Éxodo 20 - Bible in Tzotzil de Chenalhó with Deuterocanon

Lajuneb mantal yu'un Dios

¹ Ic'opoj li Diose, jech laj yal chac li'i:

² “Vu'un Muc'ul Diosun avu'unic. Vu'un la jloq'uesoxuc tal ta Egipto ti bu to'ox tiq'uiloxuc ta mozoile.

³ “Mu me xavich'ic ta muc' yan diosetic. Jtuc no'ox xavich'icun ta muc'.

⁴ “Mu me xapas yan adiosic. Mu me xapas ta adiosic li c'usitic oy ta vinajel, ta banamile, xchi'uc ta nabetique.

⁵ Mu me xaquejan abaic ta stojol; mu me xavich'ic ta muc'. Yu'un vu'un jtuc Muc'ul Diosun avu'unic, vu'un Diosun ti toj it'ix co'nton me yan c'usi chavich'ic ta muq'ue. Li boch'o mu xiyich'un ta muq'ue ta xcac'be xcuch smulic c'alal to xchanc'olal smomnich'nabic.

⁶ Pero li boch'o chiyich'un ta muq'ue, me chch'unbun jmantale, ep c'ux ta co'nton, ac'o me c'alal to jmil (1,000) ta c'ol smomnich'nabic.

⁷ “Mu me xavixtanbicun jbi, vu'un li Muc'ul Diosun avu'unique. Yu'un li boch'o chiyixtanbun jbie ta me xcac'be stoj smul.

⁸ “Na'ic me li sc'ac'alil chacux avo'ntonic sventa chavoc'bicun ta jventae.

⁹ Vaquib no'ox c'ac'al xu' cha'abtejic, xu' chapasic scotol li avabtelique.

¹⁰ Yan li svucubal c'ac'ale ja' xcuxubil avo'ntonic; ja' sventa chavich'icun ta muc', vu'un li Muc'ul Diosun avu'unique. Mu me boch'o spas jchopuc abtel avu'unic li jun c'ac'al le'e. Manchuc me vo'ot, me aquerem, me atseb, me amozo, me aquiara, me aca', me avacax, me yanlum ti co'ol te nacaloxuc achi'uquique.

¹¹ Yu'un ta vaquib no'ox c'ac'al la jpas li vinajel banamile, li nabe, xchi'uc scotol li c'usitic oye. Yan ta svucubal c'ac'ale la jcux co'nton. Ja' yu'un li jun c'ac'ale ts'u'iltasbil cu'un; ja' ch'ul c'ac'al comen ta aventaic.

¹² “Ich'o ta muc' atot ame', yu'un jech jal chacuxi te ta banamil ti bu chacac'boxuc vu'un li Muc'ul Diosun avu'unique.

¹³ “Mu me xamilvanic.

¹⁴ “Mu me xamulivajic.

¹⁵ “Mu me xa'elc'ajic.

¹⁶ “Mu me xanopbe smul achi'ilic.

¹⁷ “Mu me xapich'-o'ntabe sna achi'ilic. Mu me xapich'-o'ntabe yajnil achi'ilic, me smozo, me squiara, me xvacax, me sburo, o c'usiuc no'ox yantic oy yu'un”, xi li Diose.

Ep ixi'ic yu'un Dios li israeletique

¹⁸ Li israeletique laj yil, xchi'uc laj ya'ay stuquic ti tsots ibac' chauque, xchi'uc li sacsevule, xchi'uc ti tsots i'oc' oq'uese, xchi'uc ti macal ta ch'ayil li vitse. Pero ixi'ic ta jyalel; nom bat sva'anan sbaic.

¹⁹ Jech laj yalbeic li Moisese: —Vo'ot no'ox xac'opanuncutic, ta jch'uncutic li c'usi chavale. Mu xa me xisc'opanuncutic li Diose yu'un naca me lichamcutic —xutic.

²⁰ Itac'ov li Moisese: —Mu xaxi'ic. Ja' no'ox sventa tal sq'uelboxuc avo'ntonic li Diose xchi'uc c'u cha'al mu xch'ay ta avo'ntonic yich'el ta muc', jech mu xasa' amulic ta stojol —xi.

²¹ C'alal nom va'alic batel li israeletique, li Moisese inopaj batel ta ic'al toc yo' bu oy li Diose.

I'albatic mantal c'u x'elan tspasic li scajleb smoton Diose

²² Li Muc'ul Diose jech laj yalbe li Moisese: “Jech xavalbe ya'yic li achi'iltac ta israelale: ‘Laj xa avilic la jc'opanoxuc yalel tal ta vinajel.

²³ Mu me xapas adiosic ta c'anal taq'uin, o me ta saquil taq'uin yu'un chavich'ic ta muc' jech chac c'u cha'al vu'un.

²⁴ Pasbicun jun scajleb jmoton pasbil ta lum. Te xamilbicun, te xachic'bicun jmotonin achijic avacaxic sventa co'ol co'ntontic. Buyuc no'ox chacac'boxuc avilic yavil ti ta jc'an chavich'icun ta muq'ue, te chtal cac'boxuc bendición.

²⁵ Me chapasbicun scajleb jmoton ta tone, mu me xavajanic li tone. Yu'un me chavajan ta avabtejebic li tone, chabolibtasic li scajleb jmotone.

²⁶ Mu me xavac'beic scajal-cajal stec'ubal li scajleb jmotone, yu'un jech mu xavac' ta ilel abec'talic ti c'alal chamuyique’, uto li achi'iltaque”, xi li Diose.