanib snacleb pasbil ta bronce. Li slucajtic taq'uinal xchi'uc li xotajtic taq'uinale pasbil ta saquil taq'uin, xchi'uc li sjoljol yoyale pixbilic ta saquil taq'uin.

²⁰ Scotol li te'etic sventa snitubil spoc'al ch'ulnae xchi'uc sventa snitubil spoc'al yamaq'uil ta joyobe pasbilic ta bronce.

Sc'oplal taq'uinetic itun ta sventa ch'ulna

²¹ Li levietique ja' laj yich'ic ta venta scotol c'u yepal itun li c'usitic pasbil ta taq'uin c'alal la spasic li ch'ulna pasbil ta nucule yu'un jech i'albatic yu'un li Moisese. Ja' q'uelbilic yu'un li Itamar, xnich'on pale Aarone.

²² Li Bezaleel, xnich'on Uri, ja' li smomnich'on Hur liquem ta jchop yu'un Judae, ja' la spas scotol li c'usitic i'albat yu'un Muc'ul Dios li Moisés ti tsc'an pasele.

²³ Ja' te la scolta sbaic xchi'uc li Aholiab, xnich'on Ahisamac, liquem ta jchop yu'un Dane yu'un ja' mero jtentaq'uin. Xchi'uc lec sna' xjolobaj; lec sna' xluchtael c'usitic ta yax'elan poc', ta ic'ic'tic sba stsajal, ta bats'i tsoj, xchi'uc ta ts'otbil lino no.

²⁴ Scotol li c'anal taq'uin itun ta sventa c'usitic laj yich' pasel ta ch'ulnae, ja' li c'anal taq'uin ti laj yaq'uic ta smoton Diose, ja' baluneb ciento xchi'uc vo'ob xchanvinic (965) kilo xchi'uc lajuneb xcha'vinic (30) gramo; ja' jech yalal jech chac c'u cha'al chapanbil te ta ch'ulnae.

²⁵ Li saquil taq'uin laj yaq'uic li boch'otic tsacajtic ta vun sbiic c'alal la spasic tsactsacvune ja' oxmil xchi'uc oxib ciento xchi'uc balunlajuneb (3,319) kilo xchi'uc vo'ob ciento xchi'uc vo'ob xcha'vinic (525) gramo ta scotol; ja' jech yalal jech chac c'u cha'al chapanbil te ta ch'ulnae.

²⁶ Scotol li israeletic ti laj yich'ic tsacbel sbiic xlic ta jtob (20) sjabilalique ja' vaquib ciento ta mil xchi'uc o'lol xchanmil xchi'uc lajuneb yoxvinic (603,550) ta scotol. Li jujunique laj yaq'uic o'lol svaquibal gramo; ja' jech yalal jech chac c'u cha'al chapanbil te ta ch'ulnae.

²⁷ Li saquil taq'uine ja' oxmil xchi'uc oxib ciento (3,300) kilo. Ja' laj yunijesic sventa snacleb li ch'ulnae xchi'uc sventa snacleb yoyaltac spoc'al. Scotol li saquil taq'uin le'e ja' itun ta sventa snacleb vo'vinic (100) ta bej oyetic. Ja' laj yich' oxlajuneb xcha'vinic (33) kilo li jujubej oyetique.

²⁸ Yan li saquil taq'uin la stsobic ta scotol li jaychop israeletique ja' laj yich' pasel o li slucajtic taq'uinal oyetique, xchi'uc ja' la xpixanic o li sjoljol oyetique xchi'uc li xotajtic taq'uine.

²⁹ Li bronce taq'uin laj yaq'uic ta smoton Diose ja' cha'mil xchi'uc oxib ciento xchi'uc vaclajuneb xcha'vinic (2,336) kilo xchi'uc chanib ciento (400) gramo.

³⁰ Le'e ja' laj yich' pasel o ta snaclebtac yoyal sti' li ch'ulna pasbil ta nucule, xchi'uc ja' laj yich' pasel o scajleb smoton li Diose, xchi'uc li xchajchajtaq'uinale, xchi'uc scotol li c'usitic itun te ta scajleb smoton Diose.

³¹ Xchi'uc ja' la spasic o ta bronce noxtoc li snaclebtac xchi'uc li bic'tal te'etic sventa chich' nituel o li ch'ulnae xchi'uc li scoralil yamaq'uile, xchi'uc li snaclebtac yoyal sti' yamaq'uil ch'ulnae.