Ester 1 - Bible in Tzotzil de Chenalhó with Deuterocanon

La spas q'uin li ajvalil Asueroe

¹ Li'i ja' jech ic'ot ta pasel c'alal ja'o ochem ta ajvalilal li Asueroe; ja' sventainoj vucub svucvinic (127) muc'tic lum xlic ta India c'alal to ta Etiopía.

² Ja' te laj yich' yabtel ta lum Susa, yu'un ja' muc'ta lum yu'un scotol li yantic lumetic ti bu c'alal la sventaine.

³ C'alal yoxibal jabil xa'ox yochel ta muc'ta ajvalilale, la spas jun muc'ta q'uin ta sventa scotol li banquilaletic xchi'uc li j'abteletic yu'une. Te oyic noxtoc li banquilal soldadoetic ta Persia xchi'uc ta Mediae, xchi'uc li ajvaliletic, li banquilaletic ta jujun muc'tic lume.

⁴ Yu'un ta xac'be yil c'u x'elan li sc'ulejale xchi'uc c'u x'elan smuc'ul li yabtele, ti mu'yuc boch'o jech yan toj muc' yabtele. Li q'uin la spase ijalij o'lol jabil.

⁵ C'alal its'aqui jech yepal c'ac'ale, lic spas yan vucub c'ac'al q'uin te ta yamaq'uil spasubmantal; ja' sventa scotol li cristianoetic te nacalic ta lum Susae, c'alal ta biq'uit ta muc' laj yic'an.

⁶ Li amaq'ue lec c'upil sba pasbil, setbil ta saquil poc', ta yaxal poc', xchi'uc ta ic'ic'tic sba, joc'anbil ta ch'ojon pasbil ta lino no, ic'ic'tic sba stsajal; yich'oj lec xotajtic saquil taq'uin, xchi'uc yoyal pasbil ta mármol. Li muc'tic chotlebale pasbil ta c'anal taq'uin ta saquil taq'uin. Li banamile macbil ta pórfido, ta mármol, ta alabastro, xchi'uc ta jacinto tonetic.

⁷ Li vasoetic sventa c'usi laj yuch'ique pasbil ta c'anal taq'uin, pero yantic o c'u x'elan pasbil jujun. Jech noxtoc ep pasem ya'lel ts'usub laj yac' li ajvalile, ja' ti c'u yepal iloc' ta yo'nton chaq'ue.

⁸ Li ajvalile laj yalbe mantal jchabinaetic yu'un ti mu'yuc sujelal li uch' ya'lel sts'usube, ja' no'ox ti c'u yepal tsc'an jujunique.

⁹ Jech ec li Vasti, ja' li yajnil ajvalile, la spas q'uin ta sventa yajnilic ec li boch'otic ic'bilic ta q'uel q'uine; ja' te la spasic q'uin ta spasubmantal li ajvalile.

¹⁰ C'alal svucubal xa'ox c'ac'al li q'uine, li ajvalil Asueroe lec xa'ox q'uixnajem ta yuch'el li pasem ya'lel sts'usube, jech te lic spas ta mantal li vucub viniquetic ti chchabibeic c'usitic oy yu'une, ja' li Mehumán, Bizta, Harbona, Bigta, Abagta, Zetar, xchi'uc Carcase.

¹¹ Laj yalbe ti ac'o bat yiq'uic tal li Vasti, ja' li yajnil ajvalile; ac'o taluc lec xchi'uc scoronail sjol, yu'un tsc'an chac'be sq'uel yantic lumetic xchi'uc banquilaletic ti toj c'upil sba li yajnile.

¹² Li Vastie muc xch'un iq'uel yu'un smalal ta sventa li vucub viniquetique. Ja' yu'un li ajvalile i'ilin, bats'i tsots ilic sc'ac'al yo'nton.

¹³ Te lic sjac'be c'usi tspas li bijil viniquetic ti sna'ic sq'uelel senyail ta vinajele. Yu'un li ajvalile jech ono'ox nopen xa'ay tsjac'be c'usi lec tspas li boch'otic xotquinic li mantaletic yu'un slumalique, xchi'uc ti sna'ic c'usi tsc'an pasele.

¹⁴ Li boch'otic te oyic ta stojol ajvalile ja' Carsena, Setar, Admata, Tarsis, Meres, Marsena, xchi'uc Memucán. Ja' vucub banquilaletic liquemic ta Persia xchi'uc ta Media; ja' te tscoltaic ta snopel c'usi lec tspas li ajvalile xchi'uc ja' yich'oj tsots yabtelic ta stojol ajvalil ta sventa ti c'u smuc'ul banamil sventainoje.

¹⁵ Li ajvalile jech lic sjac': —¿C'usi chal li mantaletic cu'untique? ¿C'usi xu' ta jpas xana'ic ta sventa li Vasti ti muc xch'un iq'uel cu'un c'alal la jtac batel li j'abteletic cu'une? —xi.

¹⁶ Te itac'ov ta stojol ajvalil xchi'uc ta stojol banquilaletic li Memucane, jech laj yalbe li ajvalile: —Mu ja'uc no'ox la sta smul ta atojol li Vastie; la sta smul ta stojolic ec li banquilaletique xchi'uc ta scotol li lumetic bu c'alal aventainoje.

¹⁷ Li c'usi la spas li Vastie ta ono'ox xa'yic scotol li antsetique, jech xu' mu xa xich' lec ta muc' ec li smalalique. Xu' jech chlic yalic: ‘Li ajvalil Asueroe la stac ta iq'uel yajnil, ja' li Vastie, pero muc xch'un’, xu' xiic.

¹⁸ C'alal cha'yic c'usi la spas avajnil li yajnil banquilaletic ta Persia xchi'uc ta Mediae xu' chlic yutilan sbaic xchi'uc smalalic ec.

¹⁹ Me lec chava'ye, ajvalil, ja' lec jchapantic junuc mantal ta sventa vo'ot li ajvalilote. Ac'o yich' ts'ibael ta svunal li mantaletic yu'un Persia xchi'uc Mediae, yu'un jech ac'o comuc o. Jech ta jts'ibatic chac li'i: ‘Li yajnil ajvalil, ja' li Vastie, mu xa me xtal o ta stojol li ajvalile’, xi ta jts'ibatic. Ja' lec sa'o yan me' ajvalil avu'un ti xjelov to slequil jech chac c'u cha'al le'e.

²⁰ Li c'usi la jchapantic li'i ac'o yich' puquel ta scotol ti bu c'alal aventainoje. Jech xu' chlic yich' ta muc' smalalic scotol li antsetique —xut.

²¹ Li c'usi laj yal Memucane toj lec laj ya'ay li ajvalile xchi'uc li banquilaletic te oyique, ja' jech la spas o li ajvalile.

²² Lic spuquic batel cartaetic ta jujun muc'tic lum ti bu c'alal sventainoje. Ta sc'op stuquic xchi'uc ta sts'ib stuquic la sts'ibabeic batel. Laj yalbeic batel ti ja' ac'o spasic o mantal te ta snaic li viniquetique, xchi'uc ti ac'o spuquic te ta jujun slumalic ta sc'op stuquic li mantal le'e.