Ester 4 - Bible in Tzotzil de Chenalhó with Deuterocanon

Li Estere ta snop c'u x'elan tscolta li xchi'iltac ta judaile

¹ C'alal laj ya'ay Mardoqueo li c'usi chapanbile, la sli' sc'u', la slap c'u'il sventa at-o'nton ti ch'ixlajan ta lapele, xchi'uc laj yac' tan ta sjol. Ilic ta xanubal te ta lum, solel x'avet x'oc'olet no'ox ta tsots at-o'nton.

² Te ic'ot c'alal ta sti' spasubmantal li ajvalile, pero mu xu' ch-och batel ta stojol ajvalil ta sventa li sc'u' slapoje.

³ Scotol li judaetic ta jujun banamil ti bu ipuc batel smantal li ajvalile, ep laj yat yo'ntonic, ep i'oq'uic, laj yictaic ixim, la xmochan sbaic ta tantic, la slapic c'u'il sventa at-o'nton ti ch'ixlajan ta lapele.

⁴ Li me' ajvalil Estere te ital albatuc yu'un li squiarataque xchi'uc li viniquetic ti ja' yajchabiele. C'alal laj ya'ay li Estere, toj vocol laj ya'ay. Te lic stacbe batel sc'u' li Mardoqueoe yu'un ac'o sloc' li c'u'il sventa at-o'nton ti ch'ixlajan ta lapele, pero muc sc'an li Mardoqueoe.

⁵ Ja' yu'un li Estere te lic yic' li Hatac, ja' li j'abtel yu'un ajvalil ti te chtun ta stojole, la stac batel ta stojol li Mardoqueoe yu'un ac'o bat sjac'be c'usi chc'ot ta pasel, xchi'uc c'u yu'un ti jech spasoj sbae.

⁶ Li Hataque bat sc'opan li Mardoqueo ti te oy ta yeloval sti' spasubmantal ajvalile.

⁷ Li Mardoqueoe laj yalbe ya'ay li c'usi c'otem ta pasele, xchi'uc ti c'u yepal saquil taq'uin chac' li Amán sventa sc'ulejal ajvalil yu'un ac'o yich'ic milel scotol li judaetique.

⁸ Jech noxtoc laj yac'be batel jlic li vun ti laj yich' puquel te ta lum Susa yo' bu ts'ibabil jun mantal ti chich'ic milel scotol li judaetique, yu'un jech ac'o sna' lec Ester li c'usitic chapanbile. Xchi'uc laj yalbe ti ac'o bat c'opojuc ta stojol ajvalil li Estere, ti ac'o sc'anbe vocol, ti ac'o sva'an sba ta scoltael li xchi'iltac ta judaile.

⁹ Li Hataque isut batel ta stojol li Estere, c'ot yalbe ya'ay scotol c'usi laj yal li Mardoqueoe.

¹⁰ Li Estere lic stac batel yan velta ta stojol Mardoqueo li Hataque, jech laj yalbe:

¹¹ “Scotol li j'abteletic yu'un ajvalile xchi'uc li cristianoetic ta jujun banamil ti bu c'alal sventainoj li ajvalile sna'ojic ti oy jun mantal ta sventa li boch'o jech no'ox ta x'och batel ta stojol ajvalile. Me mu'yuc ic'bile, persa ac'o chamuc, ac'o me vinic o me ants. Ja' no'ox mu'yuc chich' milel li boch'o ta xbechbat yu'un ajvalil li svaston pasbil ta c'anal taq'uine. Li vu'une oy xa lajuneb xcha'vinic (30) c'ac'al mu'yuc chi'ic'at o ta sq'uelel li ajvalile”, xut batel.

¹² C'alal c'ot yalbeic Mardoqueo c'usi laj yal li Estere,

¹³ jech laj yal batel li Mardoqueoe: “Mu me xanop ti vo'ot mu xalaj ta milel ta scoj ti te oyot ta spasubmantal ajvalile, yu'un vo'ot judá antsot ec.

¹⁴ Yu'un me te no'ox ch'anxachi, me mu'yuc c'usi chapase, xu' yan bu tstaic coltael li judaetique. Pero li vo'ot, xchi'uc atot ame'e, xchi'uc li avuts' avalaltaque ta persa chchamic. Oy yic'al yu'un vo'ot t'ujbilot sventa chacoltautic ti vo'ot la'och ta me' ajvalile”, xut batel.

¹⁵ Li Estere jech laj yalbe batel li Mardoqueoe:

¹⁶ “Batan te ta lum Susa; tsobo scotol li jchi'iltactique; ac'o yictaic ixim sventa chacoltaicun. Mu me c'usi xave'ic; mu me c'usi xavuch'ic oxib c'ac'al xchi'uc oxib ac'ubal. Ja' jech ta jpascutic ec xchi'uc li jquiarataque. Ja'o chibat ta stojol li ajvalile ac'o me mu jechuc chal li mantale. Me te lichame, ac'o chamcun”, xut batel.

¹⁷ Li Mardoqueoe ibat; la xch'un scotol c'usi laj yal li Estere.