Eclesiastés 7 - Bible in Tzotzil de Chenalhó with Deuterocanon

Tsc'an ja' ac'o jpastic li c'usi tsots sc'oplale

¹ Me lec jc'oplaltique, ja' xjelov slequil jech chac c'u cha'al lequil perfume. Me ta xa xijchamutique, ja' lec; ja' vocol li boch'o ja' to chvoq'uique.

² Oy lec stu me chbat jq'ueltic li boch'o chchame; ja' jutuc no'ox stu me chijbat yo' bu oy lec q'uine. Yu'un jech ac'o xchanic ec li boch'otic cuxulic toe, yu'un li lajele mu'yuc boch'o macal ta stojol.

³ Me chij'oc'utique ja' lec; ja' vocol me xijtse'inutic no'oxe. Ac'o me chvinaj ta jsatic ti chcat co'ntontique, pero ts'acal chac' smuc'ul co'ntontic.

⁴ Li boch'o bije ja' tsnopilan ti oy lajele, pero li boch'o bole ja' no'ox tsnopilan c'u x'elan li tse'ej-lo'ile.

⁵ Ja' lec ti chquich'tic ta muc' taq'uiel yu'un li boch'otic bijique; ja' vocol me ja' no'ox c'upil chca'itic ti chal me lecutic li boch'otic bolique.

⁶ Li stse'ejic boch'o bolique ja' jech chac c'u cha'al ch'ix ti xt'omlajet ta c'oq'ue. Le'e altic noxtoc.

⁷ Li slo'lael taq'uin ta sventa sibtasvaneje ta svovijesbe sjol li boch'o bije; li xch'amel taq'uine ta sbolibtas co'ntontic.

⁸ Ja' lec me ta xa stsuts li cabteltique; ja' vocol me ja' to ta jliquestique. Ja' lec me tsts'ic cu'untic scotole; ja' chopol me jtoybautic no'oxe.

⁹ Mu me ta aniluc no'ox xa'ilin, yu'un li ilinele ja' jech stalelic li boch'otic bolique.

¹⁰ Mu me jechuc xanop: “¿C'u yu'un ti toj lec to'ox laj yilic tal ta vo'one?”, mu me xachi. Le'e mu jechuc tsnop ti boch'o bije.

¹¹ Li bijilile toj lec, ja' jtunel yu'un scotol li boch'o cuxulic ta banamile; ja' jech chac c'u cha'al c'alal chquich'tic li jpuculaltic chijyac'butic comel jtotique.

¹² Li jbijiltique lec chtun cu'untic jech chac c'u cha'al lec chtun cu'untic li taq'uine. Pero li bijubtasele ja' tsots stu, yu'un li boch'o oy lec sbijile ta xpojat yu'un.

¹³ Q'uelo lec avil c'u x'elan yabtel stuc li Diose. ¿Me oy boch'o xu' yu'un tstuq'uibtas li c'usi ja' slucbinoj stuque?

¹⁴ C'alal me lec chbat avu'un scotole, cuxetuc no'ox avo'nton yu'un li c'usi lec ataoje. C'alal chopol chloc' avu'une, tsc'an chanop lec, yu'un ja' Dios tspas xchibal. Yu'un li cristianoe mu sna' c'usi chc'ot ta pasel ta stojol oc'om cha'ej.

¹⁵ Ti jayib c'ac'al vovil jeche' no'ox li' cuxulune oy c'usi quiloj: li boch'o tuc' yo'ntone mu jaluc cuxul xchi'uc li stuq'uil yo'ntone; yan li boch'o chopol yo'ntone oy ja' jal cuxul xchi'uc li xchopolilique.

¹⁶ Mu me xacuy ti toj tuc'ote, xchi'uc mu me xacuy ti toj bijote, yu'un xu' chasa' avocol atuc.

¹⁷ Jech noxtoc mu me toj chopoluc xapas aba; mu me toj boluc xapas aba. ¿Me yu'un chac'an chacham ti c'alal muc to avorailuque?

¹⁸ Ja' lec mu me jechuc xapas chac le'e; mu xacuy aba ta bij xchi'uc ta bol, yu'un li boch'o chich' ta muc' Diose mu jechuc tspas.

¹⁹ Li bijubtasele ta stsatsubtasbe yo'nton li boch'o bije; xjelov to stsatsal jech chac c'u cha'al me oy lajuneb jpasmantaletic ta jun lume.

²⁰ Ta melel mu'yuc boch'o li' ta banamil ti bats'i ven tuq'ue ti me jutuc mu sta smule.

²¹ Mu me xatuc'ulan li c'usitic chich' alel chava'ye, yu'un jech mu xava'ay me oy c'usi chopol chal ta atojol li amozoe.

²² Yu'un li vo'ote ana'oj lec ti oy boch'otic ep c'usi chopol avalojbe eq'ue.

Sa'el bijilil

²³ Scotol le'e laj q'uel lec, laj cotquin lec scotol, yu'un ta jc'an ti chibijub leque, pero inamaj loq'uel ta jtojol li mero jbijile.

²⁴ Solel nom oy ta jtojol o; me jutuc mu xa stac' tael o; mu'yuc boch'o xu' yu'un tsta o.

²⁵ Jech te lic jnop lec, lic cac' lec venta; la jpas preva scotol, yu'un jech ac'o cotquin c'usi chopol chac' li sbolil o'ntonale, xchi'uc c'usi bol razón chac' li ch'ayel ta bee.

²⁶ Te la jta ta otquinel ti oy jun c'usi toj c'ux abul jbatic yu'une; ja' xu' to jutuc ti c'alal chijchame, ja' ti c'alal oy jun ants chlo'lavane. Yu'un li yo'ntone ja' jech chac c'u cha'al lasu; li sc'obe ja' jech chac c'u cha'al cadena. Li boch'o lec sc'anoj Diose chcol loq'uel ta sventa li ants le'e; yan li boch'o ja' lec cha'ay li mulile te chucul chcom o.

²⁷ Vu'un li jcholc'opune la jnop lec ta scojolcojol c'u x'elan oy li c'usitic oye, yu'un jech ta xcotquin lec.

²⁸ Li c'usi oy ta co'nton ta jna'e, mu'yuc to jtaoj. Ja' no'ox jtaoj jun lequil vinic ta jmil viniquetic; yan li antsetique me junuc mu'yuc lec jtaoj ta scotol li antsetique.

²⁹ Ja' no'ox jech la jta ta q'uelel chac li'i: li cristianoe lec tuc' yo'nton pasbil yu'un li Diose, pero ja' xa stuc ta sbolibtas sbaic batel.