Ester 7 - Bible in Tzotzil de Chenalhó with Deuterocanon

Ja' laj yich' joc'anel ta te' li Amane

¹ Li ajvalil xchi'uc li Amane ibatic ta ve'el ti bu chapanbil yu'un li Estere.

² Ta yoc'omal c'alal te chve'ic te chuch'ic pasem ya'lel ts'usub li ajvalile, jech la sjac'be li Estere: —Ester, ¿c'usi ti oy ta avo'nton chac'anbune? Albun, chacac'bot; ac'o me chac'anbun o'lol ti c'u smuc'ul jventainoje, xu' chacac'bot —xut.

³ Itac'ov li Estere: —Me lec chavilune, ajvalil, me lec chava'ay li c'usi chcale, jun no'ox li c'usi oy ta co'nton ta jc'anbote. Ja' ta jc'anbot ti mu me xavac'un ta milele, xchi'uc mu me xavac' ta milel ec li jchi'iltaque.

⁴ Yu'un li vu'un xchi'uc scotol li jchi'iltaque chonbiluncutic xa ta c'abal jcotolcutic ti ac'o quich'cutic ulesele. Ti ja'uc no'ox chonbiluncutic sventa mozoile, mu'yuc c'usi chcal; mu xtal jtij xc'uxul ajol ti jechuque —xut.

⁵ Li ajvalil Asueroe jech la sjac'be li Estere: —¿Boch'o vinical ti tsc'an tspas jeche? —xi.

⁶ Itac'ov li Estere: —¡Li jcontrainvaneje, li pucujil vinique ja' li bol vinic Amán li' chotole! —xut. C'alal laj ya'ay li Amane, toj batel xch'ulel ta xi'el ic'ot ta stojol li ajvalile xchi'uc li Estere.

⁷ Ta ora iva'i li ajvalile, bats'i tsots ch-ilin ta jyalel; te ibat ta ts'unubaltic te ta spasubmantal. Yan li Amane te icom sc'anbe vocol Ester ti mu me x'ac'at ta milele, yu'un laj yil ti xu' ch-ac'at o ta milel yu'un li ajvalile.

^8-9 Li ajvalile isut tal yan velta te yo' bu oy li ve'lile, pero li Amane ja'o la spatan sba ta sc'anbe vocol bu chcux yo'nton li Estere. Li ajvalile jech laj yal: —¿Me yu'un chac'an chavuts'inta li' ta jna noxtoc li Estere? —xut. C'alal naca to laj yal jech li ajvalile, li j'abteletic yu'une, la smacbeic sat li Amane. Oy jun j'abtel yu'un, Harbona sbi, jech laj yalbe li ajvalile: —Te ta sna li Amane oy yac'oj ta pajel lec te' sventa te tsjoc'an ox li Mardoqueo li boch'o lec c'usi laj yal ta atojole. Li te' spajojique oy van chibuc xcha'vinic (22) metro stayal —xut. Li ajvalile jech yal: —Ja' te xbat ajoc'anic —xi.

¹⁰ Ja' yu'un li Amane ja' te laj yich' joc'anel stuc yo' bu chapanbil xa'ox yu'un ta sventa te tsjoc'an ox li Mardoqueoe. Ja' to jech ilaj sc'ac'al yo'nton li ajvalile.