Eclesiastés 9 - Bible in Tzotzil de Chenalhó with Deuterocanon

Sc'oplal c'u x'elan cuxlejal xchi'uc lajel

¹ Ta melel solel laj cac' co'nton ta yotquinel scotol, pero ja' no'ox jech la jta ta q'uelel chac' li'i: Li boch'o tuc' yo'nton, xchi'uc li boch'o bije oyic ta sc'ob Dios xchi'uc li c'usi tspasique. Pero li cristianoetique mu sna'ic c'usi chc'ot ta stojolic, me c'anel, o me bajel.

² Pero co'ol c'usi chc'ot ta pasel ta stojol scotol: boch'o tuc' yo'nton, boch'o chopol yo'nton; boch'o lec, boch'o mu'yuc lec; boch'o chac' sba ta lecubtasel, boch'o mu xac' sba ta lecubtasel; boch'o chac' milbil matanal, boch'o mu xac'; boch'o oy c'usi chal ta stojol Dios tspas, xchi'uc boch'o mu'yuc c'usi tsc'an chal ta stojol Dios.

³ Le'e ja' li c'usi toj chopol chc'ot ta pasel li' ta banamile, yu'un co'ol oy c'usi tstaic scotol. Li cristianoetique nojem ta c'usi chopol li yo'ntonique, nojem ta sbolil yo'ntonic ti jayib c'ac'al cuxulique, ts'acal chbatic c'alal ta ch'en.

⁴ Scotol li boch'otic cuxulic toe oy to c'usi lec xu' tstaic, jech chac c'u cha'al jcot ts'i' ti c'alal cuxul toe oy to c'usi xu' tsta; ja' mu'yuc xa c'usi tsta o li jcot león ti icham xae.

⁵ Li boch'otic cuxulic toe sna'ic ti ta ono'ox xchamique, pero li boch'otic chamenic xae mu xa c'usi sna'ic o, xchi'uc mu'yuc xa c'usi tstaic o, yu'un j'ech'el ich'ay o sc'oplalic.

⁶ Jech te laj sc'oplal o li xc'uxul yo'ntone, li yit'ixal yo'ntone, xchi'uc li sti'etel yo'ntone. Mu'yuc xa ta sventa o li c'usi stac' pasel li' ta banamile.

⁷ Batan me, cuxetuc no'ox avo'nton bat ve'an avot, bat uch'an ya'lel ats'usub, yu'un lec chil Dios li avabtele.

⁸ Scotoluc ora lapo no'ox lec ac'u'; ac'bo lec xpoxil ajol.

⁹ Cuxetuc no'ox avo'nton c'ano aba achi'uc avajnil ti jayib c'ac'al chavontol ech' li' ta sba banamile, yu'un ja' jech ac'bilot ti jayib c'ac'al cuxulote xchi'uc ti jayib c'ac'al avontol sujoj aba ta abtel ta banamile.

¹⁰ Scotol li c'usitic cha'ac'bat aventain spasele paso me ti bu c'alal xatabe yipal spasele, yu'un c'alal me labat ta yavil animaetique, mu'yuc xa abtel, mu'yuc c'usi stac' pasel, mu'yuc xa c'usi jna'tic, mu'yuc xa bijubtasel.

Oy c'usi mu'yuc lec ta jtatic ti c'alal cuxulutique

¹¹ Oy to c'usi yan laj quil noxtoc li' ta banamile: li boch'otic lec sobique oy ma'uc tstsalvanic ta anil; li boch'otic toj simaronique ma'uc toj ech'em xu' yu'unic pleito; li boch'otic lec x'abtejique ma'uc oy ep sve'elic; li boch'otic lec bijique ma'uc toj c'ulejic; li boch'otic oy c'usi lec xchanojique ma'uc lec ich'bilic ta muc'. Scotolic le'e co'ol li c'usi macal ta stojolique.

¹² Jech noxtoc mu'yuc boch'o sna' c'usi ora chlaj yorail, jech chac c'u cha'al choyetic ti mu sna'ic me tiq'uil chc'otic ta nuti' sventa stsacubile, xchi'uc li mutetic ti mu sna'ic me te ch-ochic ta yoquile. Ja' jech ec li cristianoetique mu sna'ic me oy c'usi chopol chtal ta stojolic, ac'o me jun yo'ntonic.

¹³ Oy c'usi yan laj quil noxtoc li' ta banamile; ja' jun muc'ta bijubtasel laj ca'ay.

¹⁴ Oy jun biq'uit lum, mu'yuc ep yajval; ital tsalatuc yu'un jun ajvalil ti lec xu' yu'une. Li ajvalile la xchapan lec abtejebaletic te ta spat xocon li lume.

¹⁵ Oy jun vinic te nacal. Li vinique me'on, pero lec bij; xu' yu'un tspoj ta sventa sbijil li lume, pero mu'yuc boch'o x'ech' ta alel yu'un li vinic le'e.

Li c'usi toj lec ta scotole ja' li jbijiltique

¹⁶ Ja' yu'un li vu'une chcal ti ja' toj lec li jbijiltique; ja' mu sta jech li stsatsal co'ntontique. Ja' no'ox ti mu'yuc ta o'ntonal sbijil li me'on vinique; mu'yuc ta tuc'ulanel li c'usi chale.

¹⁷ Ac'o me c'un no'ox sc'op li boch'otic bijique tsc'an ta jtuc'ulantic, yu'un ja' oy lec stu; ac'o me tsots chc'opoj li banquilal yu'un bol cristianoetique ja' mu'yuc stu.

¹⁸ Ja' toj lec chtun li jbijiltique; ja' mu sta jech li abtejebal sventa pleitoe. Ac'o me jun no'ox boch'o chopol c'usi tspas, pero ep tsoques c'usi lec.