Eclesiastés 6 - Bible in Tzotzil de Chenalhó with Deuterocanon

¹ Oy yan c'usi toj vocol quiloj noxtoc li' ta sba banamile; ep jech chc'ot ta stojol scotol li cristianoetique:

² Li Diose oy bu chac'be ep sc'ulejalic xchi'uc lec sc'oplalic li cristianoetique; mu'yuc c'usi yan sc'an cha'yic o, pero oy bu mu x'ac'bat sc'upinic yu'un Dios li c'usitic oy yu'unique; yan cristiano chac'be sc'upin. Le'e altic no'ox; mu'yuc c'usi stu o.

³ Ac'o me ep jabil chcuxi li jun vinique, ac'o me chvoc' vo'vinic (100) xnich'nab, pero me muc sc'upin ya'ay scotol li c'usitic leque, xchi'uc me mu'yuc xmucat noxtoc c'alal chchame, chcal ti toj abul sbae. Ja' lec chil li olol ti chyal no'oxe.

⁴ Ac'o me altic no'ox ital, ac'o me jech no'ox ich'ay batel ta ic'al osil ya'yel, me muc xvinaj o c'usi sbi.

⁵ Ac'o me muc xil saquil osil, pero ja' toj jun yo'nton chcux; yan li vinique ja' toj abul sba.

⁶ Ac'o me chcuxi cha'mil (2,000) jabil li vinique, pero me muc sc'upin ya'ay scotol li c'usitic oy yu'une, co'ol no'ox sba, yu'un jmoj ono'ox yavilic ti bu chc'otique.

⁷ Li cristianoe ja' no'ox sventa ye scotol li yabtel ti yac'oj persa xchi'uque, pero mu ono'ox sta o jun yo'nton xchi'uc.

⁸ Ja' yu'un ¿c'usi lec tsta ta sventa sbijil li bijil vinique? yu'un co'ol no'ox sba xchi'uc li me'on ti mu'yuc c'usi tstae, ac'o me lec sna' c'usi tspas ta stojol li xchi'iltaque.

⁹ Ja' lec ti junuc co'ntontic yu'un li c'usi quiloj xa ta jsatic jtaojtique. Li c'usi ta jnopilantic ta jc'antique ja' altic. Le'e mu'yuc c'usi chloc' o; altic no'ox chcac' jvocoltic.

¹⁰ Li c'usi oy li' ta orae vo'one ono'ox ac'bil sbi, xchi'uc otquinbil ono'ox c'u x'elan li cristianoe, jech mu xu' ta stsal sba xchi'uc li Boch'o jeloven svu'ele.

¹¹ Yu'un altic me puru epal lo'il no'oxe; ja' no'ox ch-epaj li c'usi mu'yuc stue, pero mu'yuc c'usi ta jtatic o yu'un.

¹² Mu'yuc boch'o sna' c'usi lec ta sventa jun cristiano ti jayib c'ac'al cuxule, ti ja' no'ox jech chac c'u cha'al yaxinaltic li xcuxlejale. Mu'yuc boch'o xu' chalbe c'usi chc'ot ta pasel li' ta banamil ti c'alal chamen xa'oxe.