Éxodo 37 - Bible in Tzotzil de Chenalhó with Deuterocanon

Laj yich' pasel xcaxail smantal Dios

¹ Jech noxtoc li Bezaleele la spas li xcaxail smantal Dios ta acacia te'e, ja' o'lol svacch'ix snatil. Li sjamalil xchi'uc stayalile ja' oxch'ix xchi'uc oxc'ob la spas.

² La xpix lec ta c'anal taq'uin li yute xchi'uc li spate. Lec c'upil sba xquechelquechel la spas ta c'anal taq'uin ta joyob.

³ Laj yac'be chanib xotxot c'anal taq'uinal ta xchanibal yacan; chabchab laj yac' ta jujujot xocon.

⁴ La spasbe noxtoc xq'uechubiltac ta acacia te'; la xpix lec ta c'anal taq'uin.

⁵ Te la xoj jelovel ta slucajtic taq'uinal ta jujujot xocon li caxae, yu'un jech xu' chich' q'uechel batel.

⁶ La spasbe noxtoc smac ta c'anal taq'uin. Ja' o'lol svacch'ix snatil; ja' oxch'ix xchi'uc oxc'ob sjamalil.

⁷ Xchi'uc la spas chib sloc'obal querubinetic ta jujujot sjol. Ta bats'i c'anal taq'uin la spasbe li smaque; la sten lec ta martillo.

⁸ Li smac xchi'uc li chib sloc'obal querubinetique jmoj snitoj sba la spas: jujun va'ajtic ta jujujot sjol li smac caxae,

⁹ snupul satioj sbaic, ja' sq'uelojic yalel li smac caxae. Li xiq'uique lich'ajtic, ja' smacojic li smac caxae.

La spasic mexa sventa te chich' aq'uel pan ta stojol Dios

¹⁰ Li Bezaleele la spas noxtoc jun mexa ta acacia te'. Ja' o'lol yo'ch'ix snatil xchi'uc cha'ch'ix xchi'uc oxc'ob sjamalil; ja' oxch'ix xchi'uc oxc'ob stayalil.

¹¹ La xpix lec ta c'anal taq'uin xchi'uc lec xquechelquechel la spasbe sti' ta joyob; ta bats'i c'anal taq'uin la spas.

¹² Ta sti'ti' li mexae lec xa tselajtic la spas ta joyob; ja' chanc'ob tselajtic muyel la spas, lec xquechelquechel la spas ta c'anal taq'uin ta joyob.

¹³ Xchi'uc la spasbe chanib xotxot c'anal taq'uin; te laj yac' ta xchanjotal xchiquin yo' bu chlic li jujun yacane.

¹⁴ Ja' te la snaban ta yolon ti bu tselajtic muyel ta joyob ta sti'ti'e, yu'un ja' te chich' xojel jelovel li xq'uechubiltac sventa chich' q'uechel batele.

¹⁵ Li xq'uechubiltac mexae ta acacia te' la spas; la xpix lec ta c'anal taq'uin.

¹⁶ Scotol li c'usitic chtun te ta mexae, ja' li platoetique, li muc'tic cucharae, li jarroetique, xchi'uc li vasoetic sventa c'usi sts'ants'un chich' aq'uel ta smoton Diose ta bats'i c'anal taq'uin la spas.

Laj yich' pasel candelero

¹⁷ Li Bezaleele la spas ta c'anal taq'uin noxtoc li candeleroe; la sten lec ta martillo. La spasbe snacleb, ste'el, scopailtac, xnichtac xchi'uc snaclebtac xnich; jmoj stsacoj sba la spas scotol.

¹⁸ Ja' vacxol sc'ob, oxib ta jujujot xocon.

¹⁹ Li jujun sc'obe oy oxcoj xnich jech chac c'u cha'al xnich almendro xchi'uc oy jujun snacleb.

²⁰ Li mero ste'el candeleroe oy chanib xnich jech chac c'u cha'al xnich almendro xchi'uc jujun snacleb.

²¹ Li jujun sc'ob candeleroe oy jun svolvolil ti bu chc'obin muyele.

²² Li jujun svolvolil xchi'uc li sc'obc'obtaque jmoj stsacoj sba pasbil; ja' pasbil ta c'anal taq'uin tenbil lec ta martillo.

²³ Ta bats'i c'anal taq'uin la spas noxtoc li vucub scandilaltaque, li xtuch'ubiltac xmechaile, xchi'uc li yunin platoaltaque.

²⁴ C'alal laj yich' pasel li candelero xchi'uc scotol li c'usitic te chtune, ja' oxlajuneb xcha'vinic (33) kilo bats'i c'anal taq'uin itun yu'unic.

Laj yich' pasel scajleb xchic'ubil pom

²⁵ Li Bezaleele la spas noxtoc scajleb xchic'ubil pom ta acacia te'. Co'ol sjamalil la spas ta jujujot; ja' cha'ch'ix xchi'uc oxc'ob ta set la spas. Ja' o'lol yo'ch'ix li stayalile. Li xulubtaque jmoj snitoj sba la spas ta scotol.

²⁶ La xpix ta c'anal taq'uin li sba yac'ole, xchi'uc li spat xocone, xchi'uc li xulubtaque. Lec c'upil sba xquechelquechel c'anal taq'uin laj yac' ta joyob.

²⁷ Xchi'uc laj yac'be chib slucajtic c'anal taq'uinal noxtoc ta jujun xchiquin ta yolon ti bu xquechelquechel spasoje. Ja' chabchab laj yac' ta jujujot xocon yu'un ja' te chich' xojel jelovel li xq'uechubiltaque, jech xu' chich' q'uechel batel.

²⁸ Li xq'uechubiltaque pasbil ta acacia te', xchi'uc pixbil ta c'anal taq'uin.

Aceite sventa ich'ub abtelal xchi'uc pom

²⁹ Li Bezaleele la spas noxtoc li ch'ul aceite sventa ich'ub abtelale, xchi'uc li pome, xchi'uc li mero perfumee. Ja' jech la spas jech chac c'u cha'al tspasic li boch'otic lec sna'ic spasel perfumeetique.