Eclesiastés 5 - Bible in Tzotzil de Chenalhó with Deuterocanon

Mu lecuc me ta anil no'ox oy c'usi chcaltic ta stojol Diose

¹ C'alal chabat ta ch'ulna yu'un Diose, q'uelo me aba c'u x'elan chaxanov. A'ibo lec ava'ay smelol, yu'un ja' tsots sc'oplal; ja' mu tsotsuc sc'oplal li milbil matanal chaq'uic li boch'otic bolic ti mu snopic me chopol c'usi tspasique.

² Mu me toj aniluc xac'opoj; mu me xjac' avo'nton ta yalel c'usi chaval ta stojol li Diose. Yu'un li Diose te oy ta vinajel; yan li vo'ote oyot ta banamil, ja' yu'un tsc'an leclec no'ox sba c'usi chaval ta stojol.

³ Me ep chlo'ilaj co'ntontique, chijvaychin yu'un, xchi'uc me toj ep c'usi chcaltique, ep c'usi mu'yuc stu chloc' ta quetic.

⁴ C'alal me oy c'usi chaval ta jamal ta stojol Dios chapase, paso me ta ora. Yu'un li Diose mu'yuc lec chil li boch'otic bolic ti mu xc'ot xc'opojique. Ja' lec ac'o c'otuc ta pasel avu'un li c'usi chavale.

⁵ Ja' lec mu xaval ta jamal chapas ti me mu xc'ot ta pasel avu'une.

⁶ Mu me ta scojuc no'ox ave chata amul; mu me ts'acaluc to xaval ta stojol yajtunel Dios ti ta scoj muc xanop lec c'usi laj avale. ¿C'u yu'un chavac' ilinuc Dios ta sventa li c'usi chavale? ¿C'u yu'un chavac' mu'yuc stu chil Dios li c'usi chapase?

⁷ Ac'o me ep li vaychile, xchi'uc li c'usitic mu'yuc stue, xchi'uc li vontol lo'il no'oxe, pero li vo'ote tsc'an ja' no'ox chavich' o ta muc' li Diose.

Scotol li c'usitic oy li' ta banamile mu'yuc c'usi ta jtatic o yu'un

⁸ Mu me xch'ay avo'nton c'alal me oy chavil ta junuc banamil ti uts'intabilic li me'onetique ti me soquesbil xa li tuq'uil chapanele. Yu'un li jchapanvanejetique oy to yan banquilal yu'unic ti ja' chmucbat smulic yu'une. Xchi'uc oy to yan banquilal jpasmantal ti ja' cajal yabtele; ja' chmucbat smulic noxtoc.

⁹ Jech noxtoc, sc'oplal jcotoltic chtun cu'untic li c'usitic chloc' li' ta banamile, pero li ajvalile ja' ta xich' scotol.

¹⁰ Li boch'o tsc'upin ep taq'uine mu spas ta jun yo'nton o; li boch'o tsc'an ep c'usi oy yu'une muc ta'louc cha'ay ti c'u yepal staoje. Ja' yu'un altic no'ox; mu'yuc stu o.

¹¹ Yu'un c'alal ch-epaj c'usi oy yu'une, ta x'epaj boch'o tslajes noxtoc. ¿C'usi chloc' o yu'un li yajval ti ja' no'ox ech'el ch-ech' ta sate?

¹² Li boch'o jsa'abtel no'oxe oy bu jutuc chve', oy bu ep chve', pero lec jun yo'nton chvay; yan li jc'uleje mu x'aq'ue vayuc yu'un li sc'ulejale.

¹³ Oy yan c'usi quiloj li' ta sba banamil ti chac' ep at-o'ntone: li boch'o tstsob ep sc'ulejale ja' no'ox te ta sta svocol yu'un.

¹⁴ Jech noxtoc oy bu te no'ox chch'ay ta chonolajel, o ta manulajel yu'un, ja' yu'un mu'yuc xa c'usi chac'be comel li xnich'one.

¹⁵ Jech chac c'u cha'al t'anal ono'ox ivoq'ue, ja' jech t'anal ta sut batel noxtoc; mu'yuc ta xich' batel jutuc ti c'u yepal i'abteje.

¹⁶ Ta melel chac' ep at-o'nton, yu'un ti c'u ono'ox x'elan itale ja' jech tsut batel noxtoc, ja' yu'un jeche' no'ox laj yac' svocol ta abtel.

¹⁷ Ti jayib c'ac'al cuxule ta ic' osil no'ox oy ya'yel, toj ep svocol, toj abul sba, xchi'uc chvovij sjol o.

¹⁸ Ja' yu'un jun no'ox li c'usi lec quiloje. Ja' no'ox ti ac'o ve'cutic, ac'o cuch'tic lec vo'e, ti ac'o jc'upin lec ca'itic c'u x'elan slequil li cabteltic li' ta banamile, yu'un ja' cu'untic yac'ojbutic li Diose.

¹⁹ Li boch'otic ep sc'ulejalic ac'bilic yu'un Diose, ac'bilic noxtoc ti ac'o stun slajesique, ti ac'o stsaquic ti c'u yepal chtun yu'unique, ti ac'o cuxetuc no'ox yo'ntonic ta sventa li yabtelique, yu'un ja' smoton ac'bilic yu'un li Diose.

²⁰ Jech mu xlo'ilaj yo'nton ti jayib c'ac'al cuxule, yu'un ac'bil xcuxetel yo'nton yu'un li Diose.