Éxodo 11 - Bible in Tzotzil de Chenalhó with Deuterocanon

Li Diose laj yal ti chcham sba yol xnich'onic li egiptoetique

¹ Li Muc'ul Diose jech laj yalbe li Moisese: —Ta to xcac' tal yan vocol ta stojol li faraone xchi'uc ta scotol li egiptoetique. C'alal me ic'ot ta pasel le'e, te xa ta scoltaoxuc o batel li faraone. Ja' xa stuc ta stacoxuc loq'uel.

² Li' ta orae albo ya'yic scotol achi'iltac c'alal ta vinic ta antsetic ti ac'o sc'anbeic batel c'usitic pasbil ta c'anal taq'uin, ta saquil taq'uin li egiptoetic ti te nopol nacal xchi'uquique —xut.

³ Li Muc'ul Diose laj yac' ti ac'o lecubuc yo'nton egiptoetic ta stojol li israeletique. Jech noxtoc li xchi'iltac ta abtel faraone xchi'uc scotol li egiptoetique laj yilic ti tsots yabtel yich'oj li Moisese.

⁴ Li Moisese jech laj yalbe li faraone: —Jech chal li Muc'ul Diose: ‘Ta o'lol ac'ubal chijelov ta scotol Egipto banamil,

⁵ jech ta xcham scotol sba yol xnich'onic ta jujubej snaic li egiptoetique. Ta xcham c'alal ta sba xnich'on ec li ajvalil faraone, xchi'uc c'alal ta sba yol li squiara chjuch'naj ta cho'e, xchi'uc scotol li sba yol sts'unub yovolique.

⁶ Ta scotol Egipto banamil ta to x'oc' x'avanic ta scoj li tsots at-o'ntonale. Mu'yuc ono'ox bu jech yilojic, xchi'uc mu'yuc bu jech chtal yan velta’, xi li Muc'ul Diose.

⁷ Yan te yo' bu nacal li israeletique, mu'yuc svocolic; me jcotuc ts'i' mu'yuc xvojvun tsti' cristiano, o me chonbolom. Jech chana'ic ti mu'yuc coltabilic yu'un Muc'ul Dios li egiptoetic, jech chac c'u cha'al coltabilic li israeletique.

⁸ Li achi'iltac ta abtele ta to xtal squejan sbaic ta jtojol, jech chlic yalbicun: ‘Batanic achi'uc scotol li achi'iltaque’, xiyuticun. Jech chiloc' o batel —xut faraón li Moisese. Li Moisese tsots ilinem iloc' ta stojol li faraone.

⁹ Ts'acal jech i'albat yu'un li Muc'ul Diose: —Li faraone muc xayich'oxuc ta muc', yu'un jech xu' chcac'be to yilic ep sq'uelubil jtsatsal te ta Egipto —xi.

¹⁰ Li Moisés xchi'uc Aarone la spasic scotol sq'uelubil stsatsal Muc'ul Dios ta stojol li faraone. Pero ta sventa ti stsatsubtasojbe yo'nton faraón li Muc'ul Diose, jech mu'yuc laj yac' loq'uicuc batel ta Egipto li israeletique.