Ester 6 - Bible in Tzotzil de Chenalhó with Deuterocanon

I'ac'at ta ich'el ta muc' Mardoqueo

¹ Te no'ox ta yac'ubalil, muc xtal svayel laj ya'ay li ajvalile, jech te lic yal mantal ti ac'o yich'ic tal li vun yo' bu ts'ibabil li c'usitic c'otem ta pasel ta sjunul slumalique, yu'un ac'o aptabatuc te ta stojol.

² Te ts'ibabil la staic ti laj yal Mardoqueo ti ta ox xmilat yu'un yaj'abteltac li ajvalil Asueroe, ja' li Bigtán xchi'uc Terese.

³ Ja' yu'un li ajvalile jech la sjac': —¿C'usi smoton laj yich', c'usi ich'el ta muc' la sta li Mardoqueo ti jech la spase? —xi. Itac'ov li j'abteletic yu'une: —Me jutuc mu'yuc c'usi staoj —xiic.

⁴ Li ajvalile jech la sjac': —¿Boch'o te oy ta amaq'ue? —xi. Ja' xa'ox te oy batel ta yamaq'uil spasubmantal ajvalil li Amane, yu'un bat sc'anbe ajvalil ti ac'o yich' joc'anel ta te' li Mardoqueo ti bu yac'oj xa ta pajele.

⁵ Itac'ovic li j'abteletic yu'un ajvalile: —Ja' Amán; te chanov tal —xutic. —Ac'o ochuc tal —xi li ajvalile.

⁶ Li Amane i'och batel. Li ajvalile jech la sjac'be: —¿C'usi ta jpasbe xana' li boch'o ta jc'an chcac' ta ich'el ta muq'ue? —xut. Li Amane jech la snop ta yo'nton: “¿Boch'o yan tsc'an chac' ta ich'el ta muc' li ajvalile? Ja' no'ox vu'une”, xi.

⁷ Li Amane jech la stac'be li ajvalile: —Li c'usi tsc'an chapasbe li vinic boch'o chac'an chavac' ta ich'el ta muq'ue,

⁸ ja' ac'o yich' ich'bel tal li ac'u' ti bu chalap vo'ot li ajvalilote, xchi'uc li acajleb ca'e, xchi'uc li acorona te oy ta ajole.

⁹ Li c'u'il xchi'uc li aca'e ac'o yich' ac'bel ta sc'ob junuc li boch'o banquilal ta stojol li j'abteletic avu'une. Ja' ac'o slapbe li vinic ti chac'an chavac' ta ich'el ta muq'ue, xchi'uc ac'o scajan batel ta aca'. Ac'o yic' batel ta o'lol yut lum; ac'o avanuc batel ta ba'yucbe yu'un, jech ac'o yal: ‘¡Ja' jech chich' pasbel li vinic ti tsc'an chac' ta ich'el ta muc' li ajvalile!’, ac'o xiuc batel —xi.

¹⁰ Li ajvalile jech laj yalbe li Amane: —Lec oy, batan ta ora; ich'o batel li jc'u'e xchi'uc li jca' jech chac c'u cha'al laj avale. Ja' jech xbat apasbe li Mardoqueo judá vinic le' chotol ta sti' jpasubmantale. Ja' me jech xapas scotol ti c'u x'elan laj avale —xut.

¹¹ Li Amane la stsac li c'u'il xchi'uc ca'e. Laj yac'be slap li Mardoqueoe, xchi'uc la scajan batel ta ca'. La snitbe batel sca' ta ba'yucbe; te laj yic' batel ta o'lol yut lum; te x'avet batel ta ba'yucbe, jech i'avan: “¡Ja' jech chich' pasbel li vinic boch'o tsc'an chac' ta ich'el ta muc' li ajvalile!”, xi.

¹² C'alal isutic batel ta xanel lum li Mardoqueoe, te ibat ta sti' spasubmantal li ajvalile; yan li Amane ta ora isut batel ta sna, chat xa yo'nton xchi'uc smacoj batel sat.

¹³ Scotol li c'usitic ic'ot ta pasele c'ot yalbe ya'ay yajnil xchi'uc li boch'otic lec sc'opan sba xchi'uque. Jech i'albat: —Ti me ja' li judá vinic Mardoqueo ti laj xa yac' bic'tajuc ac'oplale, mu xu' avu'un chatsal o; ta jbel sc'oplal vo'ot no'ox tsalbil chac'ot yu'un —x'utat.

¹⁴ Mu'yuc to chlaj yo'ntonic ta lo'il ti c'alal ic'otic j'abteletic yu'un ajvalil sventa yiq'uel li Amane, yu'un ac'o batuc ta ora ta ve'el ti chapanbil xa yu'un li Estere.