Eclesiastés 2 - Bible in Tzotzil de Chenalhó with Deuterocanon

¹ Jech la jnop ta co'nton noxtoc: “Ta jpas ca'tic li c'usi tsc'an co'ntone; ta jc'upin ca'tic li c'usitic leque”, xichi. Pero altic noxtoc; mu'yuc c'usi stu o.

² Li tse'eje bolibel no'ox chac'; li sc'upinel banamile mu'yuc c'usi stu o ta j'ech'el.

³ La jnop ti ta jpas ca'ay poroval c'u x'elan ta uch'el li poxe, yu'un ta jc'an oy c'usi ta jchan, yu'un ta jc'an ta jna' me ja' jech xcuxet yo'nton cha'yic li cristianoetic ti puru uch' pox tspasic jayib c'ac'al cuxulic li' ta banamile.

⁴ Toj muc'tic abtel la jpas: la jpas muc'tic naetic; la jts'un ts'usubtic cu'un jtuc;

⁵ la jpas lec ts'unubaltic cu'un jtuc; te la jts'un scotol li jaychop jsatinom te'etique.

⁶ Jech noxtoc la jpas yavil vo'etic sventa chcat'es o li te'etic jts'unoje.

⁷ La jman ep jmozotac xchi'uc jquiaratac, xchi'uc oy ep jmozotac te ivoq'uic ta jna noxtoc. Oy ep jvacaxtac xchi'uc jchijtac; xjelov to yepal cu'un jech chac c'u cha'al li yantic ajvaliletic ijelovic li' ta Jerusalene.

⁸ Bats'i ep la jbusan ta tsobel c'anal taq'uin, xchi'uc saquil taq'uin; ja' sc'ulejal yantic ajvaliletic xchi'uc yantic banamil. Oy ep jq'uejimol vinic antsetic cu'un, ep cajniltac, ep yan antsetic cu'un noxtoc, yu'un la jc'upin ca'ay c'usitic tsc'upin li cristianoetique.

⁹ Vu'un no'ox jtuc toj muc'un, yu'un la jta scotol li c'usi mu'yuc la staic li yantic ajvaliletic ijelovic li' ta Jerusalene. Xchi'uc mu'yuc ono'ox la jch'ay o li jbijile.

¹⁰ Me jchopuc mu'yuc la jalanbe li c'usi la sc'an co'ntone; laj jc'upin ca'ay scotol li c'usi lec laj quile. Yu'un toj xcuxet no'ox co'nton yu'un scotol li cabtele, ja' stojol cabtel laj ca'ay.

¹¹ Ts'acal lic jq'uel lec scotol li yabtel coc jc'obe xchi'uc li yantic c'usitic toj vocolic ta pasel laj ca'ye. Te laj quil ti altic no'ox chac' jvocoltique, yu'un ja' no'ox jech chac c'u cha'al me ta jc'an ta jnutstic iq'ue, mu'yuc c'usi ta jtatic o li c'usi ta jpastic li' ta sba banamile.

¹² Ts'acal lic jnop noxtoc ta sventa scotol li bijilil xchi'uc li bol talelale. Ja' yu'un jech la jnop: “¿C'usi xa yan tspas li yan ajvalil c'alal me i'oche? Mu'yuc. Ja' no'ox chcha'pas li c'usi pasbil xa ono'oxe”, xichi.

¹³ Te laj quil ti ja' oy lec stu li bijilile; ja' mu'yuc stuc li bol talelale. Jech chac c'u cha'al ja' lec oy stu li sac osile; ja' jutuc no'ox stu li ic' osile.

¹⁴ Li boch'o bije lec xil bu chbat; yan li bol vinique ta ic' osil chanov. Pero la jna' ti co'ol no'ox c'usi tstaic xchibalique.

¹⁵ Jech la jnop: “Li c'usi ta xc'ot ta stojol li bol vinique ja' jech ta xc'ot ta jtojol ec. Ja' yu'un mu'yuc stu ti ta jmil jba ta sa'el jbijile. Laj xa quil ti jeche' no'oxe, ti mu'yuc c'usi chloc' oe.

¹⁶ Yu'un mu'yuc boch'o te oy o sc'oplal sbatel osil. Manchuc me bij, me bol, scotol ta ono'ox xcham. C'alal me i'ech' ep jabile, ich'ay xa'ox ta alel”, xichi ta co'nton.

¹⁷ Ja' yu'un la jnop ti mu'yuc stu ti li' cuxulun ta banamile, yu'un scotol li c'usitic stac' pasel li' ta banamile ech' xa co'nton yu'un. Ta melel mu'yuc stu; ja' jech chac c'u cha'al me ta jc'an ta jnutstic iq'ue, mu'yuc c'usi ta jtatic o.

¹⁸ Jech noxtoc mu'yuc stu chquil scotol ti c'u yepal abtejemun li' ta banamile, yu'un ja' no'ox te chcom ta sventa li boch'o chlic ochuc ta jq'uexole.

¹⁹ Mu stac' na'el me bij, me muc bijuc li boch'o chtal sventain scotol li cabtel ti ta jvocol jtarabajo la jmil jba ta spasel xchi'uc li jbijil li' ta banamile. Ja' yu'un altic noxtoc; mu'yuc c'usi chloc' o.

²⁰ Ja' yu'un mu junuc co'nton c'alal chquil c'u x'elan li cabtel ti la jmil jba ta spasel li' ta banamile. “Altic la jlubtsan jba”, xichi.

²¹ Yu'un li boch'o tsots ch-abtej ta sventa sbijil, ti ta stunes scotol li sjol ti bu c'alal sna'e, pero ja' chich' comel li boch'o mu ja'uc i'abteje. Altic noxtoc, solel mu xloc' venta ti jech chc'ot ta pasele.

²² Ja' yu'un ¿c'usi tsta jutuc li jun vinic ti smiloj sba ta abtel, ti sloq'uesoj yo'nton ta snopel li' ta banamile?

²³ Ti jayib c'ac'al cuxule puru svocol no'ox oy; mu'yuc bu nacal o yo'nton xchi'uc, me ja'uc ta ac'ubal mu xvay ta snopel xchi'uc li c'usi tspase. Pero scotol le'e altic no'ox; mu'yuc c'usi tsta o me jutuc.

²⁴ Li c'usi no'ox xu' tspas li vinic ti xu' tsbalin jutuque, ac'o no'ox ve'uc, ac'o no'ox yuch' lec vo', ac'o no'ox sc'upin lec ya'ay li stojol yabtele. Le'e jna'oj ti ja' jmotontic yac'ojbutic noxtoc li Diose.

²⁵ ¿Me oy boch'o lec chve'? ¿Me oy boch'o tsta xcuxetel yo'nton ti me mu'yuc ch-ac'bat yu'un Diose?

²⁶ Yu'un li Diose ja' ta xac'be sbijil, ta xac'be lec sna', ta xac'be lec xcuxetel yo'nton li boch'o lec chil stuque. Yan li boch'o ta sa' smule ja' no'ox ta xac'be yabtel yu'un ac'o stsob ep sc'ulejal sventa ja' ac'o yich' ac'bel li boch'o lec chil stuc li Diose. Scotol le'e mu'yuc stu noxtoc; ja' jech chac c'u cha'al me ta jc'an ta jnutstic iq'ue, mu'yuc c'usi ta jtatic o.