Ester 9 - Bible in Tzotzil de Chenalhó with Deuterocanon

La stsal yajcontraic li judaetique

¹ C'alal ista li yoxlajunebal (13) c'ac'al yochel xlajchabal u Adare, ja' li sc'ac'alil ti ac'o c'otuc ta pasel li mantal yaloj ajvalile, li yajcontra judaetique chapalic xa'ox yu'un tsc'an chulesic o li Judae, pero mu jechuc ic'ot ta pasel. Ja' ijoybij ta stojol stuquic li yajcontraique yu'un ja' itsalatic yu'un li judaetique.

² Scotol li judaetic ti puquemic ta jujun banamil bu c'alal sventainoj li ajvalil Asueroe la stsob sbaic ta jujun lum ti bu nacalique, yu'un chac'beic li yajcontraic ti chapalic xa'ox ja' chaq'uique. Mu'yuc boch'o ivu' yu'un la stsal li judaetique, yu'un scotolic toj ep xi'elal laj ya'yic.

³ Scotol li banquilaletic ta jujun banamile, li ajvaliletique, li jpasmantaletic xchi'uc li boch'otic tsots yabtel yich'ojique ja' xa la scoltaic li judaetique yu'un toj ep xi'elal laj ya'yic li Mardoqueoe.

⁴ Yu'un li Mardoqueoe toj muc' yabtel yich'oj te ta stojol li ajvalile, xchi'uc puquem batel sc'oplal ta jujun banamiletic, xchi'uc yantic no'ox ta xich' batel lec stsatsal.

⁵ Li judaetique la smilic ta espada scotol li yajcontraique. Laj yulesic o; la spasbeic li c'usi tsc'an yo'ntonique.

⁶ Te no'ox ta muc'ul lum Susae la smilic vo'ob ciento (500) viniquetic.

⁷ Xchi'uc la smilic noxtoc li Parsandata, Dalfón, Aspata,

⁸ Porata, Adalía, Aridata,

⁹ Parmasta, Arisai, Aridai, xchi'uc Vaizata,

¹⁰ ja' li xnich'nabtac Amán, mero yajcontra judaetique. Pero li c'usitic oy yu'unique mu'yuc laj yich'beic.

¹¹ C'alal laj ya'ay ajvalil c'u yepal animaetic te ta muc'ul lum Susa yo' bu nacale,

¹² jech laj yalbe li me' ajvalil Estere: —Li judaetique laj xa smilic vo'ob ciento (500) viniquetic, xchi'uc li' no'ox ta muc'ul lum Susae laj xa smilbeic li lajuneb xnich'nab Amane. ¿C'u to van x'elan la spasic ta scotol li banamil bu c'alal jventainoje? Albun xa yan c'usi chac'an ta xcac'bot —xut.

¹³ Itac'ov li Estere: —Me lec chava'ye ajvalil, alo mantal ti ac'o spasic jech yan velta oc'om li judaetic li' ta Susa jech chac c'u cha'al li mantal avaloje, xchi'uc ac'o sjoc'anbeic ta te' sbec'tal li lajuneb xnich'nab Amane —xi.

¹⁴ Li ajvalile laj yal mantal ti ac'o yich' pasel jeche. Lic spuquic te ta lum Susa li mantal laj yal ajvalile, xchi'uc la sjoc'anbeic ta te' sbec'tal li lajuneb xnich'nab Amane.

¹⁵ Ja' yu'un li judaetic te nacalic ta Susae la stsob sbaic yan velta ta xchanlajunebal (14) c'ac'al yochel li u Adare; la smilic oxib ciento (300) viniquetic noxtoc. Pero mu'yuc laj yich'beic li c'usitic oy yu'unique.

¹⁶ Li yantic judaetic nacalic ta jujun banamil yo' bu c'alal sventainoj li ajvalile ja' la smilic vo'lajuneb xchanvinic ta mil (75,000) viniquetic ti c'alal la stsob sbaic ta sventa tspoj sbaique, pero mu'yuc laj yich'beic li c'usitic oy yu'unique.

¹⁷ Le'e ja' ic'ot ta pasel ta yoxlajunebal (13) c'ac'al yochel li u Adare. Ta xchanlajunebal (14) c'ac'ale la xcux yo'ntonic. Toj xcuxet no'ox yo'ntonic; la spasic lec q'uin; laj yaq'uic lec ve'el.

¹⁸ Yan li judaetic te nacalic ta lum Susae la stsob sbaic ta oxlajuneb (13) xchi'uc ta xchanlajunebal (14) c'ac'al yochel li ue. Ta svo'lajunebal (15) c'ac'al la xcux yo'ntonic ec. Xcuxet no'ox yo'ntonic; la spasic lec q'uin, xchi'uc laj yaq'uic lec ve'el.

¹⁹ Jech noxtoc li yantic judaetic te nacalic ta bic'tal lumetic, xchi'uc tsobtsobnaetic ti mu'yuc setbilic ta coraltone, la stsob sbaic ec. Ta xchanlajunebal c'aca'l yochel u Adar xcuxet no'ox yo'ntonic la spasic lec q'uin, xchi'uc laj yac'anbe sba smotonic.

La sliquesic spasel q'uin Purim

²⁰ Li Mardoqueoe la sts'iba ta vun li c'usitic ic'ot ta pasele, xchi'uc la stacbe batel cartaetic noxtoc li judaetic te nacalic batel ta nom ta noch' ti c'u smuc'ul sventainoj li ajvalil Asueroe.

²¹ Laj yalbe batel mantal ti ac'o spasilanic jech q'uin ta jujun jabil ta yoxlajunebal (13), xchi'uc ta xchanlajunebal (14) c'ac'al yochel li u Adare.

²² Yu'un ja' sc'ac'alil icolic ta milel yu'un li yajcontraique, xchi'uc ja' yual ic'ataj ta q'uin, ic'ataj ta xcuxetel yo'ntonic li at-o'nton, li oq'uel ta ox spasique. Laj yalbe batel ti ja' jech sc'ac'alil ac'o spasilanic li q'uine, ac'o yaq'uic lec ve'el, ac'o yac'anbe sba smotonic, ac'o yac'beic smoton li me'onetique.

²³ Li judaetique ja' jech icom o sc'ac'alil yu'unic li q'uin jech chac c'u cha'al la sliquesique, xchi'uc jech chac c'u cha'al la sts'iba batel li Mardoqueoe.

²⁴ Yu'un li Amán xnich'on Amedata, ja' li mero yajcontra judaetique, xchapanoj xa'ox ti ta xules scotol li judaetique, jech lic spasic canal tajimol, ja' li Pur sbie; yu'un jech xu' chules o ta j'ech'el li judaetique.

²⁵ Pero c'alal ibat ta stojol ajvalil li Estere, li ajvalile lic yal mantal ti ja' ac'o joybijuc ta stojol stuc Amán li c'usi chopol snopoj ta stojol li judaetique. Ja' yu'un li Amán xchi'uc xnich'nabe laj yich'ic joc'anel ta te'.

²⁶ Ja' yu'un li c'ac'aletic le'e Purim ic'ot sbi, yu'un Pur sbi li canal tajimol la spasique. Ti c'u x'elan ts'ibabil batel ta carta yu'un Mardoqueoe xchi'uc ti c'u x'elan laj yilic ic'ot ta pasele, xchi'uc ti c'u x'elan laj ya'yic a'yeje

²⁷ ja' jech la spasilanic o batel c'alal ta yalab xnich'nabic xchi'uc li boch'otic c'atajemic xa ta Judae. Ja' jech la spasilanic o batel chib c'ac'al q'uin ta jujun jabil li c'usi c'ac'alil yorail jech chac c'u cha'al i'albatic mantale; mu'yuc la xquechanic o spasel.

²⁸ Ja' jech la spasilanic o chib c'ac'al q'uin li jayc'ol alab nich'nabetic yu'unique; muc xch'ay ta yo'ntonic o. Ta jujuchop sbiic, ta jujun muc'tic lum, xchi'uc ta bic'tal lumetic ti bu nacalic batele la spasic, yu'un jech mu me xch'ay o sna'el yu'unic c'alal ta smomnich'nabtaquic li judaetique.

²⁹ Li me' ajvalil Ester stseb Abihaile xchi'uc li Mardoqueo judá vinique laj yac' lec sfirmaic ti c'alal la sts'ibaic batel li xchibal carta ta sventa q'uin Purime.

³⁰ Jech la stacbeic batel li judaetic te nacajtic batel ta scotol li vucub svucvinic (127) muc'tic lumetic sventainoj ajvalil Asueroe. Lec ta c'unil c'opetic la sts'ibaic batel; lec la spatbeic batel yo'ntonic.

³¹ Yu'un jech ac'o sna'ic o c'usi c'ac'alil tspasic li q'uin Purime, jech chac c'u cha'al yalojic mantal li Mardoqueo xchi'uc li me' ajvalil Estere. Yu'un jech ac'o spasic o xchi'uc yalab xnich'nabic. Jech mu xch'ay ta yo'ntonic c'usi ic'ot ta pasel ti c'alal ep laj yat yo'ntonic xchi'uc laj yictaic ixime.

³² Ti c'u x'elan laj yal mantal Ester ta sventa li q'uin Purime ja' jech icom o. Scotol le'e laj yich' ts'ibael ta vun.