Esdras 10 - Bible in Tzotzil de Chenalhó with Deuterocanon

Li judaetique la sloq'uesic batel li yanlum antsetic yic'ojique

¹ C'alal te xquejet xpatet, te x'oc'olet ta sc'opanel Dios ta ch'ulna li Esdrase, te ital set sbaic ta stojol ep israeletic. C'alal ta vinic ta antsetic ta ololetic italic; bats'i ep laj yoc'ta sbaic ec.

² Ja' yu'un li Secanías xnich'on Jehiel, smomnich'on Elame, te lic c'opojuc, jech laj yalbe li Esdrase: “Toj tsots jtaoj jmulcutic ta stojol li Dios cu'untique, yu'un laj quic'ancutic li antsetic ta yantic lume. Ac'o me jech jpasojcutic, pero oy to c'uxubinel li' ta jtojoltic, vu'utic li israelutique.

³ Ja' lec jchapantic ta stojol Dios ti ac'o yich' taquel sutel li antsetic xchi'uc yalabic jech chac c'u cha'al chaval vo'ote xchi'uc li boch'otic chich'ic ta muc' mantaletic yu'un Diose. Ja' ac'o jpastic c'usi chal li mantaletique.

⁴ Lican me, yu'un vo'ot oy ta aventa xu' chapas. Li' chajcoltaotcutic ec; tsotsan, ac'o pasuc ta ora”, xut.

⁵ Jech lic sva'an sba li Esdrase. Laj yalbe banquilal paleetic, levietic, xchi'uc scotol israeletic ti ac'o yalic ta stojol Dios me tspasic li c'usi chale. Te laj yalic ta jamal scotolic ti tspasique.

⁶ Li Esdrase iloc' batel ta ch'ulna; ibat ta sna Johanán xnich'on Eliasib. Mu'yuc ve'em, mu'yuc yuch'oj vo', yu'un toj ep chat yo'nton ta sventa smulic li xchi'iltac ti i'ayic tal ta chuquel ta yan banamile.

⁷ Te lic spuquic mantal ta scotol Judá xchi'uc ta Jerusalén ti ac'o stsob sba scotolic te ta Jerusalén li boch'otic isutic batel ta yosilalique.

⁸ Li boch'otic mu xc'otic ta yoxibal c'ac'al jech chac c'u cha'al xchapanojic li jpasmantaletic xchi'uc li banquilaletique, ta xich'ic pojbel c'usitic oy yu'unic, xchi'uc ta xich'ic loq'uesel batel ta stojol xchi'iltaquic ti isutic tal ta mozoile, yu'un ja' jech la xchapanic li jpasmantaletic xchi'uc li banquilaletique.

⁹ Ja' yu'un scotol li judaetic xchi'uc benjaminetique la stsob sbaic ta Jerusalén ta yoxibal c'ac'al; ja' ta jtob (20) c'ac'al yochel li sbalunebal ue. Scotolic te ichotiic ta yamaq'uil ch'ulna. Te xa chniquic ta scoj li c'usi chich' chapanele xchi'uc ta scoj ti tsots chac' vo'e.

¹⁰ Ja' yu'un li pale Esdrase lic va'luc, jech laj yal: —Li vo'oxuque toj tsots ataoj amulic ta sventa ti laj aviq'uic li yanlum antsetique. Jech laj avaq'uic epajuc mulil ta jtojoltic vu'utic li israelutique.

¹¹ Ja' lec otquino amulic li' ta stojol li Muc'ul Diose, ja' li Dios yu'un jmoltotactic ta vo'onee. Ja' pasic li c'usi tsc'ane. Voc'o abaic ta stojol li yanlum cristianoetique xchi'uc ta stojol li antsetic avic'ojique.

¹² Scotol li israeletique tsots i'avanic, jech laj yalic: —Lec oy, ta jch'uncutic li c'usi chavale.

¹³ Pero ¿c'usi ta jpastic, yu'un mu xch'abi li vo'e? Mu xu' chicomcutic ta xoraltic. Li a'yeje mu xlaj yich' chapanel ta jun chib no'ox c'ac'al, yu'un toj epuncutic ti jech jtaoj jmulcutique.

¹⁴ Ja' lec ja' xa no'ox ac'o comicuc ta jq'uexolcutic li banquilaletic cu'uncutique. Li boch'otic te nacajtic ta lumetic cu'uncutic ti yic'anojic li yanlum antsetique ac'o yich' sa'bel sc'ac'alil li c'usi ora chtalique. Xu' chchi'inic tal li j'abteletic xchi'uc li jchapanvanejetic cu'uncutique, ja' to me ilaj sc'ac'al yo'nton ta jtojoltic li Diose —xiic.

^15-16 Scotol li boch'otic i'ayic tal ta mozoile lec laj ya'yic ti jech chich' pasele. Ja' xa no'ox muc xc'ot ta yo'ntonic li Jonatán xnich'on Asaele xchi'uc li Jahazías xnich'on Ticvae, xchi'uc jech muc xc'ot ta yo'ntonic ec li levietique, ja' li Mesulam xchi'uc Sabetaie. Li pale Esdrase lic st'uj stuc jayibuc viniquetic ti ja' banquilaletic ta jujuchop sbiique. Ta sba c'ac'al yochel slajunebal u la stsob sbaic scotol li boch'otic laj yich'ic t'ujel sventa chchapanic c'u x'elan chcom li a'yeje.

¹⁷ Ta sba c'ac'al yochel li sba ue ichapaj yu'unic c'u x'elan chcom li boch'otic yic'ojic yanlum antsetique.

¹⁸ Li paleetic ti yic'ojic yanlum antsetic la staique ja' liquemic: Ta smomnich'nabtac Josué xnich'on Josadac xchi'uc yuts' yalaltaquic Maasías, Eliezer, Jarib, xchi'uc Gedalías.

¹⁹ Le'e jun yo'ntonic la staquic loq'uel li yajnilique. Laj yaq'uic jcot chij ta smoton Dios ta sventa li smulique.

²⁰ Ta smomnich'nabtac Imere ja' Hanani Zebadías.

²¹ Ta smomnich'nabtac Harime ja' Maasías, Elías, Semaías, Jehiel, xchi'uc Uzías.

²² Ta smomnich'nabtac Pasure ja' Elioenai, Maasías, Ismael, Natanael, Jozabad, xchi'uc Elasa.

²³ Ta smomnich'nabtac levietique ja' Jozabad, Simei, Kelaía ja' Kelita yan sbi, Petaías, Judá, xchi'uc Eliezer.

²⁴ Ta jq'uejimoletique ja' Eliasib. Ta jchabi ti'naetique ja' Salum, Telem, xchi'uc Uri.

²⁵ Jech noxtoc li israeletic ti yic'anojic yantic antsetic la staique ja' liquemic: Ta smomnich'nabtac Parose, ja' Ramía, Jezías, Malquías, Mijamín, Eleazar, Malquías, xchi'uc Benaía.

²⁶ Ta smomnich'nabtac Elame ja' Matanías, Zacarías, Jehiel, Abdi, Jeremot, xchi'uc Elías.

²⁷ Ta smomnich'nabtac Zatue ja' Elioenai, Eliasib, Matanías, Jeremot, Zabad, xchi'uc Aziza.

²⁸ Ta smomnich'nabtac Bebaie ja' Johanán, Hananías, Zabai, xchi'uc Atlai.

²⁹ Ta smomnich'nabtac Banie ja' Mesulam, Maluc, Adaía, Jasub, Seal, xchi'uc Ramot.

³⁰ Ta smomnich'nabtac Pahat-moabe ja' Adna, Quelal, Benaía, Maasías, Matanías, Bezaleel, Binúi, xchi'uc Manasés.

³¹ Ta smomnich'nabtac Harime ja' Eliezer, Isías, Malquías, Semaías, Simeón,

³² Benjamín, Maluc, xchi'uc Semarías.

³³ Ta smomnich'nabtac Hasume ja' Matenai, Matata, Zabad, Elifelet, Jeremai, Manasés, xchi'uc Simei.

³⁴ Ta smomnich'nabtac Banie ja' Madai, Amram, Uel,

³⁵ Benaía, Bedías, Quelúhi,

³⁶ Vanías, Meremot, Eliasib,

³⁷ Matanías, Matenai, Jaasai,

³⁸ Bani, Binúi, Simei,

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amarías, xchi'uc José.

⁴³ Ta smomnich'nabtac Neboe ja' Jeiel, Matatías, Zabad, Zebina, Jadau, Joel, xchi'uc Benaía.

⁴⁴ Le'e ja' scotolic yic'ojic yanlum antsetic, pero la sloq'uesic batel xchi'uc yolic.