Éxodo 12 - Bible in Tzotzil de Chenalhó with Deuterocanon

La sliquesic muc'ta q'uin Coltael c'alal iloq'uic batel ta Egipto li israeletique

¹ Li Moisés xchi'uc Aarone ic'opanatic yu'un Muc'ul Dios te ta Egipto. Jech i'albatic:

² “Li u li'i, ja' li sliqueb u yu'un jabile, tsots me sc'oplal chcom avu'unic.

³ Albo ya'yic scotol achi'iltac ta israelal jech chac li'i: ‘Ta slajunebal c'ac'al yochel li u li'i, milic jujucot ch'ium tot chij, o me ch'ium tot tentsun ta jujubej anaic.

⁴ Me oy mu'yuc epoxuc ta anaique, me mu xlaj ati'ic li chije, iq'uic li boch'o nopol nacaloxuc achi'uquique. Co'ol xapucbe abaic ti c'u avepalique; ja' ti c'u yepal chac'an chati'ic jujunoxuque.

⁵ Li chij chamilique ja' me ti bu ven leque xchi'uc ti jun to jabil svoq'uele. Xu' jcot ch'ium tot chij, o me jcot ch'ium tot tentsun.

⁶ Mu to xamilic, te to xanaq'uic c'alal ta xchanlajunebal c'ac'al yochel li u li'i. Ta smalel c'ac'al ta xchanlajunebal li u li'i, acotolic li israeloxuque ja'o xamilic li chij, o li tentsune.

⁷ Ch'ambeic li xch'ich'ale. Bonic ta xcha'jotal yoyal sti' anaic xchi'uc ta smarcoal sti' anaic ti bu chati'ic li chije.

⁸ Te no'ox ta yac'ubalil xati'ic li chije. Vobil ta c'oc' xapasic. Capal ta ch'ail vomol xati'ic, xchi'uc ta pan ti mu'yuc yich'oj svolesubil xch'ute.

⁹ Me jutebuc mu me xati'ic ta stseil, o me ta panbil. Scotlijil xavoic c'alal ta sjol, ta yacan xchi'uc c'alal ta sbel xch'ut.

¹⁰ Mu me xanaq'uic ta sventa yoc'omal. Me oy to chcom avu'unique, chiq'uic ta c'oc'.

¹¹ C'alal chati'ique, chapalucoxuc me lec. Alapojuc xa lec ac'u'ic xchi'uc axonobic, xchi'uc atsacojuc xa lec anamte'ic, anil xa no'ox xati'ic li chije yu'un ja' xa q'uin Coltael cu'un; vu'un li Muc'ul Diosune.

¹² Te no'ox ta yac'ubalil ta xijelov ta scotol li Egiptoe. Ta x'ech' jmilanbe sba xnich'nab li egiptoetic ta jujubej snaique xchi'uc li sba yol sts'unub yovolique, yu'un chcac' ta ilel ti mu'yuc svu'el li diosetic yu'unique. Jech ta jpas, vu'un li Muc'ul Diosune.

¹³ ‘Li xch'ich'al chije ja' chtun ta sventa senyail yu'un jech chquil ti bu jbejucal anaique. C'alal ch-ech' jmilbe sba xnich'nabic li egiptoetique, me laj quil li ch'ich'e, ta xijelov no'ox batel. Jech mu'yuc boch'o chcham avu'unic vo'oxuc li israeloxuque.

¹⁴ Li jun c'ac'al le'e ja' tsc'an ti mu xch'ay ta avo'ntonique. Tsc'an chapasilanic jun muc'ta q'uin sventa chavich'icun ta muc'; vu'un li Muc'ul Diosune. Ja' jun mantal chcom o ta atojolic c'alal to ta jayc'ol avalab anich'nabic.

¹⁵ Vucub c'ac'al te xlic ave'ic batel pan ti mu'yuc yich'oj svolesubil xch'ute. Ta sba c'ac'ale tsc'an mu'yuc xa boch'o oy svolesubil xch'ut pan te ta sna. Me oy boch'o tsve' pan ti yich'oj svolesubil xch'ut li vucub c'ac'al xbate, taquic loq'uel ta atojolic.

¹⁶ Ta sba c'ac'al xchi'uc ta svucubal c'ac'ale, tsc'an chapasic jun ch'ul tsobajel. Li chib c'ac'al le'e mu xu' cha'abtejic. Ja' no'ox xu' chameltsan jutuc ave'elic.

¹⁷ Li q'uin sventa pan ti mu'yuc yich'oj svolesubil xch'ute tsots sc'oplal tsc'an chana'ilanic o, yu'un ja' sc'ac'alil la jloq'uesoxuc ta Egipto. Jech jmantal chcom o c'alal ta avalab anich'nabic ti ac'o apasilanic li q'uine.

¹⁸ C'alal chlic ave'ic li pan ti mu'yuc yich'oj svolesubil xch'ute, ja' ta bat c'ac'al li xchanlajunebal (14) sliqueb ue, c'alal to ta bat c'ac'al ta jun xcha'vinic (21) li sliqueb ue.

¹⁹ Li vucub c'ac'ale tsc'an ti mu'yuc boch'o oy svolesubil xch'ut pan te ta snae. Me oy boch'o tsve' pan ti yich'oj svolesubil xch'ute, taquic loq'uel ta atojolic, ac'o me yanlum cristiano, o me vo'oxuc li israeloxuque.

²⁰ Ja' yu'un mu me xave'ic pan ti yich'oj svolesubil xch'ute. Buyuc no'ox nacaloxuc, ja' no'ox xave'ic pan ti mu'yuc yich'oj svolesubil xch'ute’, uto li achi'iltaque”, xi li Muc'ul Diose.

²¹ Li Moisese la stac ta iq'uel scotol li banquilaletic yu'un israeletique, jech laj yalbe: “Batanic, bat tsaquic jcotuc ch'ium chij, o me ch'ium tentsun ta jujubej anaic. Milic, yu'un ta jpastic li q'uin Coltaele.

²² Ch'ambeic li xch'ich'ale. Sa'ic tal jyomuc isopo te', ts'ajic ta ch'ich', bonic ta xcha'jotal yoyal sti' anaic xchi'uc ta smarcoaltac. Pero me junuc mu me boch'o xloc' ta sna avu'unic, ja' to me isacub osile.

²³ C'alal ch-ech' smilbe sba xnich'nab egiptoetic li Diose, me chil li ch'ich' ti bonbil ta scotol sti' anaique, chjelov no'ox batel, mu xac' ochuc ta anaic li j'almantal chmilvane.

²⁴ Li mantal li'i, ich'ic me ta muc' li vo'oxuque xchi'uc c'alal ta amomnich'nabic. Ja' jun mantal chcom o ta atojolic.

²⁵ C'alal me la'ochic xa'ox batel ta banamil bu chayac'boxuc Muc'ul Dios jech chac c'u cha'al yaloj ono'oxe, jech me xapasilanic o, jech chac c'u cha'al la jchanubtasoxuc li'i.

²⁶ C'alal me oy jech chasjac'boxuc li anich'nabique: ‘¿C'usi smelol ti vi x'elan chapasique?’, me xayutoxuque,

²⁷ li vo'oxuque jech xatac'beic: ‘Li chij li' chich' milel ta sventa q'uin Coltaele, ja' sventa chquich'tic ta muc' li Muc'ul Diose. Yu'un c'alal la smilbe sba xnich'nab egiptoetic li Muc'ul Diose, mu'yuc xjelov ta snaic li jchi'iltactic ta israelal c'alal te to'ox nacalic ta Egiptoe, jech muc xcham li yalab xnich'nabic ta jujubej snaique’, utic”, xi li Moisese. Li israeletique, la squejan sbaic ta stojol, laj yich'ic ta muc' li Muc'ul Diose.

²⁸ Scotol li israeletique ibatic, la spasic jech chac c'u cha'al i'albatic yu'un Muc'ul Dios li Moisés xchi'uc Aarone.

Icham sba xnich'nab li egiptoetique

²⁹ Li Muc'ul Diose ta o'lol ac'ubal ech' smilbe scotol sba xnich'nab li egiptoetic ta jujubej snaique. Icham c'alal ta sba xnich'on li ajvalil faraone, xchi'uc sba xnich'nabic li boch'otic ochemic ta chuquele, xchi'uc li sba yol sts'unub yovolique.

³⁰ Li faraón xchi'uc xchi'iltac ta abtele xchi'uc scotol li egiptoetique iliquic ta ac'ubaltic. X'avetic no'ox liquel ta oq'uel scotolic. Scotolic oy anima yu'unic ta jujubej snaic.

³¹ Li faraone te no'ox ta yac'ubalil la stac ta iq'uel li Moisés xchi'uc Aarone, jech laj yalbe: —Batanic, voc'o abaic loq'uel ta stojol li jchi'iltac vo'oxuc li israeloxuque. Bat ich'ic ta muc' li Muc'ul Dios jech chac c'u cha'al laj avalique.

³² Iq'uic batel li achijic, li avacaxic jech chac c'u cha'al chac'anique. Te xac'anbicun bendición ta jtojol ec —xi li faraone.

³³ Li egiptoetique la sujic israeletic ti ac'o loq'uicuc batel ta anil ta yosilalique, yu'un la snopic ti ta xcham scotolique.

³⁴ Li israeletique laj yich'ic loq'uel li vots'bil arina ti mu'yuc to yich'oj svolesubil xch'ute. La xpix batel ta sc'u'ic c'alal ta yavil; la scajan batel ta snecubic.

³⁵ Jech la spasic jech chac c'u cha'al albilic yu'un li Moisese. La sc'anbeic batel li c'usitic pasbilic ta c'anal taq'uin, ta saquil taq'uin, xchi'uc li c'u'iletic yu'un egiptoetique.

³⁶ Li Muc'ul Diose la stijbe yo'nton li egiptoetique, jech ta slequil yo'ntonic laj yaq'uic batel scotol c'usitic la sc'anic li israeletique, ja' jech la yich'beic o batel sc'ulejalic li egiptoetique.

Iloq'uic batel ta Egipto li israeletique

³⁷ Li israeletique iloq'uic batel ta Ramsés ibatic ta Sucot. Ti c'u yepal iloq'uic batele ja' vaquib ciento (600,000) ta mil li viniquetic ti xu' xa yu'unic pleitoe. Ja' mu'yuc atbil li antsetic xchi'uc li ololetique.

³⁸ Ep ta chop sts'unubal cristianoetic la xchi'inic loq'uel. Ep xchijic xchi'uc ep xvacaxic batel.

³⁹ Ta sventa ti iloq'uesvanic ta anil li egiptoetique jech mu'yuc xa c'usi laj yutic la smeltsan sve'elic ta anil li israeletique. Ja' lic spasic ta pan li vots'bil arina yich'ojic tal ta Egipto ti mu'yuc yich'oj svolesubil xch'ute, yu'un mu'yuc to'ox pajuben.

⁴⁰ Li israeletique chanib ciento xchi'uc lajuneb xcha'vinic (430) jabil te inaquiic ta Egipto.

⁴¹ Li c'usi mero sc'ac'alil its'aqui li chanib ciento xchi'uc lajuneb xcha'vinic (430) jabile, ja'o iloq'uic tal ta Egipto scotol li jaychop yu'untac Muc'ul Diose.

⁴² Ja' jun ac'ubal ti xchabioj stuc Muc'ul Dios sventa tsloq'ues batel ta Egipto li israeletique. Li ac'ubal le'e ja' yu'un Muc'ul Dios; ja' sventa ac'o ich'atuc ta muc' yu'un li israeletique. Ja' yu'un li israeletique xchi'uc li jayc'ol yalab xnich'nabique tsc'an jech chchabi sbaic ta sventa li jun ac'ubal le'e.

Mantaletic ta sventa q'uin Coltael

⁴³ Li Moisés xchi'uc Aarone jech i'albatic yu'un li Muc'ul Diose: “Li'i ja' mantal ta sventa li q'uin Coltaele: Me junuc yanlum cristiano mu xu' tsti' li jmoton chich' milele.

⁴⁴ Yan li mozoil ti manbil ta taq'uine xu' tsti' ti me yich'oj xa circuncisione.

⁴⁵ Li yanlum cristianoetic ti j'ech'elbeic no'oxe, o me te talemic ta sa' abtele, me junuc mu xu' tsti'ic li chije.

⁴⁶ Ja' tsc'an te no'ox ta jujubej anaic chati'ic li chij ac'bil ta smoton Diose. Mu xu' chich' loq'uesel ta na jlec'uc sbec'tal, xchi'uc mu xu' chich' c'asbel jbejuc sbaquil.

⁴⁷ Ja' jech ac'o spasic scotol li israeletique.

⁴⁸ Pero me oy junuc yanlum cristiano te achi'uquic ta naclej ti tsc'an tspas ec li q'uin ta sventa chavich'icun ta muq'ue, ja' tsc'an ba'yuc ac'o yich' circuncisión scotol li viniquetic te ta snaique. Me la spas jeche, xu' xa tspas li q'uine, yu'un ja' xa jech chc'ot jech chac c'u cha'al li boch'o te voq'uem ta avosilalique. Pero me mu'yuc yich'ojic circuncisione, mu xu' tsti'ic li chije.

⁴⁹ Ja' jun mantal ta xcom avu'unic xchi'uc li yanlum cristianoetic te achi'uquic ta nacleje”, xut.

⁵⁰ Li israeletique la spasic scotol jech chac c'u cha'al i'albatic yu'un Muc'ul Dios li Moisés xchi'uc Aarone.

⁵¹ Ja' jech sc'ac'alil la sloq'ues batel ta Egipto li jaychop yu'untac Muc'ul Diose, ja' li israeletique.