Éxodo 1 - Bible in Tzotzil de Chenalhó with Deuterocanon

Laj yich'ic tsots vocol te ta Egipto li israeletique

¹ Li'i ja' sbiic li israeletic ti i'ochic ta Egipto xchi'uc Jacobe, ja' ta jujuchop sbiic xchi'uc yajnil xnich'nabic:

² Ja' Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad, xchi'uc Aser.

⁵ Li xnich'nabtac Jacob xchi'uc c'alal ta smomnich'nabtaque ja' lajuneb xchanvinic (70) ta scotolic. Yan li Josee te xa ono'ox oy ta Egipto.

⁶ Ts'acal to li José xchi'uc sbanquiltaque xchi'uc scotol li sba c'olal ivoq'uique icham scotolic;

⁷ Pero ta sventa ti bats'i ep ibol yalab xnich'nabique, jech ibolic ta jyalel, laj yich' lec stsatsalic. Solel inoj yu'unic li banamil bu ic'otique.

⁸ Ts'acal i'och yan ajvalil ta Egipto; muc xa xotquin li Josee. Jech laj yalbe li egiptoetique:

⁹ “Q'uelavilic, li israeletique toj ven epic xchi'uc toj ven tsotsic; yan li vu'utique mu'yuc eputic.

¹⁰ Ja' lec jnoptic c'usi chcut ta jpajestic ti c'u cha'al mu xbolique. Yu'un c'alal me oy boch'o chtal stsacutic ta pleitoe, naca me te bat spas ta co'ol yo'ntonic xchi'uc li cajcontratique, jech co'ol xa yo'ntonic chtal stsacutic ta pleito jcotoltic, xchi'uc naca me stsalutic o”,, xi li ajvalile.

¹¹ Ja' yu'un li egiptoetique lic sva'anic jayibuc jpasmantaletic sventa ac'o yac'beic spas tsatsal abtel li israeletique. Jech lic yac'beic spasic chib lum; ja' Pitón xchi'uc Ramsés. Li faraone ja' laj yac' tunuc ta snail c'usitic chloc' yu'unic li egiptoetique.

¹² Pero c'alal ja'o chich'ic tsots uts'intaele, yo'to ep ibolic ta jyalel. Li egiptoetique toj ep ixi'ic.

¹³ Li israeletique bats'i abul sbaic ta mozoinel yu'un li egiptoetique.

¹⁴ Solel ven tsots i'ac'bat svocolic ta abtel. Puru vots' ach'el xchi'uc puru pat xamit la spasic. Xchi'uc i'ac'bat spasic scotol yantic abtel ta osil noxtoc. Jech tsots mozoinel laj yich'ic, tsots i'uts'intaatic.

¹⁵ Jech noxtoc li faraone la stac ta iq'uel li Sifra xchi'uc Fúa; ja' li jnet'umetic yu'un li yajnil israeletique, jech laj yalbe:

¹⁶ —C'alal chbat aq'uelic me la sta yorail chcuxic li yajnil israeletique, q'uelic lec c'usi ololal chvoc'. Me unin stsebe, te ac'o ch'iuc. Yan me quereme, ¡milic comel! —x'utatic.

¹⁷ Pero li jnet'umetique yich'ojic ta muc' li Diose. Muc sc'an spasic jech chac c'u cha'al i'albatic yu'un li faraone, jech te cuxul la scomtsanic li unin queremetique.

¹⁸ Li ajvalil te ta Egiptoe la stac ta iq'uel li jnet'umetique, jech laj yalbe: —¿C'u yu'un ti cuxul laj acomtsanic li queremetique? —xut.

¹⁹ Itac'ovic: —Yu'un li hebreo antsetique mu jechuc jech chac c'u cha'al li egipto antsetique. Yu'un li stuquique ven tsatsal antsetic; xcuxojic xa'ox chc'ot jtacutic ti c'alal chbat jq'uelcutique —xiic.

^20-21 Ta sventa ti jech la spasic li jnet'umetique, jech ibolic o li israeletique. Laj yich' lec stsatsalic. Ta sventa ti yich'ojic ta muc' Dios li jnet'umetique, jech i'epaj yalabic ec, yu'un icoltaatic yu'un li Diose.

²² Li faraone jech laj yalbe mantal scotol li egiptoetique: “Bat jipic ta uc'um scotol li bic'tal queremetic yu'un israeletique; yan li bic'tal tsebetique te cuxul comtsanic”, xut.