Éxodo 18 - Bible in Tzotzil de Chenalhó with Deuterocanon

Li Jetroe ay svu'lan Moisés

¹ Li Jetroe, ja' li pale ta Madián banamile, ja' li smuni' Moisese, laj ya'ay scotol c'usi la spas Muc'ul Dios ta sventa li Moisese, xchi'uc c'u x'elan la scolta li israeletique, xchi'uc ti ja' la sloq'ues tal ta Egipto banamile.

² Li Moisese te ono'ox la scomtsan li yajnile, ja' li Seforae. Jech li Jetroe laj yic' comel ec li stsebe

³ xchi'uc li chib xnich'nab Moisese. Li june Gersón sbi, yu'un jech laj yal li Moisese: “Yanlum cristianoun ti li' oyun ta yan banamile”, xi.

⁴ Li yane Eliezer sbi, yu'un jech laj yal: “Li Dios yu'un jtote ja' xchabiojun; ja' la scoltaun jech muc smilun li faraone”, xi.

⁵ Li Moisese te spasoj scarpana ta xocol banamil te ta nopol li vits yu'un Diose. Ja' te ibat li Jetroe; te xchi'ucbe batel li yajnil Moisese xchi'uc li chib xnich'nabe.

⁶ Jech c'ot yalbe li Moisese: —Vu'un amuni' Jetroun, tal jq'uelotcutic jchi'uc li avajnile xchi'uc li chib anich'nabe —xut.

⁷ Li Moisese iloc' snup ta be li smuni'e. La snupbe sc'ob; la sts'uts'. Te la sjac'be sbaic c'u x'elanic. Ts'acal i'ochic ta yut carpana.

⁸ Li Moisese la xcholbe ya'ay smuni' scotol c'usi la spas Muc'ul Dios ta stojol li faraone xchi'uc ta stojol scotol li egiptoetic c'alal la scolta li israeletique. Xchi'uc laj yalbe scotol c'u x'elan svocolic tal ta be xchi'uc ti c'u x'elan icoltaatic yu'un Muc'ul Diose.

⁹ Li Jetroe toj xcuxet no'ox yo'nton c'alal laj ya'ay ti toj ep laj yac' ta ilel slequil yo'nton Muc'ul Dios ta stojol li israeletique; ja' ti la scolta loq'uel tal ta sc'ob li egiptoetique.

¹⁰ Jech laj yal: —Ich'biluc ta muc' li Muc'ul Diose, yu'un la scoltaoxuc loq'uel tal xchi'uc scotol achi'iltac ta israelal ta sc'ob li faraone xchi'uc ta sc'ob li egiptoetique.

¹¹ Li' ta orae ta jna' ti ja' no'ox stuc ech'em smuc'ul li Muc'ul Diose ti mu xco'laj xchi'uc li yantic diosetique. Yu'un la scoltaoxuc vo'oxuc ti mu'yuc atuic la'ilatique —xi.

¹² Li Jetroe la xchic'be jcot smoton li Diose yu'un laj yich' ta muc', xchi'uc laj yac' yantic matanaletic. Li Aarón xchi'uc banquilaletic yu'un israeletique te italic; co'ol la xchi'inic ta ve'el ta stojol Dios li smuni' Moisese.

Li Moisese la st'uj yan jchapanvanejetic

¹³ Ta yoc'omal te lic chotluc li Moisese; la xchapanbe sc'opic li israeletique. Sbejel c'ac'al te oyic o ta stojol li Moisese.

¹⁴ Li smuni' Moisese laj yil c'u x'elan ta x'abtej ta stojol xchi'iltac li Moisese, jech laj yal: —¿C'u yu'un ti jech chapas ta stojol li achi'iltaque? ¿C'u yu'un ti atuc no'ox li' chotolote, ti sbejel c'ac'al li' oyic o ta atojol li achi'iltaque? —xut.

¹⁵ Itac'ov li Moisese: —Yu'un li jchi'iltaque chtalic ta jtojol; chtal sjaq'uic c'usi tsc'an tspasic ta stojol li Diose.

¹⁶ C'alal me oy sc'opique, li' chtalic ta jtojole, jech vu'un chcalbe ya'yic li boch'o lec, boch'o mu lecuc c'usi tspas yu'unique. Jech chlic cac'be sna'ic lec li mantaletique xchi'uc li chanubtaseletic yu'un Diose —xut.

¹⁷ Itac'ov li smuni' Moisese: —Pero mu'yuc lec li c'usi chapase.

¹⁸ Me atuc no'ox chapase, chalubtsaj. Jech ta xlubtsajic ec li achi'iltaque, ta x'ech' yo'ntonic. Yu'un toj ep li abtel acuchoje, mu xlaj apas atuc.

¹⁹ A'yo ava'ay, li' chacalbot c'usi lec ta pasel; Dios chascoltaot ta spasel. Li vo'ote ja' no'ox te xava'i ta stojol Dios yu'un li achi'iltaque; vo'ot xavalbe Dios li c'usi sc'opique.

²⁰ Albo ya'yic lec c'usi chal li mantaletic xchi'uc li chanubtaseletic yu'un Diose. Ac'bo sna'ic c'u x'elan lec jun yo'nton cuxulic, xchi'uc li c'usi tsc'an spasique.

²¹ Jech noxtoc t'ujo loq'uel ta stojol achi'iltac ta israelal jayibuc viniquetic ti oy lec sbijilique, ti lec yich'ojic ta muc' Diose, ti tuc' xc'opojique, ti mu xch'am smotonique. Ac'bo yabtelic; ac'o tsventainic li achi'iltaquique. Ac'bo sventainic jmil (1,000), vo'vinic (100), lajuneb yoxvinic (50), lajuneb ta jujuvoc'.

²² Ja' ac'o xchapanic scotol c'ac'al li achi'iltaquique. Yan li c'usi tsotsic ta chapanele, ac'o tal yac'bicot achapan. Ja' no'ox ac'o xchapanic li c'usi mu tsotsuc ta chapanele. Jech ta stsul jutuc li avabtele yu'un ja' ta scoltaoxuc ta spasel.

²³ Me jech chapase, xchi'uc ti me jech tsc'an Diose, lec xu' avu'un spasel li avabtele. Jech noxtoc li achi'iltaque lec xcuxet yo'nton tsut batel ta snaic —x'utat yu'un li smuni'e.

²⁴ C'alal laj ya'ay c'usi i'albat yu'un smuni' li Moisese, jech la spas.

²⁵ Lic st'uj viniquetic ti oy lec sbijilic te ta stojol israeletique. Laj yac'anbe yabtelic ta jujuvoc'. Oy laj yac'be sventainic jmil (1,000), vo'vinic (100), lajuneb yoxvinic (50), lajuneb, ta jujuvoc'.

²⁶ Ja' xa lic xchapanic scotol c'ac'al li xchi'iltaquic ta israelale. Yan ti bu tsotsique, ja' bat yac'beic xchapan li Moisese. Ja' no'ox la xchapanic ti bu c'unic no'oxe.

²⁷ Te la svoc' sbaic xchi'uc smuni' li Moisese, yu'un isut batel ta slumal li smuni'e.