Esdras 1 - Bible in Tzotzil de Chenalhó with Deuterocanon

Sc'oplal c'usi laj yal Ciro

¹ C'alal sba to jabil yochel ta ajvalilal ta Persia li Ciroe, li Muc'ul Diose la stijbe yo'nton yu'un ac'o c'otuc ta pasel c'usi laj yal c'alal la xch'amanbe ye li j'alc'op Jeremiase. Ja' yu'un li ajvalile la spuc batel mantal ta scotol ti c'u smuc'ul sventainoje, xchi'uc la stac batel cartaetic, jech laj yal batel:

² “Vu'un Ciroun, ajvalilun li' ta Persia, chacalboxuc tal mantal: Li Muc'ul Dios yu'un vinajele yac'ojbun jventain scotol li ajvaliletic ta banamile, xchi'uc laj yalbun ti ac'o yich' meltsanel jun ch'ulna ta Jerusalén ta yosilal Judae.

³ Ja' yu'un, acotolic vo'oxuc li steclumaloxuc Muc'ul Diose, batanic me ta Jerusalén te ta yosilal Judá, bat pasic li ch'ulna yu'un Muc'ul Diose, ja' li Dios yu'un Israele, ja' li Dios te oy ta Jerusalene. Dios chascoltaoxuc batel.

⁴ Vo'oxuc ti mu'yuc chabatic, ti te chacomic yo' bu nacaloxuc ta orae, coltaic me batel li boch'otic te nopol nacaloxuc achi'uquique. Ac'beic batel c'anal taq'uin, saquil taq'uin, xchi'uc c'usitic oy avu'unic, xchi'uc ats'unub avovolic. Ac'beic noxtoc yan matanaletic ta yutsil avo'ntonic sventa chich' pasel o li xch'ulna Muc'ul Dios ta Jerusalene”, xi laj yal batel.

Isutic batel ta Jerusalén li israeletique

⁵ Jech iliquic li banquilaletic ta jujuchop sbiic Judá xchi'uc Benjamine, xchi'uc li paleetique, li levietique, ja' li boch'otic itijbat yo'ntonic yu'un Diose. Lic xchapan sbaic sventa tsutic ta Jerusalén, yu'un chbat spasic li ch'ulna yu'un Muc'ul Diose.

⁶ Li boch'otic nopol nacal xchi'uquique laj yaq'uic batel c'anal taq'uin, saquil taq'uin, xchi'uc c'usitic yan oy yu'unic, xchi'uc sts'unub yovolic, xchi'uc c'usitic toyolic stojol, xchi'uc yantic matanaletic ti yutsil yo'nton laj yaq'uic batele.

⁷ Li ajvalil Ciroe la sloq'ues li c'usitic jtuneletic to'ox te ta xch'ulna Muc'ul Dios ti ay yich' ta Jerusalén li ajvalil Nabucodonosor ti te xa yac'oj ta sna diosetic yu'une.

⁸ Li ajvalil Ciro ta Persiae ja' laj yac'be yat loq'uel li Mitrídates jchabitaq'uin yu'une. Ja' laj yac'be ta sc'ob li Sesbasar, ajvalil ta Judae.

⁹ Ja' jech yepal la sta ta jujuchop: Lajuneb xcha'vinic (30) muc'tic tazaetic pasbil ta c'anal taq'uin, jmil (1,000) muc'tic tazaetic pasbil ta saquil taq'uin, baluneb xcha'vinic (29) cuchiloetic,

¹⁰ lajuneb xcha'vinic (30) tazaetic pasbil ta c'anal taq'uin, xchi'uc yan chanib ciento xchi'uc lajuneb (410) tazaetic pasbil ta saquil taq'uin, xchi'uc yan jmil (1,000) c'usitic yan jtuneletic ta ch'ulna.

¹¹ Scotol li c'usitic chtun ta ch'ulna ti pasbil ta c'anal taq'uin xchi'uc ta saquil taq'uine ja' vo'mil xchi'uc chanib ciento (5,400) ta scotol. Scotol laj yich' sutel ta Jerusalén li Sesbasar c'alal isutic xchi'uc li boch'otic co'ol ichucatic batel ta Babiloniae.