Éxodo 16 - Bible in Tzotzil de Chenalhó with Deuterocanon

Li Diose laj yac' tal manavaj

¹ Scotol li jaychop israeletique iloq'uic batel ta Elim; te ic'otic ta xocol banamil ta Sin, ja' cacal ta o'lol yu'un li Elim xchi'uc Sinaie. Ja' ta yo'lajunebal c'ac'al yochel xchibal u sloq'uelic tal ta Egipto.

² C'alal te oyic ta xocol banamile, scotolic iliquic ta bic'talvulajetel ta stojol li Moisés xchi'uc Aarone.

³ Jech laj yalic: —Ja' lec ti teuc no'ox laj yac' chamcuncutic ta Egipto li Muc'ul Diose. Tee jun no'ox co'ntoncutic chotoluncutic ta sts'el binal ti'bol chive'cutic, ja' to ti c'u yepal xnoj jch'utcutic oe. Li vo'oxuque laj avic'uncutic tal li' ta xocol banamil yu'un tal amiluncutic ta vi'nal jcotolcutic —xutic.

⁴ Li Muc'ul Diose jech laj yalbe li Moisese: —Ta xcac' yalel tal ave'elic ta vinajel. Li achi'iltaque jujun c'ac'al ac'o loq'uicuc ta stsobel li sve'elique. Pero ja' no'ox ti c'u yepal chtun yu'unic ta jujun c'ac'ale. Yu'un ta jc'an ta jq'uel boch'o xch'un, boch'o mu xch'un li jmantale.

⁵ Ta svaquibal c'ac'ale, tsc'an chatsobic cha'tsop sventa chib c'ac'al. Meltsanic lec sventa yoc'omal —x'utat li Moisese.

⁶ Li Moisés xchi'uc Aarone jech laj yalbeic scotol li israeletique: —Ta mal c'ac'ale xana'ic ti ja' jech ora la sloq'uesoxuc tal ta Egipto li Muc'ul Diose.

⁷ Sob oc'ome chavilbeic slequilal li Muc'ul Diose, yu'un laj ya'ay ti chachopolc'opojic ta stojole. Li vu'uncutique ¿c'usi xu' cu'uncutic ec ti chachopolc'opojic ta jtojolcutique? —xut.

⁸ Li Moisese jech to laj yal: —Ta bat c'ac'al ta xac' tal ti'bol ati'ic li Muc'ul Diose. Ta sobe ta xac' tal ep manavaj ave'ic, yu'un laj yil ti chachopolc'opojic ta stojole. Yu'un li vu'uncutique mu'yuc c'usi xu' cu'uncutic. Mu ja'uc chachopolc'opojic ta jtojolcutic; ja' chachopolc'opojic ta stojol li Muc'ul Diose —xut.

⁹ Li Moisese jech laj yalbe li Aarone: —Albo scotol jchi'iltactic, ac'o nopajicuc tal ta stojol li Muc'ul Diose yu'un ya'yoj ti ep xa ichopolc'opojic ta stojole —xut.

¹⁰ C'alal ja'o te chchi'in ta lo'il scotol xchi'iltac li Aarone, scotolic la sq'uelic batel ta xocol banamil; te laj yilbeic xojobal ta jvol toc li Muc'ul Diose.

¹¹ Li Muc'ul Diose la sc'opan li Moisese, jech laj yalbe:

¹² —Laj xa ca'ay ti liquemic ta bic'talvulajetel li achi'iltaque. Jech xavalbe ya'yic: ‘Ta bat c'ac'al tanae chati'ic ti'bol. Sob oc'ome chave'ic manavaj, ja' ti c'u yepal xnoj ach'utic oe. Jech chana'ic o ti vu'un Muc'ul Diosun avu'unique’, uto —x'utat li Moisese.

¹³ Te no'ox ta sbatel c'ac'al ital epal x'ub; noj ivul te yo' bu spasoj scarpanaique. Ta sob yoc'omale toj pim iyal li job osil ta spat xocon scarpanaique.

¹⁴ Ts'acal c'alal ijabaj muyele, oy c'usi te sacvolanic icom ta sba li xocol banamile.

¹⁵ Li israeletique muc sna'ic c'usi ti c'alal laj yilique, jech laj yalbe sbaic: “¿C'usi le'e?”, xut sbaic. Li Moisese jech laj yal: —Le'e ja' manavaj laj yac' tal Muc'ul Dios sventa ta jve'tic.

¹⁶ Li Muc'ul Diose ja' jech mantal yaloj chac li'i: Tsobo ave'ic ti c'u yepal xlaj avu'unic jujunoxuque ja' ti c'u avepalic ta jujubej anaique. Xu' xatsobic chanibuc boch li jujunoxuque —xut.

¹⁷ Li israeletique jech la spasic. Oy ep la stsobic; oy mu'yuc ep la stsobic

¹⁸ jech chac c'u cha'al i'albatic ti ac'o stsobique. Li boch'o ep la stsobique mu'yuc xa xcom scomelal yu'unic, ja' no'ox jech ec li boch'o mu'yuc ep la stsobique mu'yuc c'usi sc'an laj ya'yic. Li jujunique ja' no'ox jech yepal la stsobic ti c'u yepal chtun yu'unique.

¹⁹ Li Moisese jech laj yalbe li xchi'iltaque: —Mu me boch'o scomtsan avu'unic sventa yoc'omal —xut.

²⁰ Pero oy jayibuc muc xch'unic c'usi laj yal li Moisese. Laj to scomtsanic sventa yoc'omal. Ti c'u yepal la scomtsanique ivoc' xuvital, xchi'uc ituib. Li Moisese i'ilin ta stojol li xchi'iltaque.

²¹ Ta jujun sob no'ox la stsobic ti c'u yepal xlaj sve'ic jujunique yu'un c'alal chq'uixnaj c'ac'ale, ta x'ul batel.

²² Yan ta svaquibal c'ac'ale cha'tsop la stsobic sventa chib c'ac'al. Ja' chanib litro la stsobic jujunic ta jujun yajval. Li banquilaletic ta jujutsob israeletique bat yalbeic li Moisese.

²³ Li Moisese jech laj yal: —Le'e ja' jech yaloj mantal li Muc'ul Diose, yu'un li oc'ome ja' xa ch'ul c'ac'al; yorail ta jcux co'ntontic. Ja' xcuxubil co'ntontic ti voc'bil yu'un Muc'ul Diose. Meltsanic me oy meltsanel tsc'an ave'elique. Panic me oy c'usi panel tsc'an avu'unique. Li scomelale naq'uic sventa oc'om —xut.

²⁴ La xch'unic c'usi laj yal li Moisese, laj to snaq'uic sventa yoc'omal, pero mu'yuc xtuib mu'yuc x'och xuvital.

²⁵ Jech laj yal li Moisese: —Ve'anic me li scomelal ave'elique yu'un ja' jun c'ac'al ti voc'bil yu'un Muc'ul Dios sventa ta jcux co'ntontique. Yu'un li jun c'ac'al li'i mu'yuc xa bu chata ave'elic.

²⁶ Ja' no'ox vaquib c'ac'al xu' chatsob li ave'elique; yan ta svucubal c'ac'ale mu'yuc xa c'usi chataic yu'un ja' xcuxubil co'ntontic —xut.

²⁷ Oy jayibuc israeletic iloc' to stsob sve'elic ta svucubal c'ac'al, pero mu'yuc la staic.

²⁸ Ja' yu'un li Muc'ul Diose jech laj yalbe li Moisese: —¿Baq'uin to chlic ach'unic li jmantaltaque xchi'uc li c'usitic yan calojboxuque?

²⁹ Na'ic me ti vu'un cac'oj li jun c'ac'al sventa chacux avo'ntonic, vu'un li Muc'ul Diosune. Ja' yu'un ta svaquibal c'ac'ale chacac'boxuc ave'elic sventa chib c'ac'al. Ta svucubal c'ac'ale mu'yuc xa boch'o xu' chloc' ta sna avu'unic li jujunoxuque; te no'ox chacomic o —xut.

³⁰ Ja' yu'un scotol li israeletique la xcux yo'ntonic ta svucubal c'ac'al.

³¹ Li israeletique maná laj yac'beic sbi li c'usi la stsobique, saquic jech chac c'u cha'al bec' culantu, lec chi' ta ve'el jech chac c'u cha'al bic'tal vaj ti bonbil ta pome.

³² Ts'acal jech laj yal li Moisese: —Li Muc'ul Diose jech yaloj: ‘Tsobic chanibuc boch li manavaje; naq'uic sventa amomnich'nabic yu'un ac'o yotquinic ec c'u x'elan li ave'elic laj cac'boxuc ta xocol banamil c'alal la jloq'uesoxuc tal ta Egiptoe’, xi yaloj li Diose —xi li Moisese.

³³ Li Moisese jech laj yalbe li Aarone: —Tsaco tal junuc moch; te xavac' chanibuc boch li manavaje. Bat ac'o ta stojol li Muc'ul Diose, nac'o lec; Ja' sventa chavac'beic yil li amomnich'nabique —xut.

³⁴ Jech li Aarone te bat snac' li moch ta stuq'uil xcaxail smantal Dios jech chac c'u cha'al albil yu'un Muc'ul Dios li Moisese.

³⁵ Li israeletique cha'vinic (40) jabil la sve'ic li manavaje, ja' to ti c'alal ic'otic yo' bu oy jnaclumetic ta sts'aquil Canaán banamile.

³⁶ Li jun efae ja' yich'oj chib xcha'vinic (22) litro.