Eclesiastés 12 - Bible in Tzotzil de Chenalhó with Deuterocanon

¹ Ti c'alal ach'iumalic to tale, na'ic me ti oy Boch'o la spasoxuque, yu'un yo'to mu'yuc chataic li chopol orae, yu'un ta to me sta yorail jech chlic avalic: “Mu'yuc c'usi lec la jta ti jayib jabil cuxulune”, xachiic,

² yu'un yo'to mu'yuc chmac xojobal li c'ac'ale, li ue, xchi'uc li c'analetique, xchi'uc yo'to mu'yuc chtal pimil toc ti c'alal ch-ech' vo'e.

³ Ta to sta sc'ac'alil ta xniquic ta xi'el li boch'otic chchabibeic spasubmantal ajvalile; ta xlic xmoch' sbaic noxtoc li viniquetic ti lec tsots xu' yu'unique, xchi'uc chlic c'unibuc ta juch'nej li mulinoe, yu'un mu'yuc xa lec li yee, xchi'uc li boch'otic tsq'uelic osil ta ventanae ta x'ic'um osil chilic.

⁴ C'alal me ic'ot sc'ac'alil le'e, ta xich' maquel li ti'naetic ta xorale; mu'yuc xa chbac' li mulinoe; mu'yuc xa chbac' mutetic, xchi'uc mu'yuc xa chvinaj boch'o chq'uejin.

⁵ Xi'bal xa sba chquiltic li c'usi toyolique, xchi'uc xi'bal xa no'ox sba chca'itic ta bebetic. Ta xlic sacubuc joltic jech chac c'u cha'al xnich almendro. Jquiloj xa no'ox jbatic chijxanov jech chac c'u cha'al xc'ajben ti yayijeme; mu'yuc xa c'usi xchi chca'itic o. Yu'un li cristianoe ta xbat o ta yavil sbatel osil, te x'oc'oletic ta xoraltic li boch'otic oy boch'o chcham yu'unique.

⁶ Ja' yu'un na'ic me li Boch'o spasojoxuque yu'un yo'to mu'yuc tuch'em li cadena pasbil ta saquil taq'uine, yo'to mu'yuc voq'uem li bin pasbil ta c'anal taq'uine, xchi'uc yo'to mu'yuc voq'uem li q'uib te oy ta sti' nio'e, xchi'uc yo'to mu'yuc c'asem li setset taq'uin sventa xaneb lasu ti chich' lupel o vo' te ta joq'ue.

⁷ Li pucuque ta sut batel ta banamil yan velta ti bu ono'ox ilic tale; li ch'ulelale ta sut batel ta stojol Dios, yu'un ja' ono'ox laj yac'.

⁸ Vu'un li jcholc'opune jech chcal yan velta: ¡Altic no'ox, mu'yuc c'usi ta jtatic o! ¡Mu'yuc c'usi stu o scotol!

C'usi tsots sc'oplal tsc'an tspas jun cristiano

⁹ C'alal yantic no'ox ibijub batel li jcholc'ope, ep bijubtasel laj yalbe li xchi'iltaque. Solel la suj sba ta xchanel, laj yac' persa snopel scotol, jech la xchapan ep lequil bic'tal chanubtaseletic.

¹⁰ Li jcholc'ope laj yac' persa snopel c'usitic lec, ti oy lec stue, xchi'uc laj yac' persa ti lec chbat sts'ibael yu'une xchi'uc ti oyuc lec stuq'uile.

¹¹ Li sc'op boch'otic bijique ja' jech chac c'u cha'al c'usi lec ts'ubts'ub sni', li bic'tal chanubtaseletique ja' jech chac c'u cha'al lavuxetic ts'apajtic lec ta te', yu'un ja' yac'oj stuc li Jchabichije.

¹² Jnich'on, scotol le'e lec chtun cu'untic sventa chijbijub. Li epal vunetique mu'yuc slajebal ta pasel, me ep c'usi ta jc'an ta jchantique ta xcuts'inta jbec'taltic.

¹³ Li slajeb c'usi tsc'an ta jpastic ta sventa scotol li c'usi laj xa ca'itic tale ja' li'i: Ich'o me ta muc' li Diose; ch'unbo scotol li smantaltaque. Ja' no'ox jech oy ta sventa ac'o spas li cristianoetique.

¹⁴ Yu'un li Diose tsta yorail ta stsob ta chapanel scotol li c'usi ta jpastique xchi'uc li c'usi mucul pasbile, ac'o me lec, o me chopol.