Ester 2 - Bible in Tzotzil de Chenalhó with Deuterocanon

Ja' laj yich' t'ujel ta yajnil ajvalil li Estere

¹ C'alal i'ech' jayibuc c'ac'ale, li ajvalil Asueroe i'ech' xa'ox li sc'ac'al yo'ntone. Jech te it'ab ta yo'nton li yajnile, xchi'uc li c'usi la spasbee, xchi'uc li c'usi la xchapanic ta sventae.

² Ja' yu'un li j'abteletic yu'une jech laj yalic: —Ja' lec ac'o yich' t'ujel tal tojol tsebetic ta sventa li ajvalile; ja' ac'o yich' t'ujel tal ti bu lec c'upilic sbae.

³ Li ajvalile ac'o sva'an viniquetic ta jujun lum, yu'un ja' ac'o tal yaq'uic li tsebetic te ta snail antsetic yu'un ajvalil ta lum Susae. Ja' ac'o xchabi li Hegai, ja' li jchabi antsetic yu'un ajvalile, xchi'uc ja' ac'o sc'ac'ubtas lec.

⁴ Ti bu junucal tseb c'upil sba chil li ajvalile ja' ac'o comuc ta xq'uexol li Vastie —xi. Toj lec laj ya'ay li ajvalile, jech la spas.

⁵ Te ta lum Susa yo' bu nacal li ajvalile, oy jun judá vinic Mardoqueo sbi. Ja' xnich'on Jair; ja' smoltotac li Simei xchi'uc Cis ti liquemic ta Benjamine.

⁶ Ja' co'ol chucbil iloq'uic batel ta Jerusalén xchi'uc xchi'iltac, xchi'uc ajvalil Jeconías ta Judá yu'un li ajvalil Nabucodonosor ta Babiloniae.

⁷ Li Mardoqueoe ja' la sts'ites li Hadasa, ja' li Ester yan sbie, ja' stseb sjuntot. Yu'un c'alal icham li stot sme'e, ja' la sts'ites; la scuy ta xnich'on. Li tsebe toj lec c'upil sba.

⁸ C'alal ipuc batel mantal yu'un li ajvalile, la stsobic batel ep tsebetic ta lum Susa. Te laj yich' iq'uel batel ec li Estere. Ja' la xchabi li Hegai, ja' li jchabi antsetic yu'un ajvalile.

⁹ Li Hegaie toj lec laj yil li tsebe, jech ta ora la sc'ac'ubtas lec, xchi'uc laj yac'be lequil ve'liletic, xchi'uc laj yac'be squiarain vucub tsebetic ti toj ven lequic te ta sna li ajvalile. Ja' te laj yac' ochuc xchi'uc squiaratac ti bu toj lec li na te ta snail antsetique.

¹⁰ Li Estere mu'yuc laj yal bu slumal, xchi'uc boch'o yuts' yalaltac, yu'un li Mardoqueoe yalojbe ono'ox ti mu me xal bu liqueme.

¹¹ Li Mardoqueoe jujun c'ac'al te chtalilan va'etel ta yamaq'uil li snail antsetique, yu'un tsc'an tsna' c'u x'elan li Estere xchi'uc c'usi chc'ot ta pasel ta stojol.

¹² Ta sventa li tsebetic, le'e oy mantal ti jun jabil chich'ic c'ac'umtasel leque, xchi'uc chich'ic ac'bel lec perfume. Vaquib u chich'ic jaxbel mirra, vaquib u chich'ic jaxbel muil poxil, xchi'uc cremaetic ta sventa li antsetique. C'alal me its'aqui jech yepal c'ac'ale, ja'o chbat sva'an sbaic ta junjuntal ta stojol li ajvalile.

¹³ Xu' chich'ic ac'bel batel li c'usitic tsc'anique yu'un jech lec smeltsanoj sbaic ti c'alal chbatic ta stojol ajvalile.

¹⁴ Ta bat c'ac'al chbatic ta stojol li ajvalile, ta yoc'omal te xa chbatic ta yan jbej snail antsetic li boch'o lec i'ilate, ti oy ta sventa chchabi li Saasgaz, ja' li boch'o chchabibe yan antsetic yu'un ajvalile. Mu'yuc xa chbatic ta stojol ajvalil yan velta; ja' xa no'ox ti bu junucal ic'ot ta yo'nton li ajvalile ja' chlic tstac ta iq'uel.

¹⁵ C'alal iloc' sbi ti chbat ta stojol ajvalil li Ester, stseb Abihail sjuntot Mardoqueoe, ja' ti la sts'ites li Mardoqueoe, ja' no'ox jech ibat ti c'u x'elan i'ac'bat batel yu'un li Hegaie. Li Estere toj lec c'anbil ta scotol li boch'otic laj yilique.

¹⁶ Li Estere i'ic'at batel ta spasubmantal ajvalil Asuero ta slajunebal u, ja' ta yual Tébet, ta svucubal jabil yochel ta ajvalilal li Asueroe.

¹⁷ Li ajvalile ja' no'ox stuc toj c'upil sba laj yil li Ester ta scotol li yantic tsebetic te oye; mu'yuc yan tseb ti toj lec laj yile. Ja' no'ox te teq'uel yo'nton ic'ot ta stojol li Estere. Jech laj yac'be scoronail sjol sventa yajnil ajvalil; ja' icom o ta xq'uexol li Vastie.

¹⁸ Li ajvalil Asueroe lic spas jun muc'ta q'uin xchi'uc banquilaletic, xchi'uc j'abteletic yu'un ta sventa li Estere. Xchi'uc la stsulesbe jutuc spatanic li jujun lum bu c'alal sventainoje, xchi'uc laj yac' ep matanaletic ti c'u yepal iloc' ta yo'ntone.

Li Mardoqueoe laj yal ti oy boch'o tsc'an tsmil li ajvalile

¹⁹ C'alal xchibal velta xa'ox laj yich'ic tsobel li stsebetique, li Mardoqueoe te chotol ta sti' spasubmantal li ajvalile.

²⁰ Li Estere albil ono'ox yu'un Mardoqueo ti mu me xal bu slumal, xchi'uc boch'o yuts' yalale. La xch'un c'usi i'albat yu'un li Mardoqueoe yu'un ja' ventainbil yu'un.

²¹ C'alal te chotol ta sti' spasubmantal ajvalil li Mardoqueoe, i'ilin chib jchabi ti'naetic yu'un ajvalil, ja' Bigtán xchi'uc Teres sbiic, jech tsc'an tsmilic li ajvalil Asueroe.

²² C'alal laj ya'ay li Mardoqueoe, bat yalbe li Estere, ja' li yajnil ajvalile. Li Estere ja' xa laj yalbe ec li ajvalil ti jech laj yal li Mardoqueoe.

²³ Te lic sjaq'uic lec me melel; te laj ya'yic ti ja' melele. Ja' yu'un bat yich'ic joc'anel ta te' li chib jchabi ti'naetique. Laj yich' ts'ibael ta vun ti c'u x'elan ic'ot ta pasele. Ja' te laj yich' ts'ibael ta svunal li c'usitic chc'ot ta pasel yu'un ajvaliletique.