Éxodo 25 - Bible in Tzotzil de Chenalhó with Deuterocanon

Laj yaq'uic smoton Dios sventa chich' pasel ch'ulna

¹ Li Muc'ul Diose jech laj yalbe yan velta li Moisese:

² “Albo achi'iltac ti ac'o yich'bicun tal jmotone. Ac'o yich'ic tal scotol li boch'otic chc'ot ta yo'ntonic chaq'uique.

³ Li c'usitic ta jc'an chaq'uique ja' li'i: c'anal taq'uin, saquil taq'uin, cobre taq'uin,

⁴ yax'elan poc', ic'ic'tic sba stsajal, bats'i tsoj, lequil lino no, jalbil tsotsil tentsun,

⁵ nuculil chij bonbil ta tsoj, lequil nuculetic, acacia te',

⁶ aceite sventa candiletic, smuibtasbil aceite sventa lecubtasel, xchi'uc sventa pom ti c'u cha'al lec mu yiq'ue.

⁷ Ac'o yich'ic tal noxtoc cornalina ton xchi'uc yantic lequil tonetic sventa chich' aq'uel ta mocan c'u'il sventa banquilal pale.

⁸ Pasbicun junuc jch'ulna sventa te chajchi'inoxuc.

⁹ Ti c'u x'elan chacac'bot avil senyaile, xchi'uc li c'usitic chacalbot tsc'an te chtune, ja' jech xapas.

Sc'oplal c'u x'elan chich' pasel xcaxail smantal Dios

¹⁰ “Jech noxtoc paso junuc caxa ta acacia te', ja' o'lol svacch'ix snatil, oxch'ix xchi'uc oxc'ob sjamalil, xchi'uc oxch'ix xchi'uc oxc'ob stayalil.

¹¹ Pixo lec ta bats'i c'anal taq'uin li yut xchi'uc spate. Lec c'upil sba xquechelquechel ta c'anal taq'uin xapas ta joyob.

¹² Paso chanib xotxot c'anal taq'uin; te xabaj ta xchanibal yacan, chabchab chcom ta jujujot.

¹³ Pasbo xq'uechubiltac ta acacia te'; pixo lec ta c'anal taq'uin.

¹⁴ Te xaxoj jelovel ta xotxot taq'uinal ta jujujot li caxae, yu'un jech xu' chich' q'uechel ti c'alal chich'ic batele.

¹⁵ Mu me xaloq'uesic; te xojluc comuc o.

¹⁶ Ja' te xatic' ochel ta yut caxa li jmantal chacac'bote.

¹⁷ “Pasbo smac noxtoc li caxae; ta bats'i c'anal taq'uin xapas. Ja' o'lol svacch'ix snatil, oxch'ix xchi'uc oxc'ob sjamalil.

¹⁸ Ac'o chib sloc'obal querubinetic ta jujujot sjol pasbil ta c'anal taq'uin, tenbil lec ta martillo xapas.

¹⁹ Li smac caxa xchi'uc li sloc'obal querubinetique jmoj snitoj sba xapas, jun ta jujujot sjol li smac caxae.

²⁰ Snupul satioj sbaic xapas; ac'o sq'uelic yalel li smac caxae. Lich'ajtic xic' xapas; ja' ac'o smaquic o li smac caxae.

²¹ Te xatic' ochel ta yut caxa li jmantal chacac'bote; ja'o xavac'be li smaque.

²² Te ta toyol ta o'lol yu'unic li chib sloc'obal querubinetique ja' te ta jc'opan jbatic; te chacalbot mantaletic sventa chavalbe li achi'iltaque.

Sc'oplal xmexail pan tsc'an chaq'uic ta stojol Dios

²³ “Paso junuc mexa ta acacia te', o'lol yo'ch'ix snatil, cha'ch'ix xchi'uc oxc'ob sjamalil, oxch'ix xchi'uc oxc'ob stayalil xapas.

²⁴ Pixo ta bats'i c'anal taq'uin, xchi'uc oy c'usi lec c'upil sba xaloc'taan ta c'anal taq'uin ta joyob.

²⁵ Tselajtic muyel sti' xapas ta joyob; ja' chanc'ob ac'o muyuc ta joyob. Xchi'uc oy c'usi lec c'upilic sba xaloc'taan ta c'anal taq'uin ta joyob noxtoc.

²⁶ Ac'bo chanib xotxot taq'uin pasbil ta c'anal taq'uin; te xabaj ta xchanjotal xchiquin ti bu chlic yalel li jujun yacane.

²⁷ Ta yolon stseltselil sti' xabaj, yu'un jech xu' te chich' xojel jelovel li xq'uechubiltaque, jech xu' chich' q'uechel batel.

²⁸ Li xq'uechubiltac sventa chich' q'uechel batel li mexae, paso ta acacia te'; pixo lec ta c'anal taq'uin.

²⁹ Paso ta bats'i c'anal taq'uin li platoetique, li muc'tic cucharaetique, li jarroetique, xchi'uc li vasoetic ta sventa c'usi sts'anlajet chich' aq'uel ta jmotone.

³⁰ Te xavaq'uic ta ba mexa scotol c'ac'al li pan ac'bil ta jtojole”, xi li Muc'ul Diose.

Sc'oplal candelero pasbil ta c'anal taq'uin

³¹ “Paso noxtoc jun candelero ta bats'i c'anal taq'uin. Teno lec ta martillo. Pasbo snacleb, ste'el, scopailtac, snacleb xnich, xchi'uc li mero xnichtaque, jmoj snitoj sba xapas ta scotol.

³² Pasbo vacxol sc'ob, ox-ox ta jujujot xocon.

³³ Ta jujun li vaquib sc'ob candeleroe tsc'an oy oxcoj xnich volajtic jech chac c'u cha'al xnich almendro, xchi'uc tsc'an oy snacleb xnich.

³⁴ Li mero ste'el cacal ta o'lole tsc'an chavac'be chancoj xnich volajtic jech chac c'u cha'al xnich almendro, xchi'uc pasbo lec snaclebtac li xniche.

³⁵ Ta scotol li vaquib sc'obc'obe tsc'an oy jujun svolvolil ti bu chc'obinan muyele.

³⁶ Li jujubej svolvolil jujujec sc'obe tsc'an jmoj no'ox snitoj sba o ta scotol xchi'uc li sc'obc'obe. Ta puru c'anal taq'uin xapas; teno lec ta martillo.

³⁷ Pasbo vucub scandilaltac, yu'un jech ac'o yac' batel xojobal ti c'alal chatsane.

³⁸ Li xtuch'ubiltac sc'aq'uemal xmechail xchi'uc li yavil stanile ta bats'i c'anal taq'uin xapas.

³⁹ C'alal chapas li candelero xchi'uc li c'usitic yan chtun yu'une, ja' ta oxlajuneb xcha'vinic (33) kilo c'anal taq'uin xapas o.

⁴⁰ Bejeluc jech xapas jech chac c'u cha'al laj cac'bot avil senyail te ta vitse.