Ester 8 - Bible in Tzotzil de Chenalhó with Deuterocanon

Li Asuero la xchapan c'u x'elan xu' tscolta li judaetique

¹ Li ajvalil Asueroe te no'ox ta sc'ac'alil laj yac'be ta sc'ob Ester li sna xchi'uc scotol c'usitic oy yu'un Amane, ja' li yajcontra judaetique. Li Mardoqueoe te ital ta stojol li ajvalile, yu'un li Estere yalojbe xa'ox ti ja' sjuntot li Mardoqueoe.

² Ja' yu'un li ajvalile ja' laj yac'be Mardoqueo li yixtolal sc'ob ti laj yich'be sutel li Amane. Li Estere ja' laj yac'be sventain Mardoqueo li c'usitic laj yich'be li Amane.

³ Li Estere la sc'opan yan velta li ajvalile; la squejan sba ta stojol te laj yoc'ta sba. La sc'anbe vocol ti ac'o slajesbe sc'oplal li c'usi sbol chapanoj Amán ti mu me xc'ot ta pasel chich' milel scotol li judaetique.

⁴ Li ajvalile la xbechbe ta stojol Ester li svaston pasbil ta c'anal taq'uine, jech li Estere itots, lic va'luc ta stojol li ajvalile,

⁵ jech laj yalbe: —Me lec chavilune, ajvalil, me lec ac'anojune, xchi'uc me lec chava'ay, me xc'ot ta avo'nton li c'usi ta xcale, ac'o ta ts'ibael yan cartaetic sventa ac'o lajuc sc'oplal li amantal spucoj batel ta carta li Amán sventa chac' ta milel scotol li jchi'iltac ti bu c'alal aventainoje.

⁶ Yu'un mu x'ech' chca'ay me chlaj ta milel scotol li jchi'iltaque, xchi'uc me ch-ul scotol li cuts' calaltaque —xut.

⁷ Li ajvalil Asueroe jech la stac'be li Ester xchi'uc li Mardoqueo, ja' li judá vinique: —Li vu'une laj xa cac'be Ester scotol c'usitic oy yu'un li Amane, xchi'uc laj xa cac' ta joc'anel ta te' li Amán ta sventa ti tsc'an ox chac' ta milel scotol li judaetique.

⁸ Li' ta orae xu' ta xcac' ac'o ats'ibaic batel cartaetic ta jbi sventa chacoltaic li achi'iltaquic ta judaile. Ts'ibaic ta jbi ti c'u x'elan lec chava'yique; aq'uic batel li sello cu'un sventa ajvalile. Yu'un me oy jun carta ti yich'oj batel jbi xchi'uc sello cu'un, vu'un li ajvalilune, mu'yuc boch'o xu' tsoques o —xi.

⁹ Ta yoxibal xcha'vinic (23) c'ac'al yochel li yoxibal u Sivane, lic staquic ta iq'uel li jts'ibajometic yu'un muc'ta ajvalile. Ja' jech la sts'ibaic scotol jech chac c'u cha'al laj yal li Mardoqueoe. Ja' laj yich'ic ts'ibabel batel li judaetique, li ajvaliletique xchi'uc li banquilaletic ti xlic ta India c'alal to ta Etiopía banamile; ja' vucub svucvinic (127) muc'tic lumetic ta scotol. Ta sc'op stuquic xchi'uc ta sts'ib stuquic laj yich'ic ts'ibabel batel ta jujun banamil xchi'uc ta jujun lum. Jech ec li judaetique ta sc'op stuquic xchi'uc ta sts'ib stuquic laj yich'ic ts'ibabel batel.

¹⁰ Scotol li cartaetique yich'oj lec sbi xchi'uc sello ajvalil Asueroe. C'alal lec xa chapal yu'unique, la staquic batel li boch'otic bat spuquic li cartae; ja' te la scajlebinic batel li ca'etic yu'un ajvalil ti bu lec tsots x'anilajique.

¹¹ Li ajvalile laj yal batel mantal ta cartaetic ti ac'o stsob sbaic buyuc no'ox lumal nacalic li judaetique; ac'o spoj abaic c'alal chtal milatuc yu'un li yajcontraic ta jujun muc'tic lum xchi'uc ta bic'tal lumetique.

¹² Ac'o spasic ta jun no'ox c'ac'al ta scotol c'u smuc'ul banamil sventainoj li ajvalil Asueroe, ja' li jun c'ac'al ti chapanbil xa ono'oxe, ja' li yoxlajunebal (13) c'ac'al yochel li xlajchabal u Adare.

¹³ Li mantal laj yich' puquel batel ta carta sventa chich' ac'bel sna'ic ta jujun muc'tic lum xchi'uc ta bic'tal lumetic ta xal ti ac'o xchapan sbaic ta sventa li jun c'ac'al le'e, yu'un ac'o spoj sbaic ta sc'ob li yajcontraique.

¹⁴ Li jpuccartaetique ta mantal yu'un ajvalil ibat spuquic ta scotol lumetic, xchi'uc ja' laj yac' batel li sca' stuc ti lec tsots xu' yu'unic anile, xchi'uc ja' ta smantal ti laj yich' puquel noxtoc te ta muc'ta lum Susae.

¹⁵ C'alal iloc' batel ta spasubmantal ajvalil li Mardoqueoe, slapoj xa loq'uel c'u'il sventa ajvalil, ja' yaxvac'antic sba xchi'uc sac, xchi'uc jun smuc'ta scoronail sjol pasbil ta c'anal taq'uin, xchi'uc jlic snatil c'u' pasbil ta lino no yax'elantic sba. Scotol li cristianoetic te ta lum Susae xcuxet no'ox yo'ntonic, x'avlajetic no'ox.

¹⁶ Jech ec li judaetique sac xi to osil laj yilic, xcuxet xa yo'ntonic, ich'bil ta muc' laj ya'yic.

¹⁷ Ta jujun banamiletic ta scotol lumetic ti bu ic'ot li mantal yu'un ajvalile bats'i xcuxet no'ox yo'ntonic li judaetique; la spasic lec q'uin, laj yaq'uic lec ve'el. Oy ep cristianoetic ta jujun lum la xa scuy sbaic ta judá vinic ec, yu'un toj ep xi'elal laj ya'yic li judaetique.