Esdras 8 - Bible in Tzotzil de Chenalhó with Deuterocanon

Sbiic boch'otic isutic batel ta Jerusalén

¹ Li'i ja' sbiic li banquilaletic ta jujuchop sbiic ti co'ol iloq'uic batel ta Babilonia xchi'uc li Esdras c'alal ochem ta ajvalilal li Artajerjese, xchi'uc li' oy sbiic li smoltotic ta vo'onee:

^2-3 Gersón smomnich'on Finees; Daniel smomnich'on Itamar; Hatús xnich'on Secanías smomnich'on David; Zacarías xchi'uc lajuneb xvaxacvinic (150) viniquetic jmoj tsacajtic sbiic, ja' smomnich'nabtac Paros;

⁴ Elioenai xnich'on Zeraías smomnich'on Pahat-moab, xchi'uc lajunvinic (200) viniquetic la xchi'inic sutel;

⁵ Secanías xnich'on Jahaziel smomnich'on Zatu, xchi'uc yan vo'lajunvinic (300) viniquetic la xchi'inic sutel;

⁶ Ebed xnich'on Jonatán smomnich'on Adín, xchi'uc lajuneb yoxvinic (50) viniquetic la xchi'inic sutel;

⁷ Jesaías xnich'on Atalías smomnich'on Elam, xchi'uc yan lajuneb xchanvinic (70) viniquetic la xchi'inic sutel;

⁸ Zedaías xnich'on Micael smomnich'on Sefatías, xchi'uc yan chanvinic (80) viniquetic la xchi'inic sutel;

⁹ Obadías xnich'on Jehiel smomnich'on Joab, xchi'uc yan vaxaclajuneb xbuluchvinic (218) viniquetic la xchi'inic sutel;

¹⁰ Selomit xnich'on Josifías smomnich'on Bani, xchi'uc yan vaxacvinic (160) viniquetic la xchi'inic sutel;

¹¹ Zacarías xnich'on Bebai smomnich'on Bebai, xchi'uc yan vaxquib xcha'vinic (28) viniquetic la xchi'inic sutel;

¹² Johanán xnich'on Hacatán smomnich'on Azgad, xchi'uc yan lajuneb svacvinic (110) viniquetic la xchi'inic sutel;

¹³ Elifelet, Jeiel, xchi'uc Semaías ja' li slajeb xa smomnich'on Adonicame, xchi'uc yan oxvinic (60) viniquetic la xchi'inic sutel;

¹⁴ Utai xchi'uc Zabud smomnich'on Bigvai, xchi'uc yan lajuneb xchanvinic (70) viniquetic la xchi'inic sutel.

Sc'oplal j'abteletic ta ch'ulna

¹⁵ Vu'un li Esdrasune lic jtsob scotol ti jech yepal jchi'iltaque; te la jtsob jbacutic ta nopol bevo' chc'ot ta Ahavae. Oxib c'ac'al te lijalijcutic. C'alal la jq'uel scotol li jchi'iltaque xchi'uc li paleetique, me junuc leví vinic mu'yuc te oy.

¹⁶ Jech lic jtac batel li Eliezer, Ariel, Semaías, Elnatán, Jarib, Elnatán, Natán, Zacarías, xchi'uc Mesulam, ja' li viniquetic ti lec ich'bilic ta muq'ue. Xchi'uc la jtac batel noxtoc li Joiarib xchi'uc Elnatán, ja' li jchanubtasvanejetique.

¹⁷ Laj calbe ti ac'o baticuc ta stojol Ido, ja' li banquilal te ta jun lum Casifiae. Laj calbeic batel scotol c'usi chc'ot yalbeic li Ido xchi'uc xchi'iltaque, ja' li j'abteletic ta ch'ulna yu'unique. Yu'un ac'o yiq'uic tal viniquetic sventa chcoltavanic ta abtel ta ch'ulna yu'un li Dios cu'untique.

¹⁸ Coliyal Dios ti laj yiq'uic tal li Serebías ti lec bije. Ja' li xnich'on Malhi, smomnich'on Levie. Laj yiq'uic tal xchi'uc xnich'nab, xchi'uc yuts' yalaltac. Ja' vaxaclajuneb (18) ta scotolic.

¹⁹ Jech noxtoc laj yiq'uic tal li Hasabías xchi'uc Jesaías; ja' li smomnich'nabtac Merarie. Laj yiq'uic tal xchi'uc xnich'nabic xchi'uc yan xchi'iltaquic. Ja' jtob (20) ta scotolic.

²⁰ Yan li j'abteletic ta ch'ulna sventa tscoltaic ta abtel levietic jech chac c'u cha'al la xchapan comel li David xchi'uc li banquilaletic yu'une oy buluchvinic (220). Scotol le'e tsacajtic ta vun sbiic.

²¹ C'alal te oyuncutic ta nopol uc'um Ahavae, laj cal mantal ti ac'o quicta quiximcutic, yu'un jech ac'o cotquin jmulcutic ta stojol li Diose, xchi'uc ac'o jc'anbecutic ti ac'o xchabiuncutic batel ta be jchi'uc cajnil jnich'nabcutic xchi'uc c'usitic oy cu'uncutique.

²² Yu'un chiq'uexov ta stojol ajvalil me ta jc'anbe yajsoldadotac sventa ac'o scoltauncutic me oy bu la jta cajcontracutic ta bee. Yu'un jech ono'ox calojbe li ajvalile: “Li boch'otic ta sa'ic Diose, ta xcoltaatic yu'un. Yan li boch'otic ta scomtsanic yich'el ta muq'ue, tsots ta x'ilintaatic”, xcut ono'ox.

²³ Ja' yu'un laj quicta quiximcutic; la jc'anbecutic vocol Dios cu'untic ti ac'o scoltauncutique. Laj ya'ibun li jc'opcutique.

²⁴ Jech te lic jvoc' loq'uel lajchab banquilal yu'un li paleetique: ja' Serebías, Hasabías, xchi'uc lajuneb xchi'iltaquic.

²⁵ Te la jbisbeic li c'anal taq'uin, li saquil taq'uin, xchi'uc li c'usitic chtunan ta ch'ulna ti laj yac' ta sventa ch'ulna yu'un Dios li ajvalile, xchi'uc li yich'ub-c'optaque, xchi'uc li banquilaletic yu'une, xchi'uc scotol li jchi'iltactic te oyique.

²⁶ C'alal la jbise, laj cac'be ta sc'obic. Ja' jun xcha'vinic ta mil xchi'uc o'lol yo'bal ciento (21,450) kilo saquil taq'uin, xchi'uc vo'vinic (100) c'usitic chtun ta ch'ulna pasbil ta saquil taq'uin, xchi'uc oxmil xchi'uc oxib ciento (3,300) kilo c'anal taq'uin.

²⁷ Xchi'uc laj cac'beic noxtoc jtob (20) muc'tic tazaetic pasbil ta c'anal taq'uin, ja' vaxquib kilo yalal ta scotol. Xchi'uc chib vaso pasbil ta bronce, lec sts'ayayet pasbil, jutuc mu co'oluc stojol jech chac c'u cha'al pasbil ta c'anal taq'uin.

²⁸ Jech laj calbeic: “Li vo'oxuque ts'u'iltasbiloxuc yu'un Muc'ul Dios jech chac c'u cha'al ts'u'iltasbil li c'usitic chtun ta ch'ulnae. Li saquil taq'uin xchi'uc c'anal taq'uine ja' smoton li Muc'ul Diose, ja' li Dios yu'un jmoltotactique.

²⁹ Q'uelic me, chabiic me lec batel, ja' to me c'ot yich' bisel ta junuc cuarto te ta xch'ulna Muc'ul Dios ta stojol li banquilal paleetique, li levietique, xchi'uc li banquilaletic ta jujuchop sbiic jchi'iltactic te ta Jerusalene”, xcut li jchi'iltaque.

³⁰ Li paleetic xchi'uc levietique laj yich'ic li saquil taq'uin, li c'anal taq'uin, xchi'uc li c'usitic chtun ta ch'ulnae. Laj yich'ic batel ta ch'ulna yu'un Dios cu'untic te ta Jerusalén.

³¹ Ta xlajchabal c'ac'al yochel li sba ue, liloc'cutic batel ta nopol uc'um Ahava; libatcutic ta Jerusalén. Li Dios cu'untique la scoltauncutic ta sc'ob li cajcontracutique xchi'uc li j'eleq'uetic la jtacutic ta bee.

³² C'alal lic'otcutic ta Jerusalene, oxib c'ac'al la jcuxcutic.

³³ Ta xchanibal c'ac'ale lic yich' bisel li saquil taq'uin, li c'anal taq'uin, xchi'uc li c'usitic chtun ta ch'ulnae. Ja' i'och ta sc'ob li pale Meremot xnich'on Uriase. Li Uriase te xchi'uc li pale Eleazar xnich'on Fineese, xchi'uc li Jozabad xnich'on Jesuae, xchi'uc li Noadías xnich'on Binúi, ja' li levietique.

³⁴ C'alal laj yich' bisel, laj yich' atel c'u yepale, laj yich' ts'ibael ta vun.

³⁵ Li boch'otic iloq'uic tal ta chuquel ta yan banamile la xchiq'uic matanaletic ta stojol li Dios yu'un Israele, xchi'uc ta sventa scotol li israeletique. Ja' laj yaq'uic lajcha'cot (12) ch'ium vacax, vaclajuneb yo'vinic (96) tot chij, vuclajuneb xchanvinic (77) ch'ium chij, xchi'uc lajcha'cot (12) tot tentsun; ja' matanal ta sventa smulic. Laj yich' chiq'uel scotol ta stojol li Muc'ul Diose.

³⁶ Ts'acal bat yalbeic noxtoc c'usi yaloj batel ajvalil li j'abteletic, li jpasmantaletic te ta smaleb c'ac'al yu'un uc'um Eufratese. Jech lic yich'ic coltael li israeletique, xchi'uc laj yich'ic coltael ta sventa li ch'ulna yu'un Diose.