Ester 3 - Bible in Tzotzil de Chenalhó with Deuterocanon

La snop c'u x'elan xu' chules scotol judaetic li Amane

¹ C'alal i'ech' xa'ox jayibuc c'ac'ale, li ajvalil Asueroe laj yac'be muc' yabtel li Amán xnich'on Hamedata smomnich'on Agague; ja' banquilal ic'ot yu'un scotol li j'abteletic yu'une.

² Scotol li j'abteletic yu'un ajvalile la squejan sbaic ta stojol; la snupbeic sc'ob c'alal te chjelov ta sts'elique, xchi'uc ti c'alal chc'otic ta stojole, yu'un jech yaloj mantal li ajvalile. Yan li Mardoqueoe mu'yuc la squejan sba ta stojol; mu'yuc la snupbe sc'ob.

³ Li j'abteletic yu'un ajvalile jech la sjac'beic li Mardoqueoe: “¿C'u yu'un mu xach'un li mantal yu'un ajvalile?”, xutic.

⁴ Scotol c'ac'al jech la sjaq'uilanbeic, pero mu'yuc laj yich' ta muc'. Jech te bat yalbeic ya'ay li Amane, yu'un tsq'uelic me solel jech yo'nton o li Mardoqueoe, yu'un yaloj xa ono'ox ta jamal ti ja' judá vinique.

⁵ C'alal laj yil Amán ti mu'yuc xtal squejan sba ta stojol li Mardoqueoe ti mu'yuc xnupbat sc'obe, bats'i tsots i'ilin ta jyalel.

⁶ Ta sventa ti yalojbeic xa ono'ox bu liquem sts'unubale, jech la snop ti mu ja'uc no'ox chac'be stoj smul stuque; la snop ti ja' lec ta xules o scotol li judaetic te nacajtic yo' bu sventainoj li ajvalil Asueroe.

La xchapanic ti chulesic o li judaetique

⁷ Ta sba u Nisán ta xlajchabal jabil yochel ta ajvalilal li Asueroe, la spasic canal tajimol te ta stojol Amán ta sventa tsna'ic c'usi c'ac'alil, c'usi ual xu' tspasic li c'usi la snope. Ja' ic'ot ta yoxlajunebal (13) c'ac'al yochel li xlajchabal ue, ja' ta yual Adar.

⁸ Li Amane jech laj yalbe li ajvalil Asueroe: —Oy jun lum ta scotol li lumetic c'u smuc'ul aventainoje, voc'ol no'ox yac'oj sba, mu xich' ta muc' li mantaletic avu'une xchi'uc toj yan o li mantaletic yu'unique; mu xco'laj xchi'uc li mantal yu'unic yantic lumetique. Ajvalil, mu'yuc stu avu'un me li' no'ox nacalic li jun lum le'e.

⁹ Ajvalil, me xac'ane, alo batel mantal ti ac'o yich'ic milele. Vu'un ta xcac'be vo'lajunvinic xchi'uc lajuneb xcha'vinic ta mil (330,000) kilo saquil taq'uin li j'abteletique; ja' ac'ulejal chc'ot vo'ot li ajvalilote —xut.

¹⁰ Li ajvalile la sloq'ues yixtolal sc'ob; laj yac'be li Amane, ja' li yajcontra judaetique.

¹¹ Jech laj yalbe: —Te ich'o comel atuc li saquil taq'uine, xchi'uc pasbo c'usi tsc'an avo'nton li jun lum chavale —xut.

¹² Ta yoxlajunebal (13) c'ac'al yochel li sba ue, laj yich' tsobel li jts'ibajometic yu'un muc'ta ajvalile. Ja' la stsaquic ta vun li c'usitic laj yal Amane; la stacbeic batel li ajvaliletic xchi'uc li banquilaletic ta jujun lume. Ta sc'op stuquic, xchi'uc ta sts'ib stuquic laj yich'ic ts'ibabel batel ta jujun muc'tic lum, xchi'uc ta bic'tal lumetic. Ta sbi xchi'uc ta sello ajvalil Asuero la sts'ibaic batel.

¹³ Jech la staquic batel ta jujun lum ti bu c'alal sventainoj li ajvalile. Laj yalic batel ti ta jun no'ox c'ac'al ac'o smilic scotol li judaetique, c'alal ta vinic, ta ants, ta ololetic, xchi'uc ac'o yich'beic scotol li c'usitic oy yu'unique. Li sc'ac'alil chc'ot yu'unique ja' ta yoxlajunebal (13) c'ac'al yochel li xlajchabal u Adare.

¹⁴ Li copia yu'un li carta ti la staquic batel ta jujun ti lume laj yich' puquel ta jujun bic'tal lum noxtoc, yu'un ja' jun mantal icom o ti tsc'an chapalic lec ta sventa li jun c'ac'al ch'acbil yu'unique.

¹⁵ Ta smantal ajvalil laj yich' puquel ta ora li cartaetique. Li c'usi laj yich' chapanele la spuquic noxtoc te ta lum Susa, ja' li muc'ul lum yo' bu nacal li ajvalile. Li ajvalil xchi'uc Amane jun yo'nton te chotolic ta x'uch'bajic. Pero scotol li cristianoetic te ta lum Susae mu xa sna' c'usi tspasic ic'otic.