Éxodo 24 - Bible in Tzotzil de Chenalhó with Deuterocanon

Li Moisese laj yac' ta ilel senyail li c'usi chapanbil yu'un Diose

¹ Li Muc'ul Diose jech laj yalbe li Moisese: —Muyanic tal li' ta jtojol achi'uc li Aarone, li Nadabe, li Abiue, xchi'uc li lajuneb xchanvinic (70) banquilaletic yu'un achi'iltaque, pero nom no'ox xava'an abaic; te xaquejan abaic ta jtojol.

² Ja' no'ox vo'ot xu' chanopaj tal ta jtojol; li yantique mu xu' chnopajic tal, xchi'uc mu me xachi'in muyel tal li yantic achi'iltaque —x'utat.

³ Li Moisese ivul yalbe xchi'iltac scotol li mantaletic xchi'uc li c'usitic yan laj yal Muc'ul Diose. Scotolic jech itac'ovic: —Ta jpascutic scotol li c'usitic laj yal Muc'ul Diose —xiic.

⁴ Ja' yu'un li Moisese la sts'iba scotol li c'usitic i'albat yu'un Muc'ul Diose. Ta yoc'omal sob ilic; la slatsbe jun scajleb smoton Dios te ta yoc vits. La sva'an yan lajcha'bej tonetic, jujubej ta sventa jujuchop israeletic.

⁵ Te lic yalbe jayibuc queremetic yu'un israeletic ti ac'o smilic tot vacaxetic sventa chchiq'uic ta smoton Dios ti c'u cha'al lec ch-ilatic yu'un Muc'ul Diose.

⁶ Li Moisese la xch'ambe ta muc'tic tazaetic j'o'lol li xch'ich'ale. Li yan j'o'lole te la svij ta sba scajleb smoton Dios.

⁷ Ts'acal la stsac li svunal c'usi chapanbile, laj yapta ta stojol scotol li israeletique. C'alal laj ya'yique, jech laj yalic: —Ta jch'uncutic, ta jpascutic scotol li c'usitic laj yal Muc'ul Diose —xiic.

⁸ Li Moisese la stsac li ch'ich' ti yac'oj ta muc'tic tazaetique. La svij ta ch'ich' scotol li xchi'iltaque, jech laj yal: —Li ch'ich' li'i ja' senyail ti chc'ot ta pasel c'usi la xchapan ta atojolic li Muc'ul Diose xchi'uc scotol li c'usitic yaloje —xut.

⁹ Li Moisese imuyic batel ta vits xchi'uc li Aarón, li Nadab, li Abiú, xchi'uc li lajuneb xchanvinic (70) banquilaletic yu'un israeletique.

¹⁰ Te laj yilic li Dios yu'un Israele: ti bu teq'uel yacane, sts'ayayet jech chac c'u cha'al piso pasbil ta zafiro ton; lec yaxts'ajan ta q'uelel jech chac c'u cha'al vinajel.

¹¹ Li banquilaletic yu'un israeletique laj yilic li Diose. Pero mu'yuc c'usi ipasbatic ti c'alal laj yilique. Jun no'ox yo'nton te ive'ic, te laj yuch'ic vo'.

Imuy ta vits Sinaí li Moisese

¹² Li Muc'ul Diose jech laj yalbe li Moisese: —Muyan batel ta vits te yo' bu ono'ox oyune. Te xamalaun, yu'un chacac'bot li pech'ajtic ton yo' bu ts'ibabil li mantaletic cu'une, yu'un ac'o achanubtas o li achi'iltaque —x'utat.

¹³ Li Moisese imuy batel te ta vits yu'un li Diose. La xchi'in muyel li Josuee, ja' li scoltaubbail ta abtele.

¹⁴ Jech laj yalbe li banquilaletic yu'un israeletique: —Li' xamalauncutique ja' to me lisutcutic tale. Li' chcom achi'inic li Aarón xchi'uc Hure. Xu' ja' chascoltaoxuc ti me oy ava'yejique —xut.

¹⁵ C'alal laj yal jech li Moisese, imuy batel ta vits. Li vitse ipix ta toc.

¹⁶ Li xojobal Muc'ul Diose te icom ta vits. Vaquib c'ac'al te pixil ta toc li vitse. Ta svucubal c'ac'ale li Muc'ul Diose ic'opoj tal ta o'lol yut toc yu'un laj yic' li Moisese.

¹⁷ Te ta mero toyol jolvits laj yilbeic xojobal Muc'ul Dios scotol li israeletique. Xco'laj xchi'uc c'oc' laj yilic ti chchic'vane.

¹⁸ Li Moisese imuy batel ta vits; te i'och batel ta yut li toque. Cha'vinic (40) c'ac'al xchi'uc cha'vinic (40) ac'ubal te icom.