Éxodo 27 - Bible in Tzotzil de Chenalhó with Deuterocanon

Sc'oplal scajleb smoton Dios pasbil ta bronce taq'uin

¹ “Pasbun junuc scajleb jmoton ta acacia te'; co'ol sjamalil xapas ta jujujot xocon. Ja' chib metro xchi'uc jch'ix xchi'uc oxc'ob sjamalil ta jujujot xocon. Ja' vacch'ix xchi'uc oxc'ob li stayalile.

² Pasbo chanib xulub xchanjotal xchiquin, jmoj snitoj sba xapas xchi'uc li scajleb jmotone. Pixo ta bronce taq'uin scotol.

³ Scotol li c'usitic chtun te ta scajleb jmotone ta puru bronce taq'uin xapas: ja' li xch'amubil tane, li palaetique, li muc'tic tazaetique, li xluchubiltac ti'bole xchi'uc li yav ac'ale.

^4-5 Ac'bo xchajchajtaq'uinal ta o'lol yut li scajleb jmotone. Ta bronce taq'uin xapas. Ac'bo noxtoc jujun slucajtic taq'uinal ta bronce taq'uin ta xchanjotal xchiquin.

⁶ Pasbo xq'uechubiltac ta acacia te'. Pixo lec ta bronce taq'uin.

⁷ Li xq'uechubiltaque te xaxoj jelovel ta slucajtic taq'uinal ta jujujot xocon li scajleb jmotone yu'un jech xu' chich' q'uechel batel.

⁸ Li scajleb jmotone vomol yut xapas xchi'uc ta tenalte' xapas jech chac c'u cha'al laj cac'bot avil te ta vitse.

Sc'oplal c'u x'elan laj yich' pasel yamaq'uil ch'ulna

⁹ “Pasbo yamaq'uil li ch'ulnae. Ta stuq'uil sure maco ta poc' pasbil ta ts'otbil lino no, ja' vo'ob yoxvinic metro (45) snatil.

¹⁰ Jtob (20) yoyal xavac'be xchi'uc jtob (20) snacleb ta bronce taq'uin. Ac'bo slucajtic taq'uinal xchi'uc xotajtic taq'uinal pasbilic ta saquil taq'uin.

¹¹ Ja' jech xapas noxtoc li jot xocon ta stuq'uil nortee. Ja' vo'ob yoxvinic (45) metro li snatile, xchi'uc jtob (20) yoyal, jtob (20) snacleb ta bronce taq'uin, xchi'uc slucajtic taq'uinal, xchi'uc xotajtic taq'uinal pasbil ta saquil taq'uin.

¹² Ta stuq'uil smaleb c'ac'ale ja' tsc'an chib xcha'vinic metro xchi'uc o'lol (22 1/2) li spoc'ale yu'un ja' jech sjamalil li amaq'ue, xchi'uc tsc'an lajuneb yoyal, xchi'uc lajuneb snacleb.

¹³ Ta stuq'uil sloq'ueb c'ac'ale, tsc'an chib xcha'vinic metro xchi'uc o'lol (22 1/2) noxtoc, yu'un ja' jech sjamalil li amaq'ue.

¹⁴ Li jot xocon ta ochebale ja' vucub metro spoc'al xavac'be xchi'uc oxib yoyal, oxib snacleb.

¹⁵ Ta yan jote ja' vucub metro xavac'be, xchi'uc oxib yoyal, oxib snacleb noxtoc.

¹⁶ Li sti' yamaq'uile ac'bo baluneb metro spoc'al, yax'elantic sba, capal ta ic'ic'tic sba stsajal, ta bats'i tsoj, xchi'uc ta lino no ti lec ts'otbile. Lec c'upilic sba xluchal xapasbe. Ac'bo chanib yoyal xchi'uc chanib snacleb.

¹⁷ Scotol li yoyal yamaq'uil ch'ulnae tsc'an oy slucajtic taq'uinal, xchi'uc xotajtic taq'uinal pasbil ta saquil taq'uin, xchi'uc tsc'an oy snaclebtac ta bronce taq'uin.

¹⁸ Li yamaq'uil ch'ulnae ja' vo'ob yoxvinic (50) metro snatil; ja' chib xcha'vinic metro xchi'uc o'lol (22 1/2) li sjamalile. Ja' jech ta xcha'jotal xocon. Li sjamalil spoc'ale ja' chib metro xchi'uc jch'ix xchi'uc oxc'ob, paso ta puru lino no ti lec ts'otbile, li snaclebe paso ta bronce taq'uin.

¹⁹ Scotol li c'usitic chtun c'alal chatsob abaic te ta ch'ulna pasbil ta nucule tsc'an ta bats'i bronce taq'uin xapas. Jech noxtoc li ste'eltac sventa bu chich' nituanel o spoc'al ch'ulna xchi'uc spoc'al yamaq'uile tsc'an ta bats'i bronce xapas.

Sc'oplal aceite sventa candiletic

²⁰ “Albo mantal achi'iltac ta israelal ti ac'o yich'beic tal yaceiteal olivaetique yu'un jech xu' chatsan scotol c'ac'al li candiletique.

²¹ Li Aarón xchi'uc xnich'nabtaque ja' tsventainic o sq'uelel lec li candiletique, yu'un jech xu' te tsanal o ta jtojol scotol ac'ubal ta ch'ulna cu'un ti bu chac'opanicun ta spat li poc' yo' bu oy xcaxail jmantale. Li'i ja' jun mantal chcom o ta atojolic c'alal ta avalab anich'nabic.