Ester 5 - Bible in Tzotzil de Chenalhó with Deuterocanon

Li Estere ibat ta stojol ajvalil

¹ C'alal i'ech' oxib c'ac'ale, li Estere la slap lec sc'u' sventa yajnil ajvalil, i'och batel ta yamaq'uil spasubmantal li ajvalile; te iva'i ta nopol sti' bu chotol tspas mantal li ajvalile.

² C'alal laj yil ajvalil ti te oy ta amac' li Estere, laj yac'be yil ti lec chile; la xbech li svaston te stsacoj ti pasbil ta c'anal taq'uine. Jech li Estere inopaj batel; laj yac' sc'ob ta sni' li vastone.

³ Li ajvalile jech la sjac'be: —¿C'usi tal apas, Ester? ¿C'usi tal ac'an? Ac'o me chac'anbun o'lol ti c'u smuc'ul jventainoje chacac'bot —xut. Itac'ov li Estere:

⁴ —Me lec chava'ye, ajvalil, avocoluc la'ic ta ve'el tana achi'uc li Amane, yu'un chapanbil xa lec ve'lil cu'un sventa chaquich'ot ta muc', vo'ot li ajvalilote —xut. Jech lic yal mantal li ajvalile:

⁵ —T'unic ta ora bu oy li Amane, yu'un ac'o c'otuc ta pasel c'usi tsc'an li Estere —xi. Ja' yu'un li ajvalil xchi'uc Amane ibatic ta ve'el yo' bu xchapanoj xa lec li Estere.

⁶ C'alal te xa chve'ic te xa chuch'ic pasem ya'lel ts'usube, li ajvalile jech lic yalbe li Estere: —C'anbun li c'usi chac'ane; ac'o me chac'anbun o'lol ti c'u smuc'ul jventainoje, chacac'bot —xut.

⁷ Itac'ov li Estere: —Li c'usi ta jc'ane ja' li'i:

⁸ Me lec chavilune, ajvalil, me oy ta avo'nton chavac'bun li c'usi chajc'anbote, la' to ve'anic oc'om achi'uc li Amane, ja' jech ta jchapan lec ve'lil yan velta sventa chaquich'ot ta muc'. Ja' to xu' te ta xcalbot li c'usi ta jc'ane —xut.

Li Amane la xchapan bu xu' tsjoc'an li Mardoqueoe

⁹ C'alal iloc' batel li Amane, toj xcuxet no'ox, toj jun no'ox yo'nton. Pero c'alal laj yil te chotol ta sti' spasubmantal ajvalil li Mardoqueoe, ti muc xbac', muc stots me jutuque, bats'i tsots i'ilin.

¹⁰ Pero muc xac' ta ilel ti toj tsots ch-iline. C'alal ic'ot ta snae, la stac ta iq'uel li boch'otic lec sc'opan sba xchi'uque, xchi'uc Zeres, ja' li yajnile.

¹¹ Te lic yalbe ya'yic ti toj ep li sc'ulejale, xchi'uc ti toj ep xnich'nabe, xchi'uc ti ac'bil tsots yabtel yu'un li ajvalile, ti ja' no'ox stuc banquilal yu'un scotol li banquilaletic xchi'uc j'abteletic yu'un ajvalile.

¹² Jech laj yal noxtoc: —Vu'un no'ox jtuc laj yic'un ta ve'el nax jchi'uc ajvalil li Estere. Jech noxtoc oc'om chiyic'uncutic ta ve'el yan velta jchi'uc li ajvalile.

¹³ Pero oy jun ti c'usi mu lecuc chquile, yu'un c'alal chquil jujun velta te chotol ta sti' spasubmantal ajvalil li Mardoqueoe, mu'yuc jtu chiyilun o —xut.

¹⁴ Li Zeres, ja' li yajnile, xchi'uc li boch'otic lec sc'opan sba xchi'uque, jech laj yalic: —Ja' lec ac'o ta pajel te' chib xcha'vinic (22) metro stayalil. Sob oc'om xu' chac'anbe ajvalil ti te ac'o yich' sjoc'anel li Mardoqueoe, jech xcuxet no'ox avo'nton xu' chbat ve'an achi'uc li ajvalile —xutic. Li Amane toj lec laj ya'ay li c'usi i'albate, jech lic yac' ta chapanel li te'e.