Eclesiastés 10 - Bible in Tzotzil de Chenalhó with Deuterocanon

¹ Li jcot biq'uit chamen us ti tu xae, xu' ta soquesbe yic' smuil xpoxil li jpas muil poxile. Ja' jech li biq'uit bol talelale ta soques jc'oplaltic xchi'uc jbijiltic.

² Li boch'o bije ja' chac' yo'nton ta sventa li c'usi leque; yan li boch'o bole ja' chac' yo'nton ta sventa li c'usi chopole.

³ Li boch'o bole ta sventa c'usitic tspas ta xvinaj ti mu'yuc stu c'usi tsnope, jech chac' vinajuc ta stojol cristianoetic ti ja' bole.

⁴ Me ta xilintaot li boch'o oy yabtele, mu c'usi xaval, yu'un li smuc'ul co'ntontique ja' spajesubil li muc'tic c'opetique.

⁵ Oy c'usi yan chopol quiloj noxtoc ti chich' pasel li' ta banamil ti ba'yuc sliquesojic li jpasmantaletique.

⁶ Li boch'otic bolique oy ja' tsots yabtel ac'bilic; yan li boch'otic bijique peq'uel yabtel ac'bilic.

⁷ Jech noxtoc quiloj ti oy ja' cajal ta ca' chanovic li mozoetique; yan li banquilaletique ja' ta yacan chanovic jech chac c'u cha'al mozo.

⁸ Li boch'o tsjoc' jun ch'ene ja' te ta x'och yalel stuc. Li boch'o tsjines corale te chti'at ta jti'val chon.

⁹ Li boch'o ta xaan tone te ta xyayij xchi'uc. Li boch'o ta sjav si'e xi'bal sba te tsboj sba o.

¹⁰ Me lajem ye li eq'uele, me mu'yuc chich' juxele, yipal tsc'an ta jtsepbetic. Me oy lec jbijiltique, lec xu' cu'untic spasel li abtele.

¹¹ Me ja' to chich' tijel son ti c'alal iti'van xa'ox li chone, mu'yuc xa stu chc'ot li jtijsone.

¹² Li sc'op li boch'o bije toj lec ta a'yel; yan li sc'op bol vinique ja' no'ox sventa ta sa' o svocol.

¹³ C'alal tsliques slo'ile, puru chopol lo'iletic no'ox chal; c'alal chlaj yo'ntone, mu'yuc stu o li c'usi iloc' ta yee.

¹⁴ Li bol vinique vontol ep no'ox c'usi xu' chal. Pero mu'yuc boch'o xu' chal li c'usi chc'ot ta pasele. ¿Boch'o xu' tsna' li c'usi chc'ot ta ts'acale?

¹⁵ Li boch'o bole jeche' no'ox chac' svocol ta abtel, yu'un mu snop lec c'usi tspas.

¹⁶ ¡Ay banamil, toj abul aba ti querem to li ajvalil avu'une, xchi'uc ti te sbats'il o pasq'uin tsacub li banquilaletic avu'une!

¹⁷ Toj xcuxet no'ox yo'nton li jun banamil ti lec ich'bil ta muc' ajvalil yu'une, xchi'uc ti lec ta yorail chve'ic li banquilaletic yu'une, yu'un jech ch-ayin lec stsatsalic; ma'uc no'ox ta smil sbaic ta yacubel.

¹⁸ Li boch'o ch'aje te no'ox sq'ueloj chbajan yalel li sts'amte'al snae; ta scoj no'ox xch'ajil te chlic lomuc o li snae.

¹⁹ Li ve'el uch' vo'e sc'upinel no'ox; li pasem ya'lel ts'usube ja' no'ox sventa xcuxet yo'nton cristianoetic yu'un. Yan li taq'uine ja' chtun ta sventa scotol.

²⁰ Mu me c'usi chopol xanop ta stojol li ajvalile; xchi'uc mu me c'usi chopol xaval ta mucul ta stojol li jc'uleje, yu'un li mutetic ti buyuc no'ox xviletique xu' ta xich'ic batel li ac'ope.