Eclesiastés 4 - Bible in Tzotzil de Chenalhó with Deuterocanon

¹ Ts'acal lic cac' lec venta noxtoc c'u x'elan li tsatsal uts'intael li' ta banamile. Te laj quil ti ep ch-oq'uic li boch'otic uts'intabilique, pero mu'yuc boch'o chtal patbatuc yo'ntonic; mu'yuc boch'o chtal coltavanuc, yu'un li j'uts'intavanejetique yich'oj lec stsatsalic.

² La jnop ti ja' toj lec chilic li boch'otic chamenic xae, ti ja' abul sbaic li boch'otic cuxulic toe.

³ Pero ta melel ja' toj ven lec chilic li boch'otic mu'yuc to voq'uemique, yu'un mu'yuc to yiloj li c'usitic chopol chich' pasel li' ta banamile.

⁴ Laj quil noxtoc, ti c'alal tsots chij'abtejutique ti c'alal lec chbat cu'untic li c'usi ta jpastique, ja' no'ox te ta xlic jti'-o'nta jbatic o. Scotol le'e mu'yuc stu; ja' jech chac c'u cha'al me ta jc'an ta jnutstic li iq'ue, mu'yuc c'usi ta jtatic o.

⁵ Li cristianoetique jech chalic: “Li bol vinique jeche' te smeyoj sc'ob, ja' no'ox ta xuts'inta sba stuc”, xiic.

⁶ Pero li vu'une jech chcal: “Tsc'an ono'ox ta jcux co'ntontic jutuc; ja' altic me xchibal xa'ox jc'ob jmiloj jbatic ta abtel jchi'uctique. Mu'yuc stu; ja' jech chac c'u cha'al me ta jc'an ta jnutstic iq'ue, mu'yuc c'usi ta jtatic o”, xichi.

⁷ Oy yan c'usi laj quil ti chich' pasel noxtoc li' ta banamil ti mu'yuc stue:

⁸ oy jun vinic stuc no'ox, mu'yuc xchi'iltac, mu'yuc xnich'nab, mu'yuc yuts' yalaltac, pero me jutuc mu xcux ta abtel; mu x'ech' yo'nton o ta sc'upinel, ta stsobel li sc'ulejale. Me jutuc mu'yuc to bu jech tsnop: “¿Boch'o chich' comel li epal abtel ta jpase? ¿Me mu jeche'uc no'ox chcac' jvocol?”, mu'yuc bu xi. Scotol le'e mu'yuc stu o; altic chac' svocol.

Me lec co'ol co'ntontique oy lec jtsatsaltic

⁹ Me chibutique ja' lec, yu'un ja' ep c'usi xu' cu'untic; ja' mu sta jech me jtuctic no'oxe.

¹⁰ Me oy boch'o chyal ta lum junucale xu' ja' chtoyvan liquel li june. Pero me chyal ta lum li boch'o stuc no'oxe, toj abul sba, yu'un mu'yuc boch'o chtoyunuc liquel.

¹¹ Jech noxtoc me chibutic chijvayutique, lec q'uixin chca'itic; yan li boch'o stuc no'ox chvaye, oy sic cha'ay.

¹² Li boch'o stuc no'oxe, xu' tsalbil chcom; yan li boch'o chibique, lec xu' yu'unic. Jech noxtoc me pasem xa ta oxc'ol li ch'ojone, vocol ta tuch'el.

Muc ta jabilalticuc oy li jbijiltique

¹³ Ja' xu' to li jun me'on querem, ti oy lec sbijile; ja' mu'yuc stu li jun mol ajvalil ti mu'yuc bije, yu'un mu xa xa'ay taq'uiel.

¹⁴ Ac'o me me'on c'alal ivoc' li quereme, xchi'uc ac'o me ja' to iloc' ta chuquel ti ch-och ta xq'uexol ajvalile

¹⁵ pero li cristianoetique laj quil ti stsobetic no'ox ta scoltael sventa ch-och ta q'uexolile.

¹⁶ Ac'o me bats'i ep cristianoetic stsobetic ta stojol, pero mu xcuxetuc yo'ntonic ta stojol li yan alab nich'nab ti ts'acal to chtalique, ja' yu'un le'e altic no'ox; mu'yuc c'usi bal o.