Eclesiastés 11 - Bible in Tzotzil de Chenalhó with Deuterocanon

¹ Me chbat achon ta yan lum li abolomale; c'alal me i'ech' jayibuc c'ac'ale, laj apas xa'ox canal.

² Voq'uilano batel ta vucvoc', o ta vaxacvoc' li c'usi oy avu'une, yu'un mu xana' c'usi ora chtal c'usi chopol li' ta banamil.

³ Me xcuchoj ya'lel li toque, ta xac' vo' li' ta banamil. Me ta stuq'uil norte, o me stuq'uil sur ta xlom batel li te'e, te chcom o ti bu ic'ote.

⁴ Li boch'o ja' no'ox tsmala ti lec ora chtale, mu c'usi sts'un o yu'un; li boch'o tsmala no'ox chac' lec vo'e mu'yuc c'usi tsc'aj o.

⁵ Jech chac c'u cha'al mu xana' c'u x'elan chanov li iq'ue, xchi'uc mu xana' c'u x'elan ta xchapaj tal ta yut xch'ut sme' li olole, ja' jech mu xana' c'u x'elan yabtel li Diose, yu'un ja' stuc ta spas scotol.

⁶ Ovolajan no'ox ta sob xchi'uc ta mal c'ac'al, yu'un mu xana' bu junucal lec chbat, me ja' ti ba'yuc laj ats'une o me ja' ti bu ts'acal laj ats'une, o me xchibal lec chbat.

⁷ Toj lec chca'itic li sac osile, xchi'uc toj lec cha'ay jsatic ti chil xojobal c'ac'ale.

⁸ Ac'o me ep jabil chijcuxiutic, ac'o me ta jc'upin ca'itic scotol le'e, tsc'an jna'tic noxtoc ti ja' toj ep c'ac'al chbat jtatic li ic' osile. Ja' yu'un mu'yuc ono'ox c'usi lec ta jtatic ta ts'acal.

Bijubtasel ta sventa querem tsebetic

⁹ Querem tsebetic, cuxetuc no'ox avo'ntonic ta sventa ti ach'iumalic toe; loq'ueso avo'ntonic ta sc'upinel c'usi oy ta avo'ntonic ti c'alal ja' to avich'ojbeic tal yipale. Pasic scotol li c'usi tsc'an avo'ntonique xchi'uc li c'usi chavil ta asatique, pero na'ic me ti tsta yorail ta xchapanoxuc Dios ta sventa scotol li c'usitic chapasique.

¹⁰ Jipo loq'uel li slo'il avo'ntonique; mu me xavac' nopajuc li c'usi chac'be svocol abec'talique, yu'un li ach'iumalic, li avutsilalique anil no'ox xjelov.